ފަރެސްމާތޮޑާގައި ލަންކާގެ އައިކޭމްޕެއް:400 އައިނު ހިލޭ ދޫކުރަނީ

ފަރެސްމާތޮޑާގައި ލަންކާގެ ބިޒްނަސް ކައުންސިލާއި ފަރެސްމާތޮޑާ ކައުންސިލް ގުޅިގެން އައިކޭމްޕެއް ބޭއްވުމަށް ނިންމައިފިއެވެ. މި ހަފްތާގެ ބުދަ އަދި ބުރާސްފަތި ދުވަހު ބޭއްވުމަށް ހަމަޖެހިފައިވާ މި ކޭމްޕުގައި ލޯ ޓެސްޓް ކުރުމާއި، ނަންބަރު ނެގުމުގެ ޚިދުމަތުގެ އިތުރުން އެއްވެސް އަގަކާނުލައި ނަންބަރު އައިނު ހެދުމުގެ ޚިދުމަތް ފޯރުކޮށްދޭނެއެވެ.

ލަންކާ މޯލްޑިވްސް ބިޒްނަސް ކައުންސިލްގެ ރައީސް ސުދޭޝް މެންޑިސް ވިދާޅުވި ގޮތުގައި މި ކޭމްޕުގެ ދަށުން ގާތްގަނޑަކަށް 400 އައިނު ދިނުމަށް ހަމަޖެހިފައިވެއެވެ. އަދި ލޮލުގެ އިތުރުން ކަންފަތް ސްކްރީން ކުރުމުގެ ޚިދުމަތްތައްވެސް ފޯރުކޮށްދޭނެއެވެ.

އަޅުގަނޑުމެން މި ރާވަނީ މިރަށުގެ ރައްޔިތުންނަށް ގާތްގަނޑަކަށް 400 ވަރަކަށް އައިނު ދިނުމަށް. މި ކޭމްޕުގައި އަޅުގަނޑުމެން ކޮންމެ މީހަކުވެސް ޗެކްކޮށް، އެމީހުންގެ މައްސަލަތަކަށް ބަލާއި އެކަމަށް އެންމެ އެކަށޭނެ ފަރުވާދޭނަން. ހަމައެކަނި ލޮލުގެ އައިނެއް ނޫން، އަޅުގަނޑުމެން އެމީހުންނަށް ކަންފަތާ ގުޅުންހުރި ފަރުވާތައްވެސް ދޭނަން. އަދި ކަންފަތުގެ އަޑުއިވުމުގެ މައްސަލަ ހުންނަ ފަރާތްތަކަށް އަޑުއިވުމުގެ ވަސީލަތްތައް ވެސް ދޭނަން

ސުދޭޝް

 މި ކޭމްޕުގައި ލަންކާގެ ލޮލުގެ ޚާއްސަ 4 ޑޮކްޓަރަކާއި 2 ޓެކްނީޝަނުން ބައިވެރިވެވަޑައިގަންނަވާނެއެވެ. ލަންކާގެ ބިޒްނަސް ކައުންސިލްގެ ފަރާތުން ވަޑައިގެންނެވި ޑޮކްޓަރ ވިކްރަމަޝީ ވިދާޅުވީ، މި އައިކޭމްޕްގައި އެރަށުގެ ސިއްޙީ މަރުކަޒުގައި މަސައްކަތްކުރައްވާ ބޭފުޅުންނަށް ލޯ ސްކްރީން ކުރާނެގޮތް ދަސްކޮށްދޭނެ ކަމަށެވެ.

 ފަރެސްމާތޮޑާ ދާއިރާގެ މަޖިލިސް މެމްބަރު އަޝްރަފް ރަޝީދު ވިދާޅުވީ، މި އައި ކޭމްޕަކީ މިދިޔަ އަހަރު ފަރެސްމާތޮޑާ ކައުންސިލުން ލަންކާއަށް ކުރި ރަސްމީ ދަތުރުފުޅެއްގައި އެބޭފުޅުންނާއެކު ކުރެވުނު މަޝްވަރާގެ ތެރެއިން ބޭއްވުމަށް ހުށަހެޅި ޕްރޮގްރާމެއްކަމަށެވެ. މި ކޭމްޕްގެ އަމާޒަކީ ލޮލުގެ ފަރުވާ ހޯދަން ބޭނުންވެފައިތިބި ފަރެސްމާތޮޑާގެ ވީހާވެސް ގިނަ ރައްޔިތުންނަށް ލުއިފަސޭހަކަމާއެކު މި ޚިދުމަތް ފޯރުކޮށްދިނުންކަމަށް މެމްބަރު ފާހަގަކުރެއްވިއެވެ.