ޚަބަރު
ޢުމްރާގެ ނަމުގައި ޓިކެޓަށް ޑޮލަރު ހޯދި މައްސަލައެއް ބަލަންފަށައިފި

އުމްރާގެ އަޅުކަމަސް ފުރާފައިވާ ދިވެހީން ފޮޓޯ:ހައްޖު ކޯޕަރޭޝަން
އިސްލާމީ ކަންތައްތަކާ ބެހޭ ވަޒީރު ޑރ. މުޙައްމަދު ޝަހީމް ޢަލީ ސަޢީދު ވިދާޅުވެފައިވަނީ ޢުމްރާއަށް މީހުން ގެންދިއުމަށް ދޫކޮށްފައިވާ ރަސްމީ ލައިސަންސް ބޭނުންކޮށްގެން، އެމްއެމްއޭއިން ޓިކެޓަށް ދޫކުރާ ޑޮލަރު އޮޅުވާލައިގެން ހޯދާފައިވާކަމަށް ތުޙުމަތުކުރެވޭ މައްސަލައެއް ބަލަމުންދާ ކަމަށެވެ.
ވަޒީރު މި މަޢުލޫމާތު ހާމަކުރެއްވީ ޢުމްރާގެ އަޅުކަމަށް މީހުން ގެންދިއުމާއި ގުޅޭގޮތުން ހުރި މައްސަލަތަކާއި ގްރޫޕްތަކުން އުސޫލާ އެއްގޮތަށް ޢަމަލުކުރަމުންދޭތޯ ބެލުމަށް އިސްލާމީ ކަންތައްތަކާ ބެހޭ ވުޒާރާއިން ފަށާފައިވާ މަސައްކަތުގެ ތެރެއިންނެވެ. މި މަސައްކަތް ހަރުދަނާކޮށްފައިވަނީ، ޢުމްރާއަށް މީހުން ގެންދިއުމުގައި އިޙުމާލުގެ ގިނަ މައްސަލަތަކެއް ފެންމަތިވަމުންދާތީއެވެ.
ވަޒީރުގެ ވާހަކަފުޅުގައި، ޢުމްރާއަށް މީހުން ގެންދިއުމަށް އެ ވުޒާރާއިން ދީފައިވާ ރަސްމީ ލައިސަންސް ދައްކައިގެން ޢުމްރާއަށް ފުރަން ކަމަށް ހަދައި އެމްއެމްއޭ އިން ޑޮލަރު ނަގާ، ނަމަވެސް ޢުމްރާއަށް ގޮސްފައި ނުވާކަމަށް ބެލެވޭ ގްރޫޕެއްގެ މައްސަލައެއް ފާހަގަވެފައިވާކަމަށް ވިދާޅުވިއެވެ.
އިސްލާމީ ކަންތައްތަކާ ބެހޭ ވުޒާރާއަށް މި މައްސަލަ ސާބިތުވެއްޖެނަމަ، އެ ކުންފުނި 30 ހާސް ރުފިޔާއިން ޖޫރިމަނާކޮށް، ހުއްދަ ހިފަހައްޓައި، މައްސަލަ ތަޙްޤީޤުކުރަން ފުލުހުންނަށް ހުށައަޅާނެކަމަށް ވަޒީރު ވިދާޅުވިއެވެ. މީގެ އިތުރުން، ޢުމްރާއަށް މީހުން ގެންދިއުމުގައި އަމަލުކުރަން ގެޒެޓް ކޮށްފައިވާ އުޞޫލަށް އަމަލު ނުކުރާ 19 ކުންފުންޏެއް 5000 ރުފިޔާއިން ޖޫރިމަނާކޮށްފައިވާކަމަށްވެސް ވަޒީރު ހާމަކުރެއްވިއެވެ.
ޢުމްރާއަށް މީހުން ގެންދިޔުމުގެ އުޞޫލްގައިވާގޮތުން، އެއްބަސްވުމާ ޚިލާފުވާ ފަރާތްތައް 1،000 ރުފިޔާއާއި 100،000 އާ ދެމެދުގެ އަދަދަކުން ޖޫރިމަނާ ކުރުމުގެ އިޚުތިޔާރު އިސްލާމީ ކަންތައްތަކާ ބެހޭ ވުޒާރާއަށް ލިބިގެންވެއެވެ. އަދި ހުއްދަ ނެތި ޢުމްރާއަށް މީހުން ގެންދިޔުމުގެ އެއްވެސް ޢަމަލެއް ހިންގާ ފަރާތްތައް 100،000 އާއި 500،000 ރުފިޔާއާ ދެމެދުގެ އަދަދަކުން ޖޫރިމަނާ ކުރެވޭނެއެވެ.