ޚަބަރު
ރާއްޖޭގެ ޚާރިޖީ ސިޔާސަތަށް ބަދަލެއް ނާންނާނެ ކަމުގެ ޔަޤީންކަން ޚާރިޖީ ވަޒީރު ދެއްވައިފި

ޚާރިޖީ ވަޒީރު ޑރ. ޢަބްދުﷲ ޚަލީލް ފޮޓޯ:ޕީއެސްއެމް
ރާއްޖެއިން ބައިނަލްއަޤްވާމީ މައިދާނުގައި ގެންގުޅެމުންދާ ޚާރިޖީ ސިޔާސަތަށް އެއްވެސް ބަދަލެއް ނާންނާނެ ކަމަށް ޚާރިޖީ ވަޒީރު ޑރ. ޢަބްދުﷲ ޚަލީލް ވިދާޅުވެއްޖެއެވެ. ވަޒީރު މިހެން ވިދާޅުވެފައިވަނީ ސޯޝަލް މީޑިއާގައި ކުރެއްވި ޕޯސްޓެއްގައެވެ.
ރަޝިއާ-ޔޫކްރެއިން ހަނގުރާމައިގައި ރާއްޖެއިން ވަކި ކޮޅެއް ނަގާފައިވާ ކަމަށް ސޯޝަލް މީޑިއާގައި ދެކެވެމުންދާ ވާހަކަތަކާ ގުޅިގެން ވަޒީރު މި ޕޯސްޓް ކުރައްވާފައިވާކަން ފާހަގަކުރެވެއެވެ. ވަޒީރުގެ ޕޯސްޓުގައި ވިދާޅުވެފައިވަނީ ރާއްޖެއިން ބައިނަލްއަޤްވާމީ މައިދާނުގައި ގެންގުޅެމުން އަންނަ ޒަމާންވީ ސިޔާސަތުތަކަށް އެއްވެސް ބަދަލެއް އައިސްފައި ނުވާ ކަމަށެވެ.
ރާއްޖެއިން އދ. ގައި ވޯޓު ދެމުން އަންނަ ގޮތަށް ބެލިނަމަވެސް މިކަން ސާފުވާނެ
ވަޒީރު
އަދި ކުދި ޤައުމުތަކުގެ މިނިވަންކަމާއި ސިޔާދަތާއި އިސްތިޤުލާލަށް ބުރޫއަރާ ފަދަ ހާލަތްތަކުގައި ރާއްޖެއިން އަބަދުވެސް ނަގަނީ ޕްރިންސިޕަލް ސްޓޭންޑެއް ކަމަށް ވަޒީރު ފާހަގަކުރެއްވިއެވެ.
ރައީސުލްޖުމްހޫރިއްޔާ ޑރ. މުޙައްމަދު މުޢިއްޒުގެ ޚާރިޖީ ސިޔާސަތުގެ ތަޞައްވުރު ތަކުރާރުކުރައްވަމުން، ވަޒީރު ވިދާޅުވީ ދިވެހިރާއްޖޭގެ ޚާރިޖީ ސިޔާސަތު ބިނާވެގެންވަނީ އެއްވެސް ޤައުމަކާ ހަތުރުވެރި ނުވެ، ދިވެހި ރައްޔިތުންނަށް ލާބައާއި މަންފާ ލިބޭ ގޮތަށް ކަމަށެވެ.
ރާއްޖޭގެ މިނިވަންކަމާ ސިޔާދަތަށް ބުރޫ ނާރާގޮތަށް ހުރިހާ ޤައުމަކާއެކީވެސް ގާތް ގުޅުން ބޭއްވުމުގެ މައްޗަށް އެ ސިޔާސަތު ބިނާވޭ
ވަޒީރު
ފާހަގަކޮށްލެވޭ ކަމަކީ، ރާއްޖެއިން މިހާތަނަށްވެސް ބައިނަލްއަޤްވާމީ މައިދާނުގައި ފަލަސްޠީނު މައްސަލަ ފިޔަވާ އެހެން އެއްވެސް މައްސަލައެއްގައި ވަކި ޤައުމަކަށް ތާއީދުކޮށްފައި ނުވާކަމެވެ. އޭގެ ބަދަލުގައި ރާއްޖެއިން އަބަދުވެސް ވަކާލާތުކޮށް ގޮވާލަނީ ބައިނަލްއަޤްވާމީ މުއާހަދާތަކާއި ޤާނޫނުތަކާ އެއްގޮތަށް ޤައުމުތަކުން ޢަމަލުކުރުމަށެވެ. އަދި އދ. ގައި ވޯޓުދެމުންދަނީވެސް މި ސިޔާސަތާ އެއްގޮތްވާ ގޮތުގެ މަތިންނެވެ.
ބައިނަލްއަޤްވާމީ މައިދާނުގައި ރާއްޖެއިން ގެންގުޅޭ ސިޔާސަތުތައް ބަދަލެއް ނުވޭ. އ.ދ. ގައި ރާއްޖެއިން ވޯޓު ދެމުންދާގޮތް ބައްލަވާލެއްވުމުން އެކަން ސާފުވާނެ. ކުދި ޤައުމުތަކުގެ މިނިވަންކަމާއި ސިޔާދަތާއި އިސްތިޤްލާލަށް ބުރޫއަރާ ފަދަ ހާލަތްތަކުގައި ރާއްޖެއިން އަބަދުވެސް ނަގަނީ…
— Abdulla Khaleel (@abkhaleel) January 16, 2025