ދުނިޔެ
ޣައްޒާގައި ހަނގުރާމަ ހުއްޓާލުމަށް އެއްބަސްވުމަކާ ކައިރިވެއްޖެ: އެމެރިކާގެ ރައީސް ބައިޑެން
އެމެރިކާގެ ރައީށް ޖޯ ބައިޑަން އަދި ޔަހޫދީ ރައީސް ބެންޖަމިން ނަތަންޔާހޫ ފޮޓޯ: އިންޓަނެޓް
މި ހަފްތާގެ ތެރޭގައި ޣައްޒާގައި ހިނގަމުންދާ ހަނގުރާމަ ހުއްޓާލުމަށް އެއްބަސްވުމަކާ ވާސިލްވެދާނެކަމަށް އެމެރިކާގެ ރައީސް ޖޯ ބައިޑެން ވިދާޅުވެއްޖެއެވެ. ނަމަވެސް އިޒްރޭލުގެ ސިފައިން އަދިވެސް ޣައްޒާއަށް ހަމަލާދެމުންދާކަން ފާހަގަކުރެވެއެވެ.
ހޯމަ ދުވަހު ދެއްވި ތަޤްރީރެއްގައި ރައީސް ބައިޑެން ވިދާޅުވީ، އެއް އަހަރަށްވުރެ ގިނަ ދުވަހު ދެމިގެންދިޔަ މި ހަނގުރާމަ ހުއްޓާލުމަށް ކުރިން އޭނާ ހުށަހެޅުއްވި ހުށަހެޅުން މިހާރު ވަނީ ތަންފީޒުވުމާ ކައިރިވެފައެވެ. އަދި މިކަމަށްޓަކައި ބުރަ މަސައްކަތްތަކެއް ކުރަމުންދާ ކަމަށް ވެސް ވިދާޅުވިއެވެ.
އެމެރިކާގެ ނެޝަނަލް ސެކިއުރިޓީ އެޑްވައިޒަރ ޖޭކް ސަލިވަން ވެސް ވިދާޅުވެފައިވަނީ މި ހަފްތާގެ ތެރޭގައި އެއްބަސްވުމަކަށް ވާސިލްވުމުގެ ފުރުސަތު އޮތް ކަމަށެވެ. އެހެންނަމަވެސް، އެކަން ޔަގީންކަމާއެކު ބުނެވެން ނެތް ކަމަށް ވެސް އޭނާ ވިދާޅުވިއެވެ.
މި މަޝްވަރާތަކުގައި އެމެރިކާގެ އިތުރުން ޤަޠަރާއި މިޞްރު ވެސް ބައިވެރިވެއެވެ. އަދި ދޯހާގައި ކުރިއަށްދާ މަޝްވަރާތަކުގައި އިޒްރޭލުގެ އިސް އޮފިޝަލުން ވެސް ބައިވެރިވެއެވެ.
ހަމާސްގެ އިސް ފަރާތަކުން ރޮއިޓަރސްއަށް ވިދާޅުވެފައިވަނީ މަޝްވަރާތަކުގައި ކުރިއެރުންތަކެއް ލިބިފައިވާ ކަމަށެވެ. އަދި ބަންދުގައި ތިބި ފަލަސްޠީނު އަސީރުންނާއި ޣައްޒާގައި ހިފަހައްޓާފައިވާ އިޒްރޭލީ އަސީރުން ދޫކޮށްލުމުގެ މައްސަލަ ވެސް މަޝްވަރާތަކުގައި ހިމެނޭ ކަމަށް އެ ފަރާތުން ވިދާޅުވިއެވެ.
އެހެންނަމަވެސް، އިޒްރޭލުގެ ބައެއް އިސް ސިޔާސީ ފަރާތްތަކުން މި އެއްބަސްވުމާ ދެކޮޅު ހަދަމުންދާކަން ފާހަގަކުރެވެއެވެ. އަދި އެއްބަސްވުމަކަށް ވާސިލްވެއްޖެނަމަ ސަރުކާރުން ވަކިވާނެ ކަމަށް ވެސް އެ ފަރާތްތަކުން ބުނެއެވެ.
