އުތުރު ލަންޑަނުގެ ކުރިމަތިލުން ކާމިޔާބުކޮށް، ލީގުގެ އެއްވަނައާ ހަތަރު ޕޮއިންޓު ކައިރިއަށް އާސެނަލް ޖެހިލައިފި

އުތުރު ލަންޑަނަށް ނިސްބަތްވާ ޓޮޓެންހަމް ހޮޓްސްޕާ އާއި އާސެނަލް ބައްދަލުކުރި މެޗު ކާމިޔާބުކޮށް، ލީގުގެ އެއްވަނައާ ހަތަރު ޕޮއިންޓު ކައިރިއަށް އާސެނަލް ޖެހިލައިފިއެވެ.

ކަރަބޯ ކަޕުގެ ފުރަތަމަ ލެގުގައި ނިއުކާސްލް އަތުން ބަލިވެ، އަދި ދެން ކުޅުނު އެފްއޭ ކަޕްގެ ތިންވަނަ ބުރުގެ މެޗުގައި މެންޗެސްޔުނައިޓެޑާއި ބައްދަލުކޮށް ޕެނަލްޓީއިން ބަލިވުމަށްފަހު އާސެނަލް މި މެޗަށް ނިކުތީ، ކަންކަން ރަގަޅުކޮށް، ލީގު ރޭހުގައި ލިވަޕޫލަށް ޕްރެޝަރު ކުރުމަށެވެ. 

ނަމަވެސް ފުރަތަމަ ހާފުގެ 25 ވަނަ މިނެޓުގައި، ސޮން ހިއުންގް-މިން ވަނީ ސްޕާސްއަށް ލީޑު ނަގައިދީފައެވެ.

އެހެންކަމުން އެ ނަތީޖާ ބަދަލުކުރުމަށް އާސެނަލް ކުރަމުންދިޔަ މަސައްކަތް ކާމިޔާބުވީ، މެޗުގެ ފުރަތަމަ ހާފު ނިމެން ފަސްމިނެޓަށް ވެފައިވަނިކޮށް ލިބުނު ކޯނަރެއްގައެވެ. ޑެކްލައިން ރައިސް އެ ކޯނަރު ގޯލުގެ ކުރިމައްޗަށް ހުރަސްކޮށްލުމުން، ގެބްރިއެލް ބޮލުން ޖަހަން އުޅުމުގެ ތެރޭގައި ބޯޅަ ގޯލަށް ވަނީ، ސްޕާސްގެ ޑޮމިނިކް ސޮލަންކީ ބޮލުގަ ޖެހުމަށްފަހު ބައިކޮޅަށެވެ.

އަދި ފުރަތަމަ ހާފު ނިމެން މިނެޓަކަށް ވެފައިވަނިކޮށް، އާސެނަލްއިން ވަނީ މެޗުގައި ލީޑު ނަގާފައެވެ. ސްޕާސްގެ ޕެނަލްޓީ އޭރިއާ ތެރެއަށް ވާތްފަޅިން ވަނުމަށްފަހު، ދުރުކަނަށް ތިރިތިރިން ފޮނުވާލި ބާރުބޯޅައަކުން މި ގޯލު ކާމިޔާބުކުރީ ލިއެންޑްރޯ ޓްރޮސަޑްއެވެ. 

ދެވަނަ ހާފުގައި އާސެނަލްއަށް އެ ޓީމުގެ ލީޑު ފުޅާކުރުމަށް ރަގަޅު ފުރުސަތުތަކެއް ލިބުނެވެ. ނަމަވެސް އެ ތަނުން އެއްވެސް ފުރުސަތެއް ގޯލަށް ކާމިޔާބުކުރެވިފައެއް ނުވެއެވެ. 

މި ނަތީޖާއާއެކު އާސެނަލް ލީގުގެ ދެވަނައިގައި ލިވަޕޫލަށް ވުރެން ހަތަރު ޕޮއިންޓު ފަހަތުގައި އޮތް ނަމަވެސް، ލިވަޕޫލަށް އެއް މެޗުގެ އެޑްވާންޓޭޖެއް އެބައޮތެވެ.