ކުޅިވަރު
އިތުރު ވަގުތުގައި ސިޓީއަށް ހާސްކަން ލިބުނުއިރު ޗެލްސީއަށް ބަލިނުވެ ފަރުޖެއްސިއްޖެ

ބްރެންޓްފޯޑަށް މެޗުގެ ނަތީޖާ ހަމަހަމަކޮށްދިނުމަށްފަހު ނޯގާރޑް އުފާފާޅުކުރަނީ، ފޮޓޯ: ގެޓީ އިމޭޖަސް
ހުލާސާ
މި ނަތީޖާތަކާއެކު ޗެލްސީ 37 ޕޮއިންޓާއެކު ލީގުގެ ހަތަރުވަނައިގައި އޮތްއިރު، 35 ޕޮއިންޓާއެކު ސިޓީއިން އޮތީ ހަވަނައިގައި.
އިންގްލިޝް ޕްރިމިއަރ ލީގުގައި އަންގާރަ ދުވަހުގެރޭ މެންޗެސްޓަރ ސިޓީއިން ދެ ގޯލުގެ ލީޑެއް ނަގާފައިވަނިކޮށް، ފަހަތުން އަރާ ބްރެންޓްފޯޑުން އިތުރު ވަގުތުގައި މެޗުގެ ނަތީޖާ ހަމަހަމަކޮށް ސިޓީއިން ޖެހިޖެހިގެން ފަސްވަނަ ލީގުތަށި ކާމިޔާބުކުރުމަށް ކުރަމުންދާ މަސައްކަތަށް އިތުރަށް ހުރަސްއެޅިއިރު، އެހެން މެޗެއްގައި ބޯނެމައުތުން ޗެލްސީ ކޮޅަށް ލީޑު ނަގާފައި ވަނިކޮށް، އިތުރު ވަގުތު ރީސް ޖޭމްސް ޖެހި ގޯލަކުން އެ ޓީމަށް ބަލިނުވެ ފަރުޖެއްސިއްޖެއެވެ.
ފިލް ފޮޑެންގެ ގޯލަކުން ސިޓީއިން ބްރެންޓްފޯޑު ކޮޅަށް މެޗުގައި ލީޑު ނެގީ 66ވަނަ މިނެޓުގައެވެ. އަދި ފޮޑެންގެ ދެވަނަ ގޯލަކާއެކު، އެ ޓީމުން މެޗުގެ 78ވަނަ މިނެޓުގައި ލީޑު ފުޅާކުރިއެވެ.
ނަމަވެސް މެޗުގައި ގިނަ ހަމަލާތަކެއް އެފެއްދި ބްރެންޓްފޯޑުން ވަނީ 10 މިނެޓުގެ ތެރޭގައި މެޗުގެ ނަތީޖާ ހަމަހަމަކޮށްފައެވެ. އެ ޓީމުގެ ފުރަތަމަ ގޯލު މެޗުގެ 82ވަނަ މިނެޓުގައި ކާމިޔާބުކުރީ ޔޯން ވިސާގެ ގޯލަކުންނެވެ. އަދި އެ ޓީމަށް މެޗުގެ ނަތީޖާ ހަމަހަމަކޮށްދިނީ، އިތުރު ވަގުތުގެ ދެވަނަ މިނެޓުގައި ކެޕްޓަން ކްރިސްޓިއަން ނޯގާރޑްއެވެ.
އަދި އޭގެ ފަހުން ބޯނެމައުތުން ގާތްގަނޑަކަށް ލީޑު ނެގިއެވެ. ނަމަވެސް ވިސާ ފޮނުވާލި ބޯޅަ ގޯލަށް ވަނުމުގެ ކުރިން ސަލާމަތްކޮށްދިނީ ސިޓީގެ އާކޭއެވެ.
ޕްރިމިއަރ ލީގުގެ އެހެންމެޗެއްގައި ޗެލްސީއާ ބޯނެމައުތު ބައްދަލުކުރިއިރު، މި މެޗުން ޗެލްސީ ބަލިނުވެ ސަލާމާތްކޮށްދިނީ، އަނިޔާގެ ސަބަބުން ގިނަ ދުވަސްތަކަކަށް ކުޅުމާއި ދުރުގައި ހުރުމަށްފަހު އެނބުރި އައި ރީސް ޖޭމްސްއެވެ.
ޗެލްސީއިން ލީޑު ނެގީ ކޯލް ފާމާގެ ގޯލަކުން މެޗުގެ ކުރީކޮޅެވެ.
ބޯނެމައުތައް މެޗުގެ ނަތީޖާ ހަމަހަމަކުރެވުނީ ދެވަނަ ހާފުގައި އެ ޓީމަށް ލިބުނު ޕެނަލްޓީއަކުންނެވެ. ޕެނަލްޓީ ކާމިޔާބުކުރީ ޖަސްޓިން ކްލައިވާރޓްއެވެ. އަދި އެ ޓީމުން ލީޑު ނެގީ އެންޓޮއިން ސެމެންޔޯގެ ގޯލަކުންނެވެ.
ނަމަވެސް، އިތުރުވަގުތުގައި ޗެލްސީއަށް ލިބުނު ހިލޭޖެހުމެއް ދުރުކަނަށް ފޮނުވާލައި، އަނިޔާގެ ސަބަބުން 21 މެޗު ގެއްލުނު ރީސް ޖޭމްސް ވަނީ ޗެލްސީއަށް މި މެޗުން ޕޮއިންޓެއް ހޯދައިދީފައެވެ.
މި ނަތީޖާތަކާއެކު، ޗެލްސީ އޮތީ 37 ޕޮއިންޓާއެކު ލީގުގެ ހަތަރުވަނައިގައެވެ. އަދި 35 ޕޮއިންޓާއެކު ސިޓީއިން ހަވަނައިގައި އޮތްއިރު، ބޯނެމައުތު އޮތީ 34 ޕޮއިންޓާއެކު ހަތްވަނައިގައެވެ.