ދުނިޔެ
ޢައްޒާގެ "ރައްކާތެރި ސަރަޙައްދު" ތަކަށް ޔަހޫދީން ދަނީ ހަމަލާދެމުން

ްާޢައްޒާގެ ކޭމްޕެއް ހުންނަ ސަރަޙައްދު ފޮޓޯ:އިންޓަނެޓް
މިދިޔަ މޭ މަހުން ފެށިގެން، އިސްރާއީލުގެ ސިފައިން ޢައްޒާގެ ރައްޔިތުންނަށް "ރައްކާތެރިކަމަށްޓަކައި" ދިއުމަށް އަންގާފައިވާ ސަރަޙައްދަށް 97 ހަމަލާ ދީފައިވާކަމަށް ބީބީސީ ވެރިފައިގެ ދިރާސާއަކުން ހާމަވެއްޖެއެވެ. މި ހޯދުންތައް ހާމަވެފައިވަނީ އިސްރާއީލާއި ހަމާސްއާ ދެމެދު ހިނގަމުންދާ ހަނގުރާމަ ހުއްޓުވުމަށް ކުރެވޭ މަސައްކަތްތައް ކުރިއަށްދާ ދަނޑިވަޅެއްގައެވެ.
"އިންސާނީ ސަރަޙައްދު" ގެ ނަމުގައި މި ސަރަޙައްދު ފުރަތަމަ ކަނޑައެޅީ އިސްރާއީލުގެ ދިފާއީ ބާރުތަކުން (އައިޑީއެފް) 2023 ވަނަ އަހަރުގެ އޮކްޓޯބަރު މަހުގައެވެ. މިއީ ރައްޔިތުން "ރައްކާތެރިކުރުމަށް" އަދި "މަސްހުނިވެފައިވާ ސިވިލް ރައްޔިތުން ނުރައްކަލުން ދުރުކުރުމަށް" ކުރި ކަމެއް ކަމަށް ބުނެފައިވެއެވެ. 2024 ވަނަ އަހަރުގެ މޭ 6 ވަނަ ދުވަހު، އައިޑީއެފްއިން މި ސަރަޙައްދު ފުޅާކޮށް، ޚާން ޔޫނިސްއާއި ދެއިރް އަލް-ބަލާހް ސިޓީތައް ވެސް މީގެ ތެރެއަށް ވައްދާފައިވެއެވެ.
މި ސަރަޙައްދަކީ މެޑިޓަރޭނިއަން ކަނޑުގެ އައްސޭރިފަށުގައިވާ ބިމެއް ކަމަށްވެފައި، ބައިނަލްއަޤްވާމީ އިންސާނީ ޖަމްއިއްޔާތަކުގެ އަންދާޒާގައި މިލިއަނަކަށްވުރެ ގިނަ މީހުން ދިރިއުޅޭ ތޮއްޖެހިފައިވާ ސަރަޙައްދެކެވެ. ގިނަ މީހުން ދިރިއުޅެމުންދަނީ ޓެންޓުތަކުގައި ކަމަށާއި، އަސާސީ ވަސީލަތްތަކާއި އެހީތެރިކަން ލިބުން ވަރަށް މަދުކަމަށް ވެސް ބުނެވެއެވެ.
ބީބީސީ ވެރިފައިއަށް އައިޑީއެފްއިން ދީފައިވާ ބަޔާނެއްގައި ބުނެފައިވަނީ، "އިންސާނީ ސަރަޙައްދު" ގައި ހަރަކާތްތެރިވާ ހަމާސްގެ ހަނގުރާމަވެރިންނަށް އަމާޒުކޮށް ހަމަލާދެމުންދާ ކަމަށެވެ. އަދި ހަމާސްއިން ބައިނަލްއަޤްވާމީ ޤާނޫނާ ޚިލާފަށް ސިވިލް ރައްޔިތުން "އިސްތިޣްލާލުކޮށް" އިންސާނީ ދަލުގެ ގޮތުގައި ބޭނުންކުރަމުންދާ ކަމަށާއި، މި ސަރަޙައްދުން ރޮކެޓް ދޫކުރަމުންދާ ކަމަށް ތުހުމަތުކޮށްފައިވެއެވެ.
2023 ވަނަ އަހަރުގެ އޮކްޓޯބަރު 7 ވަނަ ދުވަހު ހަމާސްއިން ދިން ހަމަލާގައި 1،200 އެއްހާ މީހުން މަރުވެ، 251 މީހުން ރަހީނުކުރި ކަމަށް ބުނެ، އިސްރާއީލުން ހަމާސް ނައްތާލުމުގެ ހަނގުރާމައެއް ފަށާފައިވެއެވެ. މި ހަނގުރާމައިގެ ސަބަބުން ޢައްޒާގެ އަސާސީ ވަސީލަތްތަކަށް ބޮޑެތި ގެއްލުންތައް ލިބި، ގިނަ ސަރަޙައްދުތަކެއް ވަނީ ވީރާނާވެފައެވެ. ހަމާސްގެ ބެލުމުގެ ދަށުގައިވާ ސިއްޙީ ވުޒާރާއިން ބުނާ ގޮތުގައި މި ހަނގުރާމަ ފެށުނީއްސުރެ ޢައްޒާގައި 46،600 އަށްވުރެ ގިނަ މީހުން މަރުވެފައިވެއެވެ.
ބީބީސީ ވެރިފައިގެ ދިރާސާއިން ދައްކާގޮތުގައި 2024 ވަނަ އަހަރުގެ މޭ މަހުން ފެށިގެން "އިންސާނީ ސަރަޙައްދު" އަށް ދެވޭ ހަމަލާތައް އިތުރުވެފައިވެއެވެ. މި މަހުގެ ތެރޭގައި މިހާތަނަށް މަދުވެގެން 22 ހަމަލާ ދެވިފައިވާކަން ފާހަގަކުރެވެއެވެ.
ލޯކަލް މީޑިއާތަކުގެ ރިޕޯޓުތަކުން ދައްކާގޮތުގައި ބީބީސީ ވެރިފައިއިން މެޕްކޮށްފައިވާ 97 ހަމަލާގައި 550 އަށްވުރެ ގިނަ މީހުން މަރުވެފައިވެއެވެ.
ނަމަވެސް، ބީބީސީ ވެރިފައިއަށް މި ހުރިހާ ހާދިސާއަކީ އައިޑީއެފްގެ ހަމަލާތަކެއްކަން ޔަގީންކުރެވިފައެއް ނުވެއެވެ. އިސްރާއީލުގެ ސިފައިންގެ އިސްވެރިން މޭ 6 އިން ފެށިގެން 28 ހަމަލާއެއް ދިންކަން ޢާންމުކޮށް އިޢުތިރާފުވެފައިވީ ނަމަވެސް، ބީބީސީ ވެރިފައިއިން ލިޔެކިޔުމުން ފާހަގަކޮށްފައިވާ އެހެން ހަމަލާތަކުގައި ބައިވެރިވިކަން ކަށަވަރުކޮށްދީފައެއް ނުވެއެވެ.