ޚަބަރު
ރާއްޖޭގައި އިންވެސްޓްކުރެވެން ހުރި ފުރުސަތުތަކާ ގުޅޭގޮތުގެ އަޒަރުބައިޖާނުގެ ވަފުދަށް މަޢުލޫމާތުދީފި

ފޯރަމްގައި މިނިސްޓްރީ އޮފް އިކޮނޮމިކް ޑިވެލޮޕްމެންޓް އެންޑް ޓްރޭޑްގެ ފަރާތުން ޕްރެޒެންޓޭޝަން ހުށަހަޅުއްވަނީ، ފޮޓޯ: މިނިސްޓްރީ
ހުލާސާ
މި ފޯރަމް އިންތިޒާމްކުރި ފޮރިން މިނިސްޓްރީއިން ހާމަކޮށްފައިވާ ގޮތުން، މިއީ އިޤްތިޞާދީ ގޮތުން ދެ ޤައުމުގެ ގުޅުން ބަދަހިވެގެންދިޔަ ފޯރަމެއް.
ރާއްޖޭގައި އިންވެސްޓްކުރެވެން ހުރި ފުރުސަތުތަކާ ގުޅޭގޮތުގެ އަޒަރުބައިޖާނުގެ ވަފުދަށް މަޢުލޫމާތުދީފިއެވެ.
އަޒަރުބައިޖާން ސަރުކާރު ތަމްސީލްކުރައްވާ މަތީ ފަންތީގެ މި ވަފުދަށް މަޢުލޫމާތު ހިއްސާކޮށްފައިވަނީ، އެ ބޭފުޅުންނަށް އަމާޒުކޮށްގެން ފޮރިން މިނިސްޓްރީގައި ބޭއްވި ފޯރަމެއްގައި، މިނިސްޓްރީ އޮފް އިކޮނޮމިކް ޑިވެލޮޕްމެންޓް އެންޑް ޓްރޭޑް (އެމްއީޑީޓީ)ގެ ފަރާތުންނެވެ.
އެގޮތުން، އެމްއީޑީޓީގެ ފަރާތުން ހުށަހެޅި ޕްރެޒެންޓޭޝަންގައި ރިއަލް އެސްޓޭޓާއި، އިމާރާތްކުރުމާއި، ފަތުރުވެރިކަމާ އަދި ހަކަތައިގެ ދާއިރާއިން ރާއްޖޭގައި އިންވެސްޓުކުރުމަށް ހުރި ފުރުސަތުތަކުގެ މަޢުލޫމާތު ޙިއްސާކޮށްފައިވާނޭކަމަށް އެ މިނިސްޓްރީ ވަނީ ހާމަކޮށްފައެވެ.
MEDT presented key investment opportunities in real estate, infrastructure, construction, tourism, and energy at the information forum hosted for the visiting high-level delegation from Azerbaijan. @azpromoaz @AzerbaijanMFA pic.twitter.com/dh2NpP137K
— Ministry of Economic Development and Trade (@MoEDmv) January 14, 2025
މި ފޯރަމް އިންތިޒާމްކުރި ފޮރިން މިނިސްޓްރީއިން ހާމަކޮށްފައިވާ ގޮތުގައި، އެ ފޯރަމަކީ އިޤްތިޞާދީ ގޮތުން ދެ ޤައުމުގެ ގުޅުން ބަދަހިވެގެންދިޔަ ފޯރަމެކެވެ. އަދި ކުރިއަށް އޮތްތަނުގައިވެސް ގުޅިގެން މަސައްކަތްކުރުމުގެ ދޮރުތައް މި ފޯރަމްގެ ސަބަބުން ހުޅުވުނުކަމަށް އެ މިނިސްޓްރީއިން ވަނީ ފާހަގަކޮށްފައެވެ.
މި ފޯރަމް ހުށަހަޅާދީފައިވަނީ ފޮރިން މިނިސްޓްރީގެ އެމްބެސެޑަރ އެޓް ލާޖްގެ މަޤާމުގައި ހުންނެވި ޢަބްދުﷲ ހަމީދެވެ. އެމްބެސެޑަރގެ ވާހަކަފުޅުގައި، އެ ފޯރަމްގެ ސަބަބުން ދެ ޤައުމުގެ ދެމެދުގައި އޮތް އިޤްތިޞާދީ ގުޅުން އިތުރަށް ބަދަހިކުރުމަށް އިތުރު ދޮރުތަކެއް ހުޅުވިގެން ދިޔަކަން ވަނީ ފާހަގަކޮށްފައެވެ.
އަޒަރުބައިޖާނުގެ ޑެޕިއުޓީ ފޮރިން މިނިސްޓަރު އެލްނޫރު މަމަދޮވް އިސްކޮށް ހުންނަވައިގެން ރާއްޖެއަށް ކުރައްވާ ރަސްމީ ދަތުރުފުޅުގައި އަޒަރުބައިޖާން ސަރުކާރުގެ ވުޒާރާތަކުގެ އިސް ބޭފުޅުންނާއި، އަޒަރުބައިޖާންގެ އެކްސްޕޯޓް އެންޑް އިންވެސްޓްމަންޓް ޕްރޮމޯޝަން އޭޖެންސީ (އަޒްޕްރޯމޯ)ގެ އިސްވެރިންނާއި، ޕްރައިވެޓް ސެކްޓާގެ މަންދޫބުން ހިމެނިވަޑައިގަންނަވައެވެ. މި ވަފުދުގެ ދަތުރުފުޅު ނިންމަވާލެއްވުމަށް ހަމަޖެހިފައިވަނީ މި މަހުގެ 16 ވަނަ ދުވަހުއެވެ.