ޖަޕާނުގެ އާސާރީ އަވަށެއްގައި ޤާއިމްކޮށްފައިވާ ޒަމާނީ އަލިފާން ނިއްވާ ނިޒާމް

ޖަޕާނުގެ ކިޔޯޓޯ ޕްރިފެކްޗަރގައި ހިމެނޭ ކަޔަބުކި ނޯ ސަޓޯ ނަމަކަށް ކިޔާ އާސާރީ ރަށެއްގައި އަލިފާނުގެ ހާދިސާތަކުން ސަލާމަތްވުމަށްޓަކައި 62 އޮޓޮމެޓިކް ފެންހޮޅި ހިމެނޭ ނިޒާމެއް ޤާއިމްކޮށްފިއެވެ. މި ރަށުގައި ހުރި 50 ގެއަކީ 150 އަހަރާއި 220 އަހަރާ ދެމެދުގެ މުއްދަތެއްގައި އިމާރާތްކޮށްފައިވާ ގެތަކެކެވެ. އަދި މީގެ ތެރެއިން 39 ގޭގައި ވަނީ ވިނަ ފުރާޅު ލާފައެވެ.

މި ނިޒާމު ޤާއިމްކޮށްފައިވަނީ 1993 ވަނަ އަހަރު މި ރަށް މުހިންމު ތަރިކައިގެ ސަރަހައްދެއްގެ ގޮތުގައި ފާހަގަކުރުމާ ގުޅިގެންނެވެ. މި ނިޒާމުގެ ކޮންމެ ނޮޒްލްއެއް ވަނީ ރަށުގެ ޘަޤާފީ ވައްޓަފާޅިއާ ގުޅޭގޮތަށް ކުދިކުދި ގެތަކުގައި ފޮރުވާފައެވެ.

މި ނިޒާމު ޓެސްޓްކުރުމަށް އަހަރަކު ދެފަހަރު، މޭ އަދި ޑިސެމްބަރު މަހު، ބޭއްވޭ ހަރަކާތް ވަނީ ފަތުރުވެރިންގެ މެދުގައި މަޤްބޫލު ހަރަކާތަކަށް ވެފައެވެ. މި ހަރަކާތުގައި ވިނަ ފުރާޅުތަކުގެ މަތިން ފެންނަ ދަނބު ދޮންވެލައިގެ މަންޒަރު ބަލާލުމަށް ގިނަ ބަޔަކު ޒިޔާރަތްކުރެއެވެ.

ކަޔަބުކި ނޯ ސަޓޯއަކީ ކިޔޯޓޯ ޕްރިފެކްޗަރގެ ނަންޓަން ސިޓީގެ މިޔަމަ-ޗޯގެ އުތުރުގައި އޮންނަ ރަށެކެވެ. މި ރަށުގެ އިރުމަތިން ހުޅަނގަށް ސަބާ ކައިޑޯ ނަމަކަށް ކިޔާ މަގެއް އޮވެއެވެ. މި ރަށުގައި ހުރި ގެތަކުގެ މައި ގެ ހުންނަނީ ދެކުނަށް ކުރިމަތިލާފައެވެ. އަދި ޔުރާ ކޯރުގެ ފެންގަނޑާ ދިމާލަށް ވާގޮތަށެވެ.

1993 ވަނަ އަހަރު މި ރަށް މުހިންމު ތަރިކައިގެ ސަރަހައްދެއްގެ ގޮތުގައި ފާހަގަކުރުމާ ގުޅިގެން، ރަށުގެ އާސާރީ މަންޒަރުތައް ދެމެހެއްޓުމަށާއި ރައްޔިތުންގެ ދިރިއުޅުން ރައްކާތެރިކުރުމަށް ރަށު ރައްޔިތުން ވަނީ "ކަޔަބުކި ނޯ ސަޓޯ ޕްރިޒަވޭޝަން ސޮސައިޓީ" އާއި "ކަޔަބުކި ނޯ ސަޓޯ ކޯ. ލޓޑ" އުފައްދާފައެވެ.