ގއ. ދާންދޫގައި ފެންބޮޑުވުމާ ގުޅިގެން ސިފައިން އެހީތެރިވެއްޖެ

ގއ. ދާންދޫގައި ބޯކޮށް ވާރޭވެހި ފެންބޮޑުވުމާ ގުޅިގެން އެމްއެންޑީއެފް ސަދަން އޭރިއާ ކޮމާންޑްގެ ސިފައިން އެ ރަށުގައި ހަރަކާތްތެރިވެއްޖެއެވެ. މިއަދު ހެނދުނު 9:00 ހާއިރު ދާންދޫގައި ފެންބޮޑުވެފައިވާކަމުގެ މަޢުލޫމާތު ލިބުމާ ގުޅިގެން، އެމްއެންޑީއެފް ސަދަން އޭރިއާ ކޮމާންޑާއި ގދ. ތިނަދޫ ފަޔަރ ސްޓޭޝަނުގެ ސިފައިން ވަނީ އެ ރަށަށް ގޮއްސައެވެ.

ސިފައިންގެ ފަރާތުން ހިންގި ފެން ހިންދުމުގެ އޮޕަރޭޝަނުގެ ސަބަބުން، މިއަދު މެންދުރު 12:00 ހާއިރު ފެންބޮޑުވެފައިވާ ސަރަހައްދުތަކުން ފެން ހިންދާ، އާންމު ހާލަތަށް ގެނެވިފައިވާކަމަށް އެމްއެންޑީއެފްއިން މަޢުލޫމާތު ދެއެވެ. މީގެ އިތުރުން، ކުރިމަގުގައި މިފަދަ ހާދިސާއެއް ދިމާވެދާނެ ކަމަށް ބަލައި، ވެލިބަސްތާ ޖެހުމަށް ބޭނުންވާ 200 ގޯނި ވެލި ގއ. ދާންދޫ ކައުންސިލާ ހަވާލުކޮށްފައިވާކަމަށްވެސް އެމްއެންޑީއެފްއިން ބުނެއެވެ.

ރާއްޖެއަށް ކުރަމުންދާ ވިއްސާރައިގައި ގއ.ދާންދޫއަށް ބޯކޮށް ވާރޭވެހި ފެން ބޮޑުވުމާ ގުޅިގެން ފެން ހިންދުމުގައި އެމްއެންޑީއެފް ސަދަން އޭރިއާ ކޮމާންޑްގެ ސިފައިން ހަރަކާތްތެރިވެއްޖެ.https://t.co/wRlRdZvfSy pic.twitter.com/PCsVgLrnXw

— Maldives National Defence Force (@MNDF_Official) January 17, 2025

ރާއްޖެއަށް ކުރަމުންދާ ވިއްސާރައިގެ ސަބަބުން އެކި ރަށްރަށުގައި ފެންބޮޑުވުމުގެ މައްސަލަ ކުރިމަތިވަމުންދާއިރު، އެމްއެންޑީއެފްގެ ފަރާތުން މި ފަދަ ހާލަތްތަކުގައި އެހީތެރިކަން ފޯރުކޮށްދިނުމަށް ތިއްބެވީ ތައްޔާރަށެވެ.