ދުނިޔެ
ޓްރަމްޕްއާ ދެކޮޅަށް ގިނައަދަދެއްގެ އަންހެނުން ނިކުމެ މުޒާހަރާ ކޮށްފި

ޓްރަމްޕާއި ދެކޮޅަށް ކުރިއަށް ދިޔަ މުޒާހަރާ ފޮޓޯ: ބީބީސީ
އެމެރިކާގެ ކުރީގެ ރައީސް ޑޮނަލްޑް ޓްރަމްޕްގެ ދެކޮޅުވެރިންގެ ތެރެއިން ގިނަ އަދަދެއްގެ އަންހެނުން ހިމެނޭ އެތައްހާސް މީހުން މިއަދު ވޮޝިންގްޓަން ޑީސީގެ މަގުތަކަށް ނުކުމެ، "ޕީޕަލްސް މާރޗް" ގެ ނަމުގައި މުޒާހަރާއެއް ކުރިއަށް ގެންގޮސްފިއެވެ.
ކުރިން "ވިމެންސް މާރޗް" ގެ ނަމުގައި މަޝްހޫރުވެފައިވާ މި މުޒާހަރާ ވަނީ 2017 ވަނަ އަހަރުން ފެށިގެން ކޮންމެ އަހަރަކު ބާއްވަމުން އައިސްފައެވެ. މި އަހަރުގެ މުޒާހަރާގެ މަޤްޞަދަކީ "ޓްރަމްޕިޒަމް" އާ ކުރިމަތިލުން ކަމަށް މުޒާހަރާ އިންތިޒާމުކުރި ފަރާތްތަކުން ބުނެފައިވެއެވެ.
މުޒާހަރާގައި ބައިވެރިވި ފަރާތްތަކުން ވަނީ ތިން ޕާކެއްގައި އެއްވުމަށްފަހު ލިންކަން މެމޯރިއަލްއާ ދިމާއަށް ދަތުރުކޮށްފައެވެ. މުޒާހަރާގެ އިންތިޒާމުކުރި ފަރާތްތަކުން 50،000 މީހުން ބައިވެރިވާނެ ކަމަށް އުއްމީދުކުރި ނަމަވެސް، މުޒާހަރާގައި ބައިވެރިވެފައިވަނީ 5،000 އެއްހާ މީހުންނެވެ.
މުޒާހަރާގައި ބައިވެރިވި ފަރާތްތަކުގެ ތެރޭގައި މޫސުމަށް އަންނަ ބަދަލުތަކާއި، އިމިގްރޭޝަން އަދި އަންހެނުންގެ ޙައްޤުތަކަށް ވަކާލާތުކުރާ ފަރާތްތައް ހިމެނެއެވެ. މުޒާހަރާގެ އިންތިޒާމުކުރި ފަރާތްތަކުން ބުނެފައިވަނީ އޮޓޮކްރެޓުންނާ ދެކޮޅަށް ކުރީގެ ކާމިޔާބު ހަރަކާތްތަކުން އިބުރަތް ލިބިގަނެގެން ޓްރަމްޕާ ކުރިމަތިލާން ބޭނުންވާ ކަމަށެވެ.
މުޒާހަރާ ކުރިއަށްދިޔައިރު، ވޮޝިންގްޓަން މޮނިއުމަންޓް ކައިރީގައި ޓްރަމްޕްގެ ތާއީދުކުރާ ކުޑަ ގްރޫޕެއް ވެސް ތިބިކަން ފާހަގަކުރެވުނެވެ. ނަމަވެސް، މުޒާހަރާގެ ލީޑަރުންގެ ތެރެއިން މީހަކު ވަނީ އެ މީހުންނާ ދިމާއަށް "ނޯ ޓްރަމްޕް، ނޯ " ކިޔަމުން ގޮސްފައެވެ.
މި މުޒާހަރާ ބޭއްވުނީ ޓްރަމްޕް އަލުން ރައީސްކަމަށް ހުވާކުރުމުގެ ދެ ދުވަސް ކުރިންނެވެ. ޓްރަމްޕް ވަނީ މިއަދު ވޮޝިންގްޓަން ޑީސީއަށް ޒިޔާރަތްކޮށް، ހުވާކުރުމުގެ ރަސްމިއްޔާތާ ގުޅިގެން ބާއްވާ ހަފްލާތަކުގައި ބައިވެރިވާން ފަށާފައެވެ.