ދިވެހިންނަކީ ނާތަހުޒީބު ބައެއްކަމަށް ދެއްކުމަކީ ދަށު ދަރަޖައިގެ ޢަމަލެއް: ނައިބު ރައީސް

ދިވެހިރާއްޖޭގެ ރައީސުލްޖުމްހޫރިއްޔާގެ ނައިބު އަލްއުސްތާޛު ޙުސައިން މުޙައްމަދު ލަޠީފް ވިދާޅުވެފައިވަނީ ދިވެހިންނަކީ ނާތަހުޒީބު ބައެއްކަން ދައްކަން އުޅުމަކީ ދަށު ދަރަޖައިގެ ޢަމަލެއް ކަމަށެވެ. އެމަނިކުފާނު މިފަދައިން ވިދާޅުވެފައިވަނީ  މީސްމީޑިއާގައި ކުރެއްވި ޕޯސްޓެއްގައެވެ.

ނައިބު ރައީސްގެ މި ބަސްފުޅުތައް އަމާޒުވެފައިވަނީ ރާއްޖޭގެ ސިޔާސީ ފަރާތަކުން މީޑިއާއެއްގައި ވާހަކަދައްކަވަމުން މަގުމަތިން ވެރިކަން ވައްޓާލަން ރައްޔިތުން ނިކުންނާނެ ކަމަށް ދޭހަވާ ގޮތަށް ދެއްކެވި ވާހަކަތަކާ ގުޅިގެންނެވެ.

ނައިބު ރައީސް އިތުރަށް ވިދާޅުވެފައިވަނީ ރައީސުލްޖުމްހޫރިއްޔާ ޑރ. މުޙައްމަދު މުޢިއްޒަކީ ބިނާކުރަނިވި ފާޑުކިއުމަށް ޖާގަ ދެއްވާ ބޭފުޅެއް ކަމަށެވެ. އަދި މިއީ ޤައުމަށާއި ރައްޔިތުންނަށް ޚިދުމަތް ކުރަން ނުކުންނަ ކޮންމެ ވެރިއެއް ނުވަތަ ސިޔާސީ ބޭފުޅެއްގެ ކިބައިގައި ހުންނަންޖެހޭ ސިފައެއް ކަމަށްވެސް އެމަނިކުފާނު ވިދާޅުވިއެވެ.

ރައީސުލް ޖުމްހޫރިއްޔާ ޑރ. މުއިއްޒަކީ އަބަދުވެސް ބިނާކުރަނިވި ފާޑުކިޔުމަށް ޖާގަދެއްވާ ބޭފުޅެއް. އަދި އެއީ ގައުމަށް އަދި ރައްޔިތުންނަށް ހިދުމަތެއް ކޮށްދެއްވަން ނުކުމެވަޑަންނަވާ ކޮންމެ ވެރިއެއް ނުވަތަ ސިޔާސީ ބޭފުޅެއްގެ ކިބައިގައި ހުންނަންވާނެ ސިފައެެއް. އެހެންނަމަވެސް ފާޑުކިޔުމުގެ… https://t.co/LXSAAvbSnk

— Hussain Mohamed Latheef (@HucenSembe) January 18, 2025

ފާޑުކިޔުމުގެ ނަމުގައި ދިވެހިންނަކީ ނާތަހުޒީބު އަދި ޑިމޮކްރެސީއާ ދުރު ބައެއްކަން ދައްކަން އުޅުމަކީ ދަށު ދަރަޖައިގެ ޢަމަލެއް ކަމަށާއި، މިއީ ރައްޔިތުންނަށް ހަޖޫޖެހުން ކަމަށްވެސް ނައިބު ރައީސް ވިދާޅުވިއެވެ.

ސަރުކާރާ ދެކޮޅު ސިޔާސީ ފަރާތްތަކުން ސަރުކާރަށް އެކި ގޮތްގޮތުން ފާޑުކިޔަމުންދާއިރު، ރައީސް މުޢިއްޒު ވެރިކަމާ ހަވާލުވެވަޑައިގަތްތާ މާގިނަ ދުވަސްތަކެއް ނުވަނީސް، ވެރިކަމުން ދުރުކޮށް ޢަޒުލްކުރުމަށްވެސް އިދިކޮޅު ފަރާތްތަކުން މަސައްކަތްކޮށްފައިވާކަން ފާހަގަކުރެވެއެވެ. އޭރު މަޖިލީހުގައި އިދިކޮޅު ފަރާތްތަކުގެ މެޖޯރިޓީ އޮތްއިރު، ބައެއް ވަޒީރުންނަށް ރުހުން ނުދީ ހިފެހެއްޓުމާއި، ސޮވެރިން ޑިވެލޮޕްމެންޓް ފަންޑުގެ ބިލު ފަދަ މުހިންމު ބިލުތައް މަޖިލީހުން ބޭރުކުރިކަންވެސް ފާހަގަކޮށްލެވެއެކޮށްލެވެއެވެ.

ރައީސުލްޖުމްހޫރިއްޔާ ވަނީ އެމަނިކުފާނުގެ ސަރުކާރުގައި އެއްވެސް ސިޔާސީ ފަރާތަކަށް ސިޔާސީ ގޮތުން ހައްޔަރުކޮށް ދަޢުވާ ނުކުރައްވާނެ ކަމަށާއި، ސަރުކާރަށް ފާޑުކިއުމުގެ ޖާގަ ހުރިހާ ފަރާތަކަށްވެސް އޮންނާނެ ކަމަށް ވިދާޅުވެފައެވެ.