ސްޓެލްކޯގެ މުވައްޒަފަކަށް ހަމަލާދީ މާރާމާރީ ހިންގި މައްސަލައިގައި ފިރިހެނަކު ހައްޔަރުކޮށްފި

ހުޅުމާލެ ފޭސް 2 ގައި ހުރި ސްޓެލްކޯގެ ޓްރާންސްފޯމަރަކަށް ގެއްލުން ދިނުމަށް އުޅެނިކޮށް، އެކަން ހުއްޓުވަން މަސައްކަތްކުރި މުވައްޒަފަކަށް ހަމަލާދީ މާރާމާރީ ހިންގި މައްސަލައިގައި ފިރިހެނަކު ފުލުހުންގެ ބެލުމުގެ ދަށަށް ގެނެސްފިއެވެ.

ފުލުހުންގެ ބެލުމުގެ ދަށަށް ގެނެވުނު ފަރާތަކީ ށ. ބިލެއްފަހި، ޗަންބޭލީގޭ، އިބްރާހިމް ޒާލިފް (37 އަހަރު) އެވެ. އޭނާ ފުލުހުންގެ ބެލުމުގެ ދަށަށް ގެނެވުނީ 2025 ވަނަ އަހަރުގެ ޖަނަވަރީ މަހުގެ 14 ވަނަ ދުވަހުގެ ރޭ 21:43 ގައެވެ.

މި ހާދިސާ ހިނގާފައިވަނީ ހުޅުމާލެ ފޭސް 2 ގައި ހުންނަ ރީތިގަސްމަގު ބްރިޖް ކައިރީގައި ހުރި ސްޓެލްކޯގެ ޓްރާންސްފޯމަރަކަށް ގެއްލުން ދޭން އުޅެނިކޮށެވެ. މި ޢަމަލު ހުއްޓުވަން އުޅުނު ސްޓެލްކޯގެ މުވައްޒަފަކަށް ހަމަލާދީ މާރާމާރީ ހިންގާފައިވެއެވެ.

ފުލުހުން މިހާރު މި މައްސަލަ ގެންދަނީ ތަޙުޤީޤު ކުރަމުންނެވެ.