ކުޅިވަރު
ބަދަލު ކުޅުންތެރިންގެ އެހީއާއެކު ލިވަޕޫލުން ފޮރެސްޓާ ދެކޮޅަށް ޕޮއިންޓެއް ހޯދައިފި

މެޗުގައި ލިވަޕޫލްކޮޅަށް ގޯލް ކާމިޔާބުކުރި ކްރިސް ވުޑްސް / ފޮޓޯ: ގެޓީ އިމޭޖަސް
ހުލާސާ
ފޮރެސްޓުން މި މެޗުގައި 59 ބޯޅަ ކްލިއަރކުރަން ޖެހުނުއިރު މިއީ ލެސްޓަރ ސިޓީ (63)އަށްފަހު ޕްރިމިއަރ ލީގު މެޗެއްގައި ޓީމަކުން އެންމެ ގިނަ ބޯޅަ ކްލިއަރކުރަން ޖެހުނު މެޗު.
އިންގްލިޝް ޕްރިމިއަރ ލީގުގެ މި ސީޒަންގައި ތަފާތު ކުޅުމެއް ދައްކަމުން އަންނަ ނޮޓިންހަމް ފޮރެސްޓާ ދެކޮޅަށް ލިވަޕޫލުން ކުޅުނު މެޗުގައި ބަދަލު ކުޅުންތެރިންގެ ގޮތުގައި ކުޅެން ނިކުތް ޑިއޭގޯ ޖޯޓާ އާއި ކޮސްޓާސް ސިމިކާސްގެ އެހީތެރިކަމާއެކު، އެ ޓީމުން ޕޮއިންޓެއް ހޯދައިފިއެވެ.
މި ދެ ޓީމު ސެޕްޓެމްބަރުގައި ކުޅުނު މެޗު 1-0 އިން ފޮރެސްޓު ކާމިޔާބުކޮށްފައިވާއިރު، މެޗުގެ ފަހު ކުއާޓާއާ ހަމައަށް ދިޔައިރު ވެސް ބެލެވުނީ، ލީގުގެ އެންމެ ކުރީގައި އޮތް ލިވަޕޫލް ދެވަނަ ފަހަރަށް މި ސީޒަންގައި ފޮރެސްޓުން ބަލިކުރާނެ ކަމަށެވެ. އެ ޓީމުން ޑިފެންސް ކުރަމުންދިޔައީ އެހާ ވެސް ރަގަޅަށެވެ. ނަމަވެސް، ނަތީޖާ ބަދަލުކުރުމަށް ލިވަޕޫލްގެ އާނޭ ސްލޮޓު ކުރަމުންދިޔަ މަސައްކަތަށް ހިއްވަރެއް ލިބުނީ، އޭނާ ގެނައި ބަދަލުތަކުގެ ސަބަބުން ކާމިޔާބު ކުރެވުނު ގޯލުންނެވެ.
ފޮރެސްޓުގެ ދަ ސިޓީ ގްރައުންޑްގައި ކުޅުނު މި މެޗުގައި ނޫނޯ އެސްޕިރީތޯ ސަންތޯސްގެ ޓީމުން ލީޑު ނެގީ 8 ވަނަ މިނެޓުގައެވެ. އެލާންގާގެ ޕާހަކުން މި ގޯލު ކާމިޔާބުކުރީ އެ ޓީމުގެ ނިއު ޒީލޭންޑް ފޯވާޑް، ކްރިސް ވުޑްސްއެވެ. އެއީ އޭނާ މި ސީޒަންގައި ކާމިޔާބުކުރި 13ވަނަ ގޯލެވެ.
މި މެޗުގައި ލިވަޕޫލުން ގޯލު ޖެހުމަށް ތަނަވަސްކުރި ފުރުސަތުތައް ދިފާއުކުރުމުގައި އެ ޓީމުގެ ގޯލްކީޕަރު، މެޓްސް ސެލްޒް ވަނީ މޮޅު ކުޅުމެއްދައްކާފައެވެ. އޭނާއަށް ގޯލު ދިފާއުކުރުމުގައި އެންމެ ބޮޑު އެހީތެރިކަމެއް ލިބުނީ އެ ޓީމުގެ ފަހަތަށް ކުޅޭ މުރީލޯ އާއި ނިކޮލާ މިލެންކޮވިޗްގެ ފަރާތުންނެވެ.
އެގޮތުން މުޅި މެޗުގައި މުރީލޯ 18 ބޯޅަ ކްލިއަރކޮށްފައިވާއިރު، މިއީ މި ސީޒަންގެ މެޗެއްގައި އެއް ކުޅުންތެރިއަކު އެންމެ ގިނަ ބޯޅަ ކްލިއަރކުރި މެޗެވެ. އަދި މުޅި ފޮރެސްޓުން މި މެޗުގައި 59 ބޯޅަ ކްލިއަރކޮށްފައި ވެއެވެ. މިއީ ލެސްޓަރ ސިޓީ (63)އަށްފަހު ޕްރިމިއަރ ލީގު މެޗެއްގައި ޓީމަކުން އެންމެ ގިނަ ބޯޅަ ކްލިއަރކުރަން ޖެހުނު މެޗު ވެސް މެއެވެ.
ލިވަޕޫލުން މެޗުގެ ނަތީޖާ ހަމަހަމަކުރީ، އެންޑީ ރޮބަޓްސަން އާއި އިބްރާހިމާ ކޮނާޓޭގެ ބަދަލުގައި ކުޅެން ނިކުތް ދެ ކުޅުންތެރިންނެވެ. މީގެ ތެރެއިން ޑިފެންސަށް ކުޅޭ ކޮނާޓޭގެ ބަދަލުގައި ކުޅެން އެރުވީ ކުރިޔަށް ކުޅޭ ޖޯޓާއެވެ.
މި ކުޅުންތެރިން ކުޅެން ނިކުތްތާ މަދު ސިކުންތު ކޮޅެއްގެ ތެރޭގައި ލިވަޕޫލަށް ލިބުނު ކޯނަރު ނެގީ ސިމިކާސްއެވެ. އަދި އެ ބޯޅަ ގޯލަށް ފޮނުވާލީ ޖޯޓާއެވެ.
މި ނަތީޖާއާއެކު ފޮރެސްޓު ލީގުގެ ދެވަނައަށް ކުރިޔަށްޖެހިލާފައިވާއިރު، ލިވަޕޫލް އޮތީ 6 ޕޮއިންޓުގެ ލީޑެއްގައެވެ.