މާޒިޔާއަށް ސްޕެއިންގެ ކޯޗަކު ހަމަޖައްސައިފި

ދިވެހި ޕްރިމިއަރ ލީގު އެންމެ ފަހުން ކާމިޔާބުކުރި މާޒިޔާ ސްޕޯޓްސް އެންޑް ރެކްރިއޭޝަންގެ ކޯޗަކަށް، ސްޕެއިންގެ ލުއިސްމާ ހެނާންޑޭޒް ހަމަޖައްސައިފިއެވެ. މާޒިޔާއިން މިކަން އިޢުލާންކޮށްފައިވަނީ، އަންގާރަ ދުވަހު ގަލޮޅު ފުޓުބޯޅަ ދަނޑުގު ވީއައިޕީ ރޫމްގައި އޮތް ނޫސްވެރިންގެ ބައްދަލުވުމުގައެވެ.

މި މަގާމަށް ހެނާންޑޭޒް މި އައްޔަންކުރީ، އެ މަގާމުގައި ކުރިން ހުރި ސާބިއާގެ ޑްރަގަން ޑުކަނޯވިޗްގެ އެގްރީމެންޓު ހަމަވުމާ ގުޅިގެންނެވެ. މިދިޔަ އޯގަސްޓްމަހު ޑުކަނޯވިޗް މާޒިޔާއާ ހަވާލުވުމަސްފަހު އޭނާގެ ބެލުމުގެ ދަށުން އެ ޓީމު ވަނީ އޭއެފްސީ ޗެލެންޖު ކަޕްގައި ވާދަކޮށްފައެވެ. އަދި އޭގެ ފަހުން ދިވެހި ފުޓުބޯޅަ ސީޒަނަށް ތައްޔާރުވުމަށް އެ ޓީމުން ފަރިތަކުރުންތައް ފެށި ނަމަވެސް، އެފްއޭއެމްގެ ޑްރާފްޓް ކަލަންޑަރާ އެއްގޮތަށް ސީޒަން ފެށުމުގެ ކަންކަން ކުރިޔަށް ނުދާތީ ފަރިތަކުރުންތައް ވަނީ މެދުކަނޑާލާފައެވެ.

މާޒިޔާއާ އަލަށް ހަވާލުވި އުމުރުން 52 އަހަރުގެ ހެނާންޑޭޒް މީގެ ކުރިން ވަނީ ސްޕެއިން އާއި، ލިތުއޭނިއާ އާއި، އުޒްބެކިސްތާނާއި، ކުވެއިތު އަދި ދެކުނު ކޮރެއާގައި ފުޓްބޯޅައިގެ ގިނަ މަސައްކަތްތަކެއް ކޮށްފައެވެ. އެގޮތުން ބާސެލޯނާގެ ޓެނެރީފްއަށް ކަނއަޅާފައިވާ ޓެކްނިކަލް އެކެޑަމީ އާއި ރެއާލް މެޑްރިޑްގެ އިންޓަރނޭޝަނަލް ފައުންޑޭޝަން މަޝްރޫއުގައި މަސައްކަތް ކުރުމުގެ އިތުރުން އޭނާ ވަނީ ލިތުއޭނިއާ އާއި، އުޒްބެކިސްތާނާއި، ކުވެއިތު އަދި ދެކުނު ކޮރެއާގެ ޕްރިމިއަރ ލީގުގެ ކުލަބުތަކަށް ކޯޗުކަން ކޮށްދީފައެވެ. 

ނޫސްވެރިންނާ ވާހަކަދައްކަމުން ހެނާންޑޭޒްބުނީ، އޭނާ އެ މަގާމާ ހަވާލުވީ ރާއްޖޭގެ ފުޓުބޯޅައިގެ ހާލަތު އެނގިގެން ކަމަށާއި އަދި އޭނާގެ އުއްމީދަކީ މާޒިޔާ އާއި ރާއްޖޭގެ ޤައުމީ ފުޓުބޯޅަ ޓީމަށް އެހީތެރިވެދިނުން ކަމުގައެވެ.

އެފްއޭއެމްއާ ހަވާލުވި ނޯމަލައިޒޭޝަން ކޮމެޓީއިން މިހާރު ނިންމާފައިވާ ގޮތުން، ދިވެހި ފުޓުބޯޅަ ސީޒަން ފަށާނީ ފެބުރުއަރީ މަހުގެ 14 ވަނަ ދުވަހުއެވެ. އެ ދުވަހު ކުޅޭނީ ޗެރިޓީ ޝީލްޑް މެޗެވެ. އަދި ޕްރެޒިޑެންޓްސް ކަޕް  ފެބުރުއަރީ 17 ގައި ފެށުމަށްފަހު، ދިވެހި ޕްރިމިއަރ ލީގު ފަށާނީ ރޯދަ މަހުގެ ފަހުން، އޭޕްރީލް 8 ގައެވެ. 

ރާއްޖޭގެ ފުޓުބޯޅަ ސީޒަން މެދުކެނޑިފަ އޮންނަތާ މިހާރު އަހަރަކަށް ވުރެން ގިނަ ދުވަސްވެއްޖެއެވެ.