އުތުރު ޔޫރަޕްގެ އެންމެ ތާރީޚީ އެއް ޔުނިވަރސިޓީއަށް ރައީސުލްޖުމްހޫރިއްޔާ ޒިޔާރަތްކުރައްވައިފި

އެސްޓޯނިއާގެ ރައީސްގެ ދައުވަތަކަށް އެ ޤައުމަށްކުރައްވާ ރަސްމީ ދަތުރުފުޅުގެ ތެރެއިން އެ މަނިކުފާނު މިއަދު ޓާރްޓޫ ސިޓީއަށް ވަޑައިގެންނެވުމަށްފަހު، އެ ސިޓީގައި ހުންނަ ޓާރްޓޫ ޔުނިވަރސީއަށް ރައީސުލްޖުމްހޫރިއްޔާ ޑޮކްޓަރ މުޙައްމަދު މުޢިއްޒު މިއަދު ޒިޔާރަތްކުރައްވައިފިއެވެ. 

އެ ޔުނިވަރސިޓީއިން އެ މަނިކުފާނަށް މަރުހަބާ ވިދާޅުވީ އެ ޔުނިވަރސިޓީގެ ރެކްޓަރ، ޕްރޮފެސަރ ޓޫމަސް އައްސެރްއެވެ. އަދި އެއަށްފަހު ރެކްޓަރ އައްސެރް ވަނީ ރައީސުލްޖުމްހޫރިއްޔާއަށް ކެމްޕަހުގެ މުހިއްމު ސަރަޙައްދުތައް ދައްކަވާލައްވާފައެވެ.

މި ޔުނިވަރސިޓީއަކީ އުތުރު ޔޫރަޕްގައި ތާރީޙީ ގޮތުން ވަރަށް ޙާއްޞަ، އަދި އެންމެ ޝަރަފުވެރި ޔުނިވަރސިޓީތަކުގެ ތެރޭގައި ހިމެނޭ ތަނެކެވެެ. 

ދުނިޔޭގެ ރިސާރޗް ޔުނިވަރސިޓީ ތަކުގެ ތެރެއިން އެންމެ މަތިން ދަރަޖަކުރެވިފައިވާ ރިސާރޗްތަކުގެ 1 އިންސައްތަ ހިއްސާކުރާ އެސްޓޯނިއާ ސަރުކާރުގެ މި ރިސާރޗް ޔުނިވަރސިޓީގައި، 100 އަށްވުރެ ގިނަ ޤައުމުތަކުން ދަރިވަރުން ކިޔަވަމުން ދެއެވެ. އަދި މިތަނުގެ އާބާދީގައި 14،300 ވަރަކަށް ދަރިވަރުން ހިމެނެއެވެ.

އަދި މިއީ ޖީނޯމިކްސް، ކޮމްޕިޔުޓަރ ސައިންސް އަދި މެޓީރިއަލް ސައިންސްގެ ރޮނގުން ފާހަގަކޮށްލެވޭ މި ޔުނިވަރސިޓީގެ ތެރޭގައި ހިމެނޭ ޔުނިވަރސިޓީއެއް ވެސް މެއެވެ.

މި ޔުނިވަރސިޓީއަށް ކުރެއްވެވި ޒިޔާރަތުގައި ރައީސުލްޖުމްހޫރިއްޔާ ވަނީ، ދިވެހި ދަރިވަރުންނާއި، މުދައްރިސުންނާއި އަދި އެހެނިހެން ފަންނީ މާހިރުންނަށް ތަޢުލީމާއި، ދިރާސާކުރުމާއި އަދި ތަމްރީނުގެ ފުރުސަތުތަކާ ގުޅޭގޮތުން މަޝްވަރާކުރައްވާފައެވެ. 

އަދި ޙާއްސަކޮށް، ދިވެހިރާއްޖެ ޑިޖިޓަލައިޒްކުރުމުގެ މަސައްކަތުގައި އެ ޔުނިވަރސިޓީގެ ދިރާސާކުރުމުގެ ޤާބިލުކަން ބޭނުންކުރެވިދާނެ ގޮތްތަކަކާ ގުޅޭގޮތުން ވެސް މަޝްވަރާކުރެއްވެވިއެވެ.