ޚަބަރު
ރާއްޖޭގެ ކަނޑުގެ ސަރަޙައްދުގައި ޤަވާއިދާ ޚިލާފަށް އުޅުނު މަސްބޯޓެއް އަތުލައިގަނެފި

ސްރީލަންކާގެ މަސްބޯޓު ކޯސްޓުގާޑުން ހިފެހެއްޓުން، ފޮޓޯ: އެމްއެންޑީއެފް
ހުލާސާ
އެ ބޯޓު ކޯސްޓުގާޑުގެ ބެލުމުގެ ދަށަށް ގެންދިޔައިރު، އެ ބޯޓުގައި 6 ފަޅުވެރިން ތިިބި.
ރާއްޖޭގެ ކަނޑުގެ ސަރަޙައްދުގައި ޤަވާއިދާ ޚިލާފަށް އުޅުނު މަސްބޯޓެއް އަތުލައިގަނެފައިވާކަމަށް ކޯސްޓްގާޑުން ހާމަކޮށްފިއެވެ.
މޯލްޑިވްސް ނޭޝަނަލް ޑިފެންސް ފޯސް (އެމްއެންޑީއެފް) އިން ހާމަކޮށްފައިވާ ގޮތުގައި ދިވެހިރާއްޖޭގެ މަސްވެރިކަމުގެ ޤާނޫނާ ޚިލާފަށް ރާއްޖޭގެ ކަނޑުގެ ސަރަޙައްދުގައި އުޅުނު އެ ބޯޓު ކޯސްޓުގާޑުގެ ބެލުމުގެ ދަށަށް ގެންދިޔައިރު، އެ ބޯޓުގައި 6 ފަޅުވެރިން ތިއްބެވެ.
ކޯސްޓްގާޑުން ބަލަންޖެހޭ ކަންކަން ބެލުމަށްފަހު، މިހާރު އެ ބޯޓު ފުލުހުންނާ ހަވާލުކޮށްފައިވާކަމަށް ވެސް އެމްއެންޑީއެފްއިން ވަނީ ހާމަކޮށްފައެވެ.
ސްރީލަންކާގެ މަސް ބޯޓުތައް ދޭތެރެދޭތެރެއިން ރާއްޖޭގެ އިޤްތިޞާދީ ސަރަޙައްދަށް ވަދެގެން ހަރަކާތްތެރިވެއެވެ.
އަދި މިދިޔަ ޑިސެންބަރު މަހުގެ 26ގައި ވެސް މިފަދަ ބޯޓެއް އަތުލައިގަނެވުނެވެ. ރާއްޖޭގެ ޚާއްޞަ އިޤްތިޞާދީ ސަރަހައްދު ބެލެހެއްޓުމަށް ހިންގި އޮޕަރޭޝަނެއްގައި މި މަސް ބޯޓު ހޯދީ އެމްއެންޑީއެފް އެއަރ ކޯރގެ ޑްރޯންގެ އެހީގައިކަމަށް އެމްއެންޑީއެފުންވަނީ ވިދާޅުވެފައެވެ.