ފެނަކައިގެ ދަރަނީގެ ބޮޑު ބައެއް ރޯދަމަހުގެ ކުރިން ޚަލާސްކުރަނީ

ފެނަކަ ކޯޕަރޭޝަން ލިމިޓެޑުން ދައްކަން ޖެހޭ ދަރަނީގެ ބޮޑު ބައެއް ރޯދަމަހުގެ ކުރިން ދައްކާ ޚަލާސްކުރެވޭނެ ކަމަށް އެކުންފުނީގެ މެނޭޖިންގ ޑިރެކްޓަރ މުހައްމަދު ނަޖާހް ވިދާޅުވެއްޖެއެވެ.

މިހާރުގެ ސަރުކާރުން ވެރިކަމާ ހަވާލުވިއިރު ފެނަކައިގައި 4.3 ބިލިއަން ރުފިޔާގެ ދަރަންޏެއް އޮތް ކަމަށް ވިދާޅުވިއެވެ. ސަރުކާރު ކުންފުނިތަކުގެ ތެރެއިން އެންމެ ބޮޑު އެއް ދަރަންޏެއް އޮތް ކުންފުންޏަކީ ފެނަކަ ކަމަށާއި، މި ދަރަނި އިންތިހާއަށް ބޮޑުވެ، އެތައް ބަޔަކު ދިޔައީ ޝަކުވާ ކުރަމުން ކަމަށް ނަޖާހް ފާހަގަކުރެއްވިއެވެ.

ހަޤީޤަތުގައި ކުންފުންޏަށް ލިބޭފައިސާއިން އަޅުގަނޑުމެންނަށް މިތަން ހިންގޭނެ. އެހެންނަމަވެސް، ދަރަނީގެ ބޮޑު ބެކްލޮގެއް މިއަންނަނީ. އެކަމުގައި އަޅުގަނޑުމެން މިހާރު މިގެންދަނީ މަޝްވަރާ ކުރަމުން. މިނިސްޓްރީއާއެކު މަޝްވަރާކުރަމުން ދަނީ. ރައީސުލްޖުމްހޫރިއްޔާވެސް ވިދާޅުވެފައި އޮތީ ރޯދައިގެ ކުރިން އަޅުގަނޑުމެންނަށް ފަންޑަސް ހަމަޖައްސައި ދެއްވާނެ ކަމަށް. އިރާދަ ކުރެއްވީއްޔާ ރޯދައިގެ ކުރިއަށް ދަރަނީގެ ކަންކަން ހައްލުވާނެ. އޭރު ރަށްރަށަށް ޚިދުމަތް ދިނުމަށް ފޯކަސް ކުރެވޭނެ  

ނަޖާހު

ފެނަކައިގެ މެނޭޖިންގ ޑިރެކްޓަރ ވިދާޅުވީ، ކުންފުންޏާ ހަވާލުވުމަށް ފަހު އެންމެ ބޮޑު އިސްކަމެއް ދިނީ ދަރަނި ދެއްކުމަށް ބޭނުންވާ ފައިސާ ހަމަޖެއްސުމަށް ކަމަށެވެ. އެގޮތުން މިވޭތުވެ ދިޔަ ޑިސެންބަރު މަހު 20 މިލިއަން ރުފިޔާގެ ދަރަނި އަދާކުރެވިފައިވާ ކަމަށާއި، އަދިވެސް ވެންޑަރުންނަށް 640 މިލިއަން ރުފިޔާގެ ދަރަނި އަދާނުކުރެވި ހުރިކަން އޭނާ ފާހަގަކުރެއްވިއެވެ.

އަޅުގަނޑުމެން މިބަލަނީ ރޯދައާއި ހަމައަށް މުޅި ޖުމްލަ އެއްކޮށް ދައްކާ ޚަލާސް ނުކުރެވުނަސް، މީގެ މެޖޯރިޓީ %90 ކްލިއަރ ވާނެ ކަމަށް. ބާކީ ހުރިއެއްޗެއް ވެއްޖެއިއްޔާ ކުންފުނީގެ ތެރެއިން ޚަލާސްކޮށް ނިންމާލާނަން. އިރާދަކުރެއްވިއްޔާ ރޯދައިގެ ކުރިއަށް ވާނެ  

ނަޖާހު

ފެނަކައިން ދަރަނިތައް ދެއްކުމާއެކު ކުންފުނީގެ ޚަރަދުތައްވެސް ވަނީ ކުޑަކޮށްފައެވެ. 2023 ވަނަ އަހަރާ އަޅާބަލާއިރު، 160 މިލިޔަން ރުފިޔާ ހިންގުމުގެ ޚަރަދުން ކުޑަކޮށްފައިވާ ކަމަށް ފެނަކައިން ވިދާޅުވެއެވެ.