ޓްރަމްޕް ރައީސްކަމާ ހަވާލުވުމަށްފަހު ޗައިނާއަށް ދަތުރުކުރުމަށް ޝައުޤުވެރިކަން ފާޅުކޮށްފި

އެމެރިކާގެ އަލަށް އިންތިލަށް އިންތިޚާބުވި ރައީސް ޑޮނަލްޑް ޓްރަމްޕް، ރައީސްކަމާ ހަވާލުވުމަށްފަހު ޗައިނާއަށް ދަތުރުކުރަން ބޭނުންވާކަމަށް އޭނާގެ ލަފާދޭ ފަރާތްތަކަށް ބުނެފައިވާކަމަށް ވޯލް ސްޓްރީޓް ޖާނަލްއިން ހޯމަ ދުވަހު ރިޕޯޓުކޮށްފިއެވެ.

މި މަޢުލޫމާތު ހާމަކުރި ފަރާތްތަކުގެ ތެރެއިން އެކަކު ބުނެފައިވާ ގޮތުގައި، ޓްރަމްޕް ރައީސްކަމާ ހަވާލުވާތާ ފުރަތަމަ 100 ދުވަހުގެ ތެރޭގައި ޗައިނާއަށް ދަތުރުކުރުމަށް ޝައުޤުވެރިކަން ފާޅުކޮށްފައިވެއެވެ. ޓްރަމްޕް ރައީސްކަމާ ހަވާލުވާނީ މިއަދު ހޯމަ ދުވަހުއެވެ.

ޗައިނާގެ ސަރުކާރުގެ ނޫސްތަކުން ހުކުރު ދުވަހު ބުނެފައިވާ ގޮތުގައި، ޓްރަމްޕްގެ ރައީސްކަމުގެ ހުވާކުރުމުގެ ރަސްމިއްޔާތުގައި ބައިވެރިވުމަށް ޗައިނާގެ ނައިބު ރައީސް ހަން ޒެންގް ވަޑައިގަންނަވާނެއެވެ. އަދި ދެ ޤައުމުގެ ދެމެދުގައި އޮތް އެއްބާރުލުން އިތުރަށް ވަރުގަދަކުރުމަށް ޗައިނާއިން ތައްޔާރަށް ތިބިކަމަށްވެސް ބުނެފައިވެއެވެ.

މީގެ އިތުރުން، ޓްރަމްޕާއި ޗައިނާގެ ރައީސް ޝީ ޖިންޕިންގ ވަނީ އެ ދެ ބޭފުޅުންގެ މަންދޫބުން މެދުވެރިކޮށް އަމިއްލަފުޅަށް ބައްދަލުކުރެއްވުމާ ބެހޭގޮތުން މަޝްވަރާކުރައްވާފައެވެ. މިގޮތުން އެއް އޮޕްޝަނަކީ ޓްރަމްޕް ޗައިނާގެ ރައީސަށް އެމެރިކާއަށް ވަޑައިގަތުމަށް ދަޢުވަތު ދެއްވުމެވެ.