ޚަބަރު
ބުރޫނާއީގައި މަތީ ތައުލީމު ހާސިލުކުރުމުގެ ސްކޮލަރޝިޕް ފުރުޞަތު ހުޅުވައިލައިފި

ޤައުމީ ޔުނިވަރސިޓީގައި ބޭއްވުނު ދަސްވެނިވުން ހަފްލާގެ ތެރެއިން ފޮޓޯ
މަތީ ތަޢުލީމާއި މަސައްކަތްކުރުމާއި ހުނަރުތައް ތަރައްޤީކުރުމާބެހޭ ވުޒާރާއިން ބުރޫނާއީގައި މަތީ ތައުލީމު ހާސިލްކުރުމުގެ ސްކޮލަރޝިޕަކަށް ކުރިމަތިލުމުގެ ފުރުޞަތު ހުޅުވާލައިފިއެވެ. މި ސްކޮލަރޝިޕަކީ ބުރޫނާއީ ސަރުކާރުގެ "ބުރޫނާއި ގަވަރމެންޓް ސްކޮލަޝިޕް ޕްރޮގްރާމް" ގެ ދަށުން ދިވެހިންނަށް ހޯދައިދީފައިވާ ފުރުޞަތެކެވެ.
މި ސްކޮލަރޝިޕްގެ ދަށުން ބުރޫނާއީގެ 5 ޔުނިވަރސިޓީއެއްގައި ޑިޕްލޮމާ، ޑިގްރީ އަދި މާސްޓާސް ޑިގްރީ ފެންވަރުގެ ކޯސްތަކުގައި ކިޔެވުމުގެ ފުރުޞަތު ލިބިގެންދާނެއެވެ. ކޮންމެ ދަރިވަރަކަށްވެސް ހުށަހެޅޭނީ ފުލްޓައިމް އެއް ޕްރޮގްރާމަކަށެވެ.
ސްކޮލަރޝިޕްގެ ދަށުން ޓިއުޝަން ފީ، ދަރިވަރުންގެ ހުރުމުގެ އިންތިޒާމު އަދި މެޑިކަލް އިންޝުއަރެންސް ކޯސް އިންތިޒާމްކުރާ ފަރާތުން ހަމަޖައްސައިދޭނެކަމަށް ވުޒާރާއިން މަޢުލޫމާތު ދެއްވިއެވެ. އަދި ވަރަށް ގިނަ ދާއިރާތަކަކުން މަތީ ތަޢުލީމު ޙާސިލްކުރުމުގެ ފުރުޞަތު މި ސްކޮލަރޝިޕްތަކުގެ ދަށުން ލިބިގެންދާނެކަމަށްވެސް ވުޒާރާއިން ވިދާޅުވިއެވެ.
ސްކޮލަރޝިޕަށް ކުރިމަތިލާ ފަރާތްތަކުގެ ކިބައިގައި ހުންނަންޖެހޭ ޝަރުތުތައް ދިވެހި ސަރުކާރުގެ ގެޒެޓުގައި ޝާއިޢުކޮށްފައިވާކަމަށް ވުޒާރާއިން ވިދާޅުވިއެވެ. އަދި ސްކޮލަރޝިޕަށް ކެންޑިޑޭޓުން ހޮވުމުގެ މަސައްކަތް ކުރާނީ ސްކޮލަރޝިޕް ދޭ ފަރާތުންކަމަށްވެސް ވުޒާރާއިން ވިދާޅުވިއެވެ.
ވުޒާރާއިން އިތުރަށް ވިދާޅުވީ، މި ޕްރޮގްރާމްތަކަށް އެދޭ ފަރާތްތަކުން، ޕްރޮގްރާމް ފުރިހަމަކުރަން ފެށުމުގެ ކުރިން އެ ޕްރޮގްރާމެއް ހިންގާ ޔުނިވަރސިޓީއަކީ މޯލްޑިވްސް ކޮލިފިކޭޝަންސް އޮތޯރިޓީ (އެމް.ކިޔު.އޭ) އިން ޤަބޫލުކުރާ މަރުކަޒެއްކަމާއި، އެ ޕްރޮގްރާމަކީ އެމް.ކިޔު.އޭ އިން ޤަބޫލުކުރާ ޕްރޮގްރާމެއްކަން ކަށަވަރު ކުރުމަށް އިލްތިމާސްކުރައްވާފައިވާ ކަމަށެވެ.
މި ސްކޮލަރޝިޕަށް ކުރިމަތިލުމަށް ޝައުޤުވެރިވާ ފަރާތްތަކުން 15 ފެބްރުއަރީ 2025 ވާ ހޮނިހިރު ދުވަހުގެ ބުރޫނާއި ގަޑިން 16:00 ގެ ކުރިން ފޯމު ހުށަހަޅަންޖެހޭނެ ކަމަށްވެސް ވުޒާރާއިން ވިދާޅުވިއެވެ.