ދިވެހިރާއްޖޭގެ ތާރީޚުގައިވެސް ޢިލްމީ ދިރާސާތަކަށް މީގެކުރިން ނުދޭ އަހައްމިއްޔަތުކަމެއް މި ސަރުކާރުންދޭ:ވަޒީރު ނާޡިމް

ދިވެހިރާއްޖޭގެ ތާރީޚުގައިވެސް ޢިލްމީ ދިރާސާތަކަށް މީގެކުރިން ނުދޭ އަހައްމިއްޔަތުކަމެއް މި ސަރުކާރުން ދެމުންދާކަމަށް ޞިއްޙަތާއި ބެހޭ ވަޒީރު ޢަބްދުﷲ ނާޡިމް އިބްރާހީމް ވިދާޅުވެއްޖެއެވެ. ވަޒީރު މިހެން ވިދާޅުވީ އިއްޔެ ބޭއްވުނު "މޯލްޑިވްސް ހެލްތު ރީސާރޗް ބުލެޓިން ވޮލިއުމް 10" އިފްތިތާޙުކުރުމުގެ ރަސްމިއްޔާތުގައި ވާހަކަފުޅު ދައްކަވަމުންނެވެ.

ވަޒީރު ނާޡިމް ވިދާޅުވީ، ދިރާސާއަކީ ހަމައެކަނި ޢިލްމީ މަސައްކަތެއް ނޫންކަމަށާއި އެއީ މުޖްތަމަޢުތައް ބާރުވެރިކޮށް، މުޖްތަމަޢު ބިނާކޮށްދޭ އެންމެ ވަރުގަދަ ނިޒާމުކަމަށެވެ. އަދި މުޖްތަމަޢުގައި ހުރި މައްސަލަތައް ދެނެގަނެ އެ މައްސަލަތަކުގެ އަލީގައި ކުރިއަށް ދާންވީ މަގު ދައްކައިދެނީ ދިރާސާތަކުންކަމަށް ވަޒީރު ފާހަގަކުރެއްވިއެވެ.

ހެދޭ ދިރާސާތަކުގެ އަލީގައި ފިޔަވަޅުތައް އެޅުމަކީ ނުވަތަ މުހިންމު ނިންމުންތައް ނިންމުމަކީ އެންމެ ޒިންމާދާރުގޮތްކަމަށް ވަޒީރު ވިދާޅުވިއެވެ. އެހެންކަމުން ޞިއްޙީ ދާއިރާގެ ކަންކަން ނިންމުމުގައި ޢިލްމީގޮތުން ހެދޭ ދިރާސާތަކަށް ރިޢާޔަތްކުރައްވާނެކަމަށް ވަޒީރު އިތުރަށް ވިދާޅުވިއެވެ.

ރާއްޖޭގައި ދިރާސާކުރުމުގެ ދާއިރާއަކީ އިތުރަށް ތަރައްޤީކުރަން ޖެހޭ ދާއިރާއެއްކަމަށް ވަޒީރު ފާހަގަކުރެއްވިއެވެ. އެގޮތުން ތަޢުލީމު ފޯރުކޮށްދޭ މުއައްސަސާތަކުން ރަސްމީ ސިފައެއްގައި މިކަން ކުރަމުންދާއިރު އާންމު ފަރުދުންގެ ފެންވަރުގައިވެސް ދިރާސާތަކަށް އިސްކަންދެވިގެންދާތަން ފެންނަމުންދާކަމަށް ވަޒީރު ވިދާޅުވިއެވެ.

ރައީސުލްޖުމްހޫރިއްޔާ ޑރ. މުޙައްމަދު މުޢިއްޒުގެ ރިޔާސީ ވަޢުދުފުޅާ އެއްގޮތަށް ދިރާސާތަކަށް ޚާއްސަ ގްރާންޓް ފަންޑެއް މިހާރު އުފައްދަވާފައިވާކަން ވަޒީރު ފާހަގަކުރެއްވިއެވެ. އަދި މި ގްރާންޓްގެ ބޭނުން ހިފައި ޞިއްޙީ ދާއިރާއިން ދިރާސާ ހަދަން ބޭނުންވާ ފަރާތްތަކާއި އެކަމަށް ޝައުގުވެރިކަން ހުރި ފަރާތްތަކުން އެ ދާއިރާގައި ހަދާ އެކި ދިރާސާތަކުގައި ބައިވެރިވުމަށް ވަޒީރު އިލްތިމާސްކުރެއްވިއެވެ.

"މޯލްޑިވްސް ހެލްތު ރިސާރޗް ބުލެޓިން" ޝާއިޢުކުރުމުގެ މައިގަނޑު މަޤްޞަދަކީ ރާއްޖޭގެ ހެދޭ ޞިއްޙީ ދާއިރާއާ ގުޅުންހުރި ދިރާސާތަކުން ހޯދުނު މަޢުލޫމާތުތައް ފަސޭހަކަމާއެކު ފޯރުކޮށްދިނުންކަމަށް ޞިއްޙަތާއި ބެހޭ ވުޒާރާއިން ވިދާޅުވެފައިވެއެވެ.

Highlights from the Launching of Maldives Health Research Bulletin Volume X. pic.twitter.com/dZchTm6pG5

— Ministry of Health (@MoHmv) January 16, 2025