އޭސީސީގެ ހުސްވެފައިވާ ދެ މަޤާމަށް ރައީސް މުޢިއްޒު ދެ ނަން ހުށަހަޅުއްވައިފި

އެންޓި-ކޮރަޕްޝަން ކޮމިޝަން (އޭސީސީ) ގެ މެންބަރުކަމުގެ ދެ މަޤާމަށް ދެ ބޭފުޅެއްގެ ނަން ރައީސުލްޖުމްހޫރިއްޔާ ޑރ. މުޙައްމަދު މުޢިއްޒު ރައްޔިތުންގެ މަޖިލީހަށް ހުށަހަޅުއްވައިފިއެވެ. މި ދެ މަޤާމަށް ހުށަހަޅުއްވާފައިވަނީ މއ. ގޯލްޑަން މޫން އަހުމަދު ނާޝިދު އާއި ރ. ހުޅުދުއްފާރު، ރޯޒްވިލާ، އަލްއުސްތާޛާ އާސިޔާ އަޒީމާގެ ނަމެވެ.

މިއަދު ދައުރުން ބޭރުން ބޭއްވުނު މަޖިލީހުގެ ޖަލްސާގައި، އޭސީސީއަށް މެންބަރުން އައްޔަންކުރުމުގެ މައްސަލަ ވަނީ މިނިވަން މުއައްސަސާތަކުގެ ކޮމިޓީއަށް ފޮނުވާފައެވެ. އަހުމަދު ނާޝިދަކީ މިހާރުވެސް ޕޮލިސް ބޯޑުގެ މެންބަރެއްގެ ގޮތުގައި މަސައްކަތްކުރައްވަމުން ގެންދަވާ ބޭފުޅެކެވެ. އަދި އާސިޔާ އަޒީމާއަކީ ވިޔަފާރިވެރިންގެ ޖަމިއްޔާގެ ނައިބު ރައީސްކަން ކުރައްވާފައިވާ ބޭފުޅެކެވެ.

އޭސީސީގެ މި ދެ މަޤާމު ހުސްވެފައިވަނީ އެ ކޮމިޝަންގެ ނައިބު ރައީސް އަބްދުލްސަލާމާއި މެމްބަރު ތޯހާ މުހައްމަދު އިސްތިއުފާ ދެއްވުމާ ގުޅިގެންނެވެ. މި ދެ ބޭފުޅުން އިސްތިއުފާ ދެއްވީ އެ ބޭފުޅުންނާ މެދު ނުފޫޒު ފޯރުވުމާއި ކޮރަޕްޝަންގެ ބޮޑެތި ތުހުމަތުތަކެއް ކުރެވި، އެ ދެ މެންބަރުން ވަކިކުރުމަށް ރައްޔިތުންގެ މަޖިލީހުގެ މިނިވަން މުއައްސަސާތަކުގެ ކޮމިޓީން ނިންމުމަށްފަހުގައެވެ.

މި ދެ މަޤާމަށް ކުރިމަތިލުމަށް ހުޅުވާލުމުން އިޖާބަދެއްވި ފަރާތްތަކުގެ ތެރެއިން ރައީސުލްޖުމްހޫރިއްޔާ އައްޔަންކުރައްވަން ފެނިވަޑައިގަންނަވާ ދެ ބޭފުޅުންގެ ނަން މިހާރު ވަނީ މަޖިލީހަށް ހުށަހަޅުއްވާފައެވެ. މިނިވަން މުއައްސަސާތަކުގެ ކޮމިޓީން މި ދެ ބޭފުޅުންގެ ނަން ދިރާސާކުރުމަށްފަހު، މަޖިލީހުގެ ތަޅުމަށް ގެނެސް ވޯޓަށް އަހާނެ ކަމަށް ބެލެވެއެވެ.