ދުނިޔެ
ޓްރަމްޕްގެ ތާއީދާއިއެކު ހަމާސްއާ ދެކޮޅަށް ހަނގުރާމަ އަލުން ފަށަށް މިތިބީ ތައްޔާރަށް: ނަތަންޔާހޫ

ޑޮނަލްޑް ޓްރަމްޕް އަަދި ނަތަންޔާހޫ ފޮޓޯ:އިންޓަނެޓް
ކުއްލިއަކަށް ހުއްޓާލެވުނު ހަނގުރާމަ އަލުން ފެށުމަށް އިސްރާއީލް ތައްޔާރަށް އޮތްކަމަށް ބެންޖަމިން ނެތަންޔާހޫ ބުނެފިއެވެ. ހުއްޓުމަކަށް އައި ހަނގުރާމައިގެ ދެވަނަ ފިޔަވަހީގެ މަޝްވަރާތައް ކާމިޔާބު ނުވެއްޖެނަމަ ހަނގުރާމަ އަލުން ފެށުމަށް ތައްޔާރަށް ތިބިކަމަށް އޭނާ ވަނީ ހާމަކޮށްފައެވެ.
އާދިއްތަ ދުވަހު ހެނދުނު 8:30 ގައި ހުއްޓުމަކަށް އަންނަ ހަނގުރާމައިގެ ކުރިން، ޓީވީ އަށް ދިން އިންޓަރވިއުގައި ނެތަންޔާހޫ ބުނީ މިއީ ވަގުތީ މެދުކެނޑުމެއްކަމަށާއި، ގައްޒާގައި އަލުން ހަމަލާތައް ފެށުމުގެ ހައްގު އިސްރާއީލަށް ލިބިގެންވާ ކަމަށެވެ. އަދި މިކަމަށް އެމެރިކާގެ އިންތިޚާބު ވެފައިވާ ރައީސް ޑޮނަލްޑް ޓްރަމްޕްގެ ތާއީދު ލިބިފައިވާ ކަމަށްވެސް އޭނާ ބުނެފައިވެއެވެ.
ވޭތުވެދިޔަ 15 މަސް ދުވަހުގެ ތެރޭގައި އިސްރާއީލުން ކާމިޔާބުކުރި ސިފައިންގެ ހަމަލާތަކުގެ ތެރޭގައި ހަމާސްގެ ލީޑަރު ޔަހްޔާ ސިންވާރު މަރާލެވުނު ކަމަށް ނެތަންޔާހޫ ހާމަކުރިއެވެ. "އަޅުގަނޑުމެން މެދުއިރުމަތީގެ ސިފަ ބަދަލުކޮށްފިން،" ނެތަންޔާހޫ ބުނެފައިވެއެވެ. އަދި މިހާރު ހަމާސް "މުޅިން އެކަނި" ވެފައިވާ ކަމަށްވެސް ވަނީ ބުނެފައެވެ.
ހަމާސްއިން ދޫކޮށްލާ ރަހީނުންގެ ލިސްޓު ލިބެންދެން އެއްބަސްވުން ތަންފީޒު ނުކުރާނެ ކަމަށް ނެތަންޔާހޫ ހާމަކުރިއެވެ.
އިސްރާއީލުގެ މީޑިއާގައި ދޫކޮށްލާނެ 33 ރަހީނުންގެ ދިގު ލިސްޓެއް ޝާއިޢުކޮށްފައިވީ ނަމަވެސް، އޮފިޝަލުން އަދި އެކަން ކަށަވަރުކޮށްފައެއް ނުވެއެވެ. އާދިއްތަ ދުވަހު ދޫކޮށްލާނެ ރަހީނުންގެ ނަންތައް އަދިވެސް ލިބިފައިނުވާ ކަމަށް އިސްރާއީލުގެ އޮތޯރިޓީތަކުން ބުނެއެވެ.
މި އެއްބަސްވުމުގެ ދަށުން، ކުރިއަށް އޮތް ހަފުތާތަކުގައި 33 ރަހީނުން ދޫކޮށްލުމާ ބަދަލުގައި 1,890 ފަލަސްތީނު ޤައެދީން ދޫކޮށްލެވޭނެއެވެ. އަދި އިސްރާއީލުން ގައްޒާއިން އޭގެ ސިފައިން އަނބުރާ ގެންދަން ފަށާނެއެވެ.