ޚަބަރު
ރައީސުލްޖުމްހޫރިއްޔާ އެސްޓޯނިއާގެ ދެވަނައަށް އެންމެ ބޮޑު ސިޓީއަށް ޒިޔާރަތްކުރައްވައިފި

ރައީސުލްޖުމްހޫރިއްޔާ ޓާރޓޫ ސިޓީއަށް ޒިޔާރަތްކުރެއްވުން، ފޮޓޯ: ރައީސް އޮފީސް
ހުލާސާ
މި ޒިޔާރަތުގައި އެ ޤައުމުގައި އެންމެ ގިނަ މީހުން އާބާދުވެފައިވާ ސަރަޙައްދު ވެސް ގެންދެވި.
އެސްޓޯނިއާގެ ދެވަނައަށް އެންމެ ބޮޑު ސިޓީ ކަމުގައިވާ، ޓާރްޓޫ ސިޓީއަށް ރައީސުލްޖުމްހޫރިއްޔާ ޑޮކްޓަރ މުޙައްމަދު މުޢިއްޒު މިއަދު ވަޑައިގެންފިއެވެ.
އެސްޓޯނިއާގެ ރައީސްގެ ދައުވަތަކަށް އެ ޤައުމަށްކުރައްވާ ރަސްމީ ދަތުރުފުޅުގެ ތެރެއިން އެ މަނިކުފާނު މިއަދު ޓާރްޓޫ ސިޓީއަށް ވަޑައިގެންނެވުމުން އެ މަނިކުފާނަށް މަރުހަބާ ވިދާޅުވީ، އެ ސިޓީގެ މޭޔަރ، މިސްޓަރ އަރްމަސް ކްލާސްއެވެ.
މި ޒިޔާރަތުގައި މިސްޓަރ ކްލާސް ވަނީ ރައީސުލްޖުމްހޫރިއްޔާގެ އަރިހުގައި ޓާރޓޫ ޓައުން ހޯލް ސްކޮޔަރއަށް ޒިޔާރަތްކުރައްވައި، އެ ތަނުގެ ތާރީޙީ ގިނަ ވާހަކަތަކާއި، އެތާންގެ އަގުހުރި މަޢުލޫމާތުތަކެއް ހިއްސާކުރައްވާފައެވެ.
ޓާރޓޫ ޓައުން ހޯލްއަކީ އެސްޓޯނިއާގެ ވިޔަފާރީގެ މައި ސަރަޙައްދެވެ. އަދި އެއީ އެ ޤައުމުގައި އެންމެ ގިނަ މީހުން އާބާދުވެފައިވާ ސަރަޙައްދު ވެސް މެއެވެ.
މި ސޓީއަށް ކުރެއްވެވި ޒިޔާރަތުގައި އެ މަނިކުފާނު ޔުނިވަރސިޓީ އޮފް ޓާރްޓޫއާއި، އެސްޓޯނިއަން ބަޔޯބޭންކާއި، އެސްޓޯނިއަން ނޭޝަނަލް މިއުޒިއަމް (އީ.އާރު.އެމް) އަށް ޒިޔާރަތްކުރެއްވުމަށްވެސް ވަނީ ހަމަޖެހިފައެވެ.