ކުޅިވަރު

އިތުރު ވަގުތުގައި ނުނޭޒް ކާމިޔާބުކުރި ދެ ގޯލާއެކު ލިވަޕޫލުން ލީޑު ފުޅާކޮށްފި

އިތުރު ވަގުތުގައި ނުނޭޒް ކާމިޔާބުކުރި ދެ ގޯލާއެކު ލިވަޕޫލުން ލީޑު ފުޅާކޮށްފި

ބްރެންޓްފޯޑު ކޮޅަށް ގޯލެއް ކާމިޔަބުކުރުމަށްފަހު ނުނޭޒް އުފާފާޅުކުރަނީ، ފޮޓޯ: ގެޓީ އިމޭޖަސް

މިފްތާޙް މުޙައްމަދު

މިފްތާޙް މުޙައްމަދު

19 ޖެނުއަރީ 2025، 08:29

19 ޖެނުއަރީ 2025، 08:29

ހުލާސާ

ލިވަޕޫލުން މި މެޗު ކާމިޔާބުކުރިއިރު، ރޭ އެސްޓަން ވިލާއާ ދެކޮޅަށް އާސެނަލް ކުޅުނު މެޗުން އެ ޓީމު 2-2 އިން އެއްވަރުވުމާ ގުޅިގެން، ލިވަޕޫލް މިހާރު އޮތީ 6 ޕޮއިންޓުގެ ލީޑެއްގައި.

ބަދަލު ކުޅުންތެރިއެއްގެ ގޮތުގައި ކުޅެން ނިކުތް ލިވަޕޫލްގެ ފޯވާޑް، ޑާވިން ނުނޭޒް އިތުރު ވަގުތުގައި ކާމިޔާބުކުރި ދެ ގޯލުން ބްރެންޓްފޯޑުގެ މައްޗަށް އެ ޓީމުން ކުރި ހޯދައި، ލީގުގެ ލީޑަރުންގެ ގޮތުގައި އޮތް ލީޑު ފުޅާކޮށްފިއެވެ.

މި ސީޒަންގައި ލީގު ތައްޓާއި އެންމެ ކައިރިން ވާދަކުރަމުން އަންނަ ލިވަޕޫލަށް މި އަހަރު ފެށުނު ފަހުން ކުޅުނު ފުރަތަމަ ދެ މެޗުން ވެސް ވަނީ އެއްވަރުވެފައެވެ. އަދި ބްރެންޓްފޯޑު މެޗުގެ އިތުރު ވަގުތާ ހަމައަށް ބެލެވުނީ، މި މެޗުގެ ނަތީޖާ ހަމަހަމަވެ، އަނެއްކާ ވެސް މުހިންމު ދެ ޕޮއިންޓެއް އެ ޓީމަށް ގެއްލޭނެ ކަމަށެވެ.

މެޗުން މޮޅުކޮށްދިން ދެ ގޯލު ނުނޭޒް ކާމިޔާބުކޮށްފައިވާއިރު، ފުރަތަމަ ގޯލު ކާމިޔާބުކުރީ އިތުރު ވަގުތުގެ ފުރަތަމަ މިނެޓުގައި ޓްރެންޓް އެލެކްސެންޑަރ އާނޯލްޑް ބްރެންޓްފޯޑުގެ ގޯލު ކުރިމައްޗަށް ހުރަސްކޮށްދިން ބޯޅައަކުންނެވެ. އަދި އޭގެ ދެ މިނެޓު ފަހުން، އިތުރު ވަގުތުގެ ތިން ވަނަ މިނެޓުގައި ލިވަޕޫލަށް ތިން ޕޮއިންޓު ޔަގީންކޮށްދިނީ ހާވީ އެލިއޮޓް ދިން ޕާހަކުން އަނެއްކާވެސް ނުނޭޒްއެވެ.

މި މެޗުގައި ލިވަޕޫލަށް ގޯލެއް ކާމިޔާބު ނުކުރެވި ގިނަ ވަގުތުތަކެއް ހޭދަވެފައިވީނަމަވެސް، މެޗު ކޮންޓްރޯލްކޮށް މޮޅަށް ކުޅުނީ އެ ޓީމުންނެވެ. އަދި މުޅި މެޗުގައި ވެސް ގިނަ ހަމަލާތަކެއް ވަނީ ލިވަޕޫލުން އުފައްދާފައެވެ.

އަނެއްކޮޅުން ބްރެންޓްފޯޑުގެ ނުރައްކާތެރި އެޓޭކިންގ ކުޅުންތެރިންވަނީ ކައުންޓަރ އެޓޭކުތަކުގައި ލިވަޕޫލުގެ ގޯލަށް ރަގަޅު ހަމަލާތަކެއް ފޮނުވާލާފައެވެ. ނަމަވެސް ލިވަޕޫލްގެ ގޯލްކީޕަރ، އެލިސަން ބެކާރ ވަނީ މި ހަމަލާތައް ދިފާއުކޮށްފައެވެ.

ލިވަޕޫލުން މި މެޗު ކާމިޔާބުކުރިއިރު، ރޭ އެސްޓަން ވިލާއާ ދެކޮޅަށް އާސެނަލް ކުޅުނު މެޗުން އެ ޓީމު 2-2 އިން އެއްވަރުވުމާ ގުޅިގެން، ލިވަޕޫލް މިހާރު އޮތީ 6 ޕޮއިންޓުގެ ލީޑެއްގައެވެ. 

އަދި އަމިއްލަ ދަނޑުގައި އެންމެ ފަހުން ކުޅުނު 4 މެޗުގެ ތެރެއިން 3 މެޗުން ބަލިވެފައިވާ ބްރެންޓްފޯޑް އޮތީ ލީގުގެ 11ވަނައިގައެވެ.

މި ލިޔުން ކިޔާލުމުން

Ads by MSS