Ads by Exprox

ޚަބަރު

އޮޅުވާލައިގެން ހޯދާފައިވާ ގޯއްޗާއި ފްލެޓް އަތުލާނެކަމަށް ވަޒީރު ވިދާޅުވެއްޖެ

އޮޅުވާލައިގެން ހޯދާފައިވާ ގޯއްޗާއި ފްލެޓް އަތުލާނެކަމަށް ވަޒީރު ވިދާޅުވެއްޖެ

އިމާރާތްކުރުމާއި ގެދޮރުވެރިކަމާއި ބިނާރާ ބެހޭ ވަޒީރު ޑރ. ޢަބްދުﷲ މުއްޠަލިބް ފޮޓޯ:އަވަސް

އާމިނަތު ޔުމްނާ

އާމިނަތު ޔުމްނާ

17 ޖެނުއަރީ 2025، 06:53

17 ޖެނުއަރީ 2025، 06:53

އިމާރާތްކުރުމާއި ގެދޮރުވެރިކަމާއި ބިނާރާ ބެހޭ ވަޒީރު ޑރ. ޢަބްދުﷲ މުއްޠަލިބް ވިދާޅުވެފައިވަނީ އޮޅުވާލައިގެން ގެއެއް ނުވަތަ ފްލެޓެއް ހޯދާފައިވާނަމަ، އެ ތަނެއް އަތުލާނެ ކަމަށެވެ. މި މަސައްކަތް ފުރަތަމަ ފަށާނީ ހުޅުމާލެ ދެވަނަ ފިޔަވަހިން ކަމަށް ވަޒީރު ވިދާޅުވިއެވެ.

ގެދޮރުވެރިޔާ ފްލެޓްތައް ހަވާލުކުރުމަށް ވަމުންދާ ތައްޔާރީތަކާ ގުޅޭގޮތުން ބޭއްވި ނޫސްވެރިންގެ ބައްދަލުވުމެއްގައި ވަޒީރު ވިދާޅުވީ، ބިންވެރިޔާ އަދި ގެދޮރުވެރިޔާ ސްކީމާއި ގުޅޭގޮތުން ހިންގާ ސްކޭމްތަކަކީ ވުޒާރާއާ ގުޅުމެއް ހުރި ކަންކަން ނޫން ކަމަށެވެ. ނަމަވެސް ބަޔަކު މިފަދަ ސްކޭމްތައް ހިންގާކަމަށާއި ގޯތި ދިނުމުގެ ނަމުގައި ބޮޑެތި އަދަދުން ފައިސާވެސް ހޯދާކަން ފާހަގަވާ ކަމަށް ވަޒީރު ވިދާޅުވިއެވެ.

ވަޒީރު އިތުރަށް ވިދާޅުވީ، މަޢުލޫމާތު ވެރިފައިކުރުމުގެ ތެރޭގައި، ގޯތި އޮތް މީހެއްގެ ގޯއްޗެއް ނެތްކަމަށް ދައްކައިގެން ގޯތި ހޯދުން ނުވަތަ މާލެއަށް އުފަން ނޫން މީހުން މާލެއަށް އުފަން މީހުންގެ ގޮތުގައި ދައްކައިގެން ދީފައިވާ ގޯތިތައްވެސް އަތުލާނެ ކަމަށެވެ. ރެޖިސްޓްރީ ހަވާލުކޮށް ގޯތި ރާނަން ފަށާފައި ހުރިނަމަވެސް، އެއީ ކޮރަޕްޝަނުން ހޯދި ތަނެއްކަން އެނގޭ ހިސާބުން އެ މަސައްކަތް ހުއްޓުވާ ދައުލަތަށް ނަގާނެ ކަމަށްވެސް ވަޒީރު ވިދާޅުވިއެވެ.

ގެދޮރުވެރިކަމުގެ މައްސަލައަކީ ވަރަށް ހައްސާސް މައްސަލައެއްކަމަށާއި ސްކޭމާއި ކޮރަޕްޝަނަށް ފުރުޞަތު ނުދޭނެކަމަށް ވަޒީރު ވިދާޅުވިއެވެ. ވުޒާރާއިން ނުވަތަ އެޗްޑީސީންވެސް، އޮޅުވާލައިގެން ލިބެން ނުޖެހޭ ފަރާތަކަށް ނުވަތަ ލިސްޓުގައި ނުހިމެނޭ މީހަކަށް ފްލެޓާއި ގޯތި ދެވިގެން ނުވާނެކަމަށްވެސް ވަޒީރު ވަނީ ވިދާޅުވެފައެވެ.

ބިންވެރިޔާ ސްކީމްގެ ދަށުން، ގޯތި ނުލިބޭ ބަޔަކަށް ހުޅުމާލެއިން ގޯތި ދީފައިވާ މައްސަލައެއް ފުލުހުން މިހާރުވެސް ދަނީ ތަޙުޤީޤުކުރަމުންނެވެ. ބިންވެރިޔާ ސްކީމްގައި ޖުމްލަ 9000 އަށްވުރެ ގިނަ ގޯތި ދޫކުރުމަށް ހަމަޖެހިފައިވާއިރު، ހުޅުމާލެއިން ދޫކުރާ 1300 އަށްވުރެ ގިނަ ގޯތި ހިމެނެއެވެ.
                    

މި ލިޔުން ކިޔާލުމުން

Ads by MSS