ކުޅިވަރު

އައިސީސީ ޗެމްޕިއަންސް ޓްރޮފީ: ހައިބްރިޑް މޮޑެލަށް ކުޅުނު ނަމަވެސް އިންޑިއާގެ ކެޕްޓަން ޕާކިސްތާނަށް ދާންޖެހޭ

އައިސީސީ ޗެމްޕިއަންސް ޓްރޮފީ: ހައިބްރިޑް މޮޑެލަށް ކުޅުނު ނަމަވެސް އިންޑިއާގެ ކެޕްޓަން ޕާކިސްތާނަށް ދާންޖެހޭ

ރޯހިތު ޝަރުމާ---

މިފްތާޙް މުޙައްމަދު

މިފްތާޙް މުޙައްމަދު

15 ޖެނުއަރީ 2025، 04:23

15 ޖެނުއަރީ 2025، 04:23

ހުލާސާ

މުބާރާތުގައި ވާދަކުރާ ހުރިހާ ޓީމެއްގެ ކެޕްޓަނުންނެއް މުބާރާތް ބާއްވާ ޤައުމަށް ދާން ޖެހެނީ މުބާރާތުގެ ރަސްމީ ފޮޓޯ ޝޫޓްގައި ބައިވެރިވުމަށާއި، މުބާރާތުގެ ކުރިން ބާއްވާ ކެޕްޓަނުންގެ ހާއްސަ ޕްރެސް ކޮންފަރެންސަށް. 

ޕާކިސްތާނުގައި ބޭއްވުމަށް ހަމަޖެހިފައިވާ އައިސީސީ ޗެމްޕިއަންސް ޓްރޮފީ 2025ގެ މެޗުތައް ކުޅުމަށް އެ ގައުމަށް ދިއުމަށް އިންޑިއާއިން ދެކޮޅު ހެދުމުން، އިންޑިއާގެ މެޗުތައް ޑުބާއީގައި ކުޅުމަށް އިންޓަނޭޝަނަލް ކްރިކެޓް ކައުންސިލް (އައިސީސީ) އިން ނިންމި ނަމަވެސް، އިންޑިއާގެ ގައުމީ ކްރިކެޓް ޓީމުގެ ކެޕްޓަން ރޯހިތު ޝަރުމާ ޕާކިސްތާނަށް ދާނެ ކަމަށް އައިސީސީއިން ބުނެފިއެވެ.

މުބާރާތުގެ ޤަވާއިދު ބުނާގޮތުން، މުބާރާތުގައި ވާދަކުރާ ހުރިހާ ޓީމެއްގެ ކެޕްޓަނުންނެއް މުބާރާތް ބާއްވާ ޤައުމަށް ޖަމާވާންޖެހެއެވެ. އެއީ މުބާރާތުގެ ރަސްމީ ފޮޓޯ ޝޫޓްގައި ބައިވެރިވުމަށާއި، މުބާރާތުގެ ކުރިން ބާއްވާ ކެޕްޓަނުންގެ ހާއްސަ ޕްރެސް ކޮންފަރެންސަށެވެ. 

ނަމަވެސް ރޯހިތު ޝަރުމާ އިންޑިއާއަށް ދާނެކަން އިންޑިއާއިން ރަސްމީކޮށް ކަށަވަރުކޮށްދީފައެއް އަދި ނުވެއެވެ.

އެހެންވިޔަސް، އޭނާގެ ވިޒާގެ ކަންކަން ހަމަޖެއްސުމަށް ޕާކިސްތާނުން މަސައްކަތް ފަށާފައިވާކަމަށް މީޑިއާ ރިޕޯޓުތައް ބުނެއެވެ.

ޕާކިސްތާން ކްރިކެޓް ބޯޑް (ޕީސީބީ) އާ ދެކޮޅަށް ހައިބްރިޑް މޮޑެލްއަށް މުބާރާތް ކުޅުމަށް އައިސީސީއިން ނިންމުމަށްފަހު، އިންޑިއާގެ މެޗުތައް ކުޅުމަށް ދުބާއީ ވަނީ ހަމަޖައްސާފައެވެ. 

އަދި ޕާކިސްތާނާއި އިންޑިއާ އެއް ގްރޫޕެއްގައި ހިމެނުމާ ގުޅިގެން، އެ ދެ ޓީމު ބައްދަލުކުރާ މެޗު ވެސް ކުޅޭނީ ޑުބާއީގައެވެ. 

މީގެ އިތުރުން، އިންޑިއާ އާއި ޕާކިސްތާން ފައިނަލުގައި ބައްދަލުކުރަން ޖެހިއްޖެނަމަ، އެ މެޗު ވެސް ޑުބާއީގައި ކުޅުމަށް އައިސީސީއިން ވަނީ ނިންމާފައެވެ. އިންޑިއާ ފައިނަލަށް ނުދާނަމަ ފައިނަލް ކުޅޭނީ ޕާކިސްތާނުގެ ލާހޯރުގައެވެ.

ދެ ގައުމުގެ ދެމެދުގައި އޮތް ސިޔާސީ އަރާރުންތަކާއެކު، އިންޑިއާގެ ގައުމީ ކްރިކެޓް ޓީމު ޕާކިސްތާނަށް ދިއުން އިންޑިއާއިން މަނާކޮށްފައި އޮންނަތާ މިހާރު ގިނަ ދުވަސްތަކެއް ވެއްޖެއެވެ. އެހެން ކުޅިވަރެއް ކުޅުމަކަށް ވެސް، 2008 ވަނަ އަހަރުގެ ފަހުން އިންޑިއާގެ އެއްވެސް ގައުމީ ޓީމެއް ޕާކިސްތާނަށް ދަތުރުކޮށްފައެއް ނުވެއެވެ.  އެގޮތުން 2023 ވަނަ އަހަރު ޕާކިސްތާނުގައި ބޭއްވި އޭޝިއާ ކަޕްގެ އިންޑިއާގެ މެޗުތައް ކުޅެފައިވަނީ ސްރީލަންކާގައެވެ. 

އަދި މި ފަހަރުގެ ޗެމްޕިއަންސް ޓްރޮފީ އަކީ 1996 ވަނަ އަހަރަށްފަހު ޕާކިސްތާނުގައި އައިސީސީގެ ފިރިހެން ޕްރޮފެޝަނަލް މުބާރާތެއް ބޭއްވުމަށް ތައްޔާރުވާ ފުރަތަމަ ފަހަރެވެ. އެ އަހަރު ޕާކިސްތާނުން ވަނީ އިންޑިއާ އަދި ސްރީލަންކާއާއެކު 50-އޯވަރ ވޯލްޑް ކަޕް ވެސް ބާއްވާފައެވެ.

މި ލިޔުން ކިޔާލުމުން

Ads by MSS