މިއަހަރުގެ ޅެންވެރީންގެ ދުވަސް ތަޚްސީސްކުރައްވަނީ އެންމެންގެ ލޯބި ހޯއްދަވާފައިވާ ސޯދުބެ

ކޮންމެ އަހަރެއްގެ ޖެނުއަރީ މަހުގެ 15 ވަނަ ދުވަހު ފާހަގަކުރާ ޅެންވެރީންގެ ދުވަސް މިއަހަރު ތަޚްސީސްކުރެވެނީ މަޝްހޫރު ޅެންވެރިޔާ ޢަބްދުﷲ ޞާދިޤު (ސޯދުބެ) އަށެވެ. ދިވެހިބަހުގެ އެކެޑެމީން ހާމަކުރައްވާފައިވާ ގޮތުގައި މިއަހަރުގެ ޝިއާރަކީ "އަހަންނަކީ ދިވެއްސަކީން،ދިވެހި އުޅުމުގެ ވެއްސަކީން" އެވެ.

ހ. އާމުލީގެ ނިޝާން ޢިއްޒުއްދީންގެ ޢިއްޒަތުގެ ވެރިޔާ ސޯދުބެއަކީ މިފަހުން އުފެދުނު ދިވެހި ބަހުގެ އުސްތާޛެކެވެ. އޭނާގެ ޅެންތަކުގައި ފުން މާނަ އެކުލެވޭ ވާހަކަތައް ވަރަށް ސާދާކަމާއެކު ގެނެސްދީފައިވާކަން ފާހަގަކުރެވެއެވެ. "ދެންވެސް ކިޔަނީ އިސްލާމުންނޭ" އަދި "ނޭނގޭ ބާރު" ފަދަ ޅެންތަކަކީ މީގެ ހެއްކެވެ.

ޅެންވެރިޔާ ޢަލީ މުސްޠަފާގެ އަރިހުން ދަރިވަރުވެ، މަދަރުސީ ހަޔާތުގައި ފުރަތަމަ ފަހަރަށް ޅެމެއް ހެއްދެވި ސޯދުބެއަކީ މިފަހުން އުފެދުނު އެންމެ އުފެއްދުންތެރި އަދީބުންގެ ތެރެއިން ބޭފުޅެކެވެ. އޭނާގެ ޚިދުމަތް އަގުވަޒަންކޮށް، 1992 ވަނަ އަހަރު ދިވެހި ޅެންވެރިކަމުގެ ރޮނގުން ޢާންމު ޚިދުމަތުގެ ހިތްވަރު ދިނުމުގެ އިނާމު ލިބިވަޑައިގަތެވެ. އަދި 2019 ވަނަ އަހަރު ނިޝާން ޢިއްޒުއްދީންގެ ޢިއްޒަތުގެ ވެރިކަމުގެ ލަޤަބު ވަނީ އަރުވާފައެވެ.

ޅެންވެރީންގެ ދުވަސް ރާއްޖޭގައި ފާހަގަކުރަން ފެށީ 1989 ވަނަ އަހަރުއެވެ. މިދުވަސް ފާހަގަކުރުމުގެ ބޭނުމަކީ ދިވެހި ޝާޢިރިއްޔާތުގެ ދުނިޔެއަށް ޚިދުމަތް ކުރައްވާ ޅެންވެރިންގެ ބުރަ މަސައްކަތުގެ އަގުވަޒަން ކުރުމެވެ. މިދުވަސް ޖެނުއަރީމަހުގެ 15 ވަނަ ދުވަހު ފާހަގަކުރުމަށް ސަރުކާރުން ނިންމެވީ ދިވެހި ޅެންވެރިކަމުގެ ޘާޤިބު އަލްއުސްތާޛް އިބްރާހިމް ޝިހާބު، ދެމިއޮތުމުގެ ޢާލަމަށް ދަތުރުކުރެއްވި ދުވަސް ހަނދާނަށް ގެނައުމުގެ ގޮތުންނެވެ.