Ads by Exprox

ޚަބަރު

ސައުތު އަރި މެރިން ޕްރޮޓެކްޓެޑް އޭރިއާގެ މެނޭޖްމަންޓް ޕްލޭން ވެލިޑޭޝަން ވޯކްޝޮޕް ބާއްވައިފި

ސައުތު އަރި މެރިން ޕްރޮޓެކްޓެޑް އޭރިއާގެ މެނޭޖްމަންޓް ޕްލޭން ވެލިޑޭޝަން ވޯކްޝޮޕް ބާއްވައިފި

ސައުތު އަރި މެރިން ޕްރޮޓެކްޓެޑް އޭރިއާގެ މެނޭޖްމަންޓް ޕްލޭން ވެލިޑޭޝަން ވޯކްޝޮޕް ފޮޓޯ:ވުޒާރާ

އާމިނަތު ޔުމްނާ

އާމިނަތު ޔުމްނާ

19 ޖެނުއަރީ 2025، 09:36

19 ޖެނުއަރީ 2025، 09:36

މިނިސްޓްރީ އޮފް ކްލައިމެޓް ޗޭންޖް، އެންވަޔަރަންމަންޓް އެންޑް އެނަރޖީގެ ފަރާތުން އިސްނަގައިގެން، ސައުތު އަރި މެރިން ޕްރޮޓެކްޓެޑް އޭރިއާ (ސަމްޕާ) ގެ މެނޭޖްމަންޓް ޕްލޭން ވެލިޑޭޝަން ވޯކްޝޮޕެއް  އަރިއަތޮޅު ދެކުނުބުރީ މާމިގިލީގައި ބާއްވައިފިއެވެ.

މި ވޯކްޝޮޕްގައި 80 އަށްވުރެ ގިނަ ބައިވެރިން ބައިވެރިވެފައިވެއެވެ. މީގެ ތެރޭގައި އެ ސަރަޙައްދުގައި މަސައްކަތްކުރާ ގައިޑުންނާއި، އުޅަނދުފަހަރުގެ ފަޅުވެރިންނާއި، ކެޕްޓަނުންނާއި، ޓުއަރ އޮޕަރޭޓަރުންނާއި އަދި އެން.ޖީ.އޯތައް ހިމެނެއެވެ.

މި ވޯކްޝޮޕްގެ މައިގަނޑު މަޤްޞަދަކީ ސަމްޕާގެ މެނޭޖްމަންޓް ޕްލޭން އިތުރަށް ފުރިހަމަކޮށް، އެ ސަރަޙައްދުގެ ޤުދުރަތީ ވަސީލަތްތައް ހިމާޔަތްކުރުމާއެކު، އެކި ފަރާތްތަކުގެ ބޭނުންތައް ފުއްދައިދިނުމެވެ.

ވޯކްޝޮޕްގައި މައިގަނޑު ގޮތެއްގައި މަޝްވަރާކުރެވުނީ މެނޭޖްމަންޓް ޕްލޭން ޝާއިޢުކުރުމަށްފަހު ފުރަތަމަ ތިން މަސްދުވަހު ތަންފީޒުކުރާނެ ކަންތައްތަކާ ބެހޭގޮތުންނެވެ. މީގެ އިތުރުން، "ވޭލްޝާކާ" ފަދަ މިޔަރާއި މުޢާމަލާތްކުރުމުގެ އުސޫލުތަކާއި، ހިމާޔަތްކޮށްފައިވާ ސަރަޙައްދުތަކުގެ ވެބްސައިޓް މެދުވެރިކޮށް ބުކިންގ ހެދުމުގެ ޕްރޮސެސްއާ ބެހޭގޮތުންވެސް މަޝްވަރާކުރެވުނެވެ.

ސައުތު އަރި މެރިން ޕްރޮޓެކްޓެޑް އޭރިއާއަކީ ކަނޑުގެ ދިރުންތަކުގެ ނަމުގައި ދުނިޔޭގައި މަޝްހޫރު ސަރަޙައްދެކެވެ. މި ސަރަޙައްދުގެ އެންމެ ފާހަގަކޮށްލެވޭ އެއް ޚާއްޞަ ކަމަކީ އަހަރު ތެރޭގައި ކޮންމެ ވަގުތެއްގައިވެސް ވޭލަޝާކް ބެލުމުގެ ފުރުސަތު ލިބުމެވެ.. މި ސަބަބަށްޓަކައި ދުނިޔޭގެ އެކި ކަންކޮޅުތަކުން ފަތުރުވެރިން މި ސަރަޙައްދަށް ޒިޔާރަތްކުރެއެވެ. މީގެ އިތުރުން، މި ސަރަޙައްދުގައި ކުލަގަދަ މުރަކަތަކާއި، ކަހަނބު، މަޑިއްޔާ އަދި އެކި ބާވަތުގެ އާނގަ ފަދަ ކަނޑުގެ ދިރުންތައް ގިނައިން އުޅެއެވެ.

މި މެނޭޖްމަންޓް ޕްލޭން ތައްޔާރުކޮށްފައިވަނީ ސަމްޕާގެ ޤުދުރަތީ ވަސީލަތްތަކާއި މާޙައުލު ދެމެހެއްޓެނިވި ގޮތެއްގައި ބޭނުންކުރެވޭނެ ގޮތްތައް ކަށަވަރުކުރުމަށާއި، އެ ސަރަޙައްދަށް ޒިޔާރަތްކުރާ ފަރާތްތަކަށް ރައްކާތެރި އަދި އުފާވެރި ތަޖުރިބާއެއް ފޯރުކޮށްދިނުމަށެވެ. އަދިމި ޕްލޭންގެ ސަބަބުން އެ ސަރަޙައްދުގެ އިޖްތިމާޢީ އަދި އިޤްތިޞާދީ ފައިދާތައް އިތުރުވެ، ސައުތު އަރި މެރިން ޕްރޮޓެކްޓެޑް އޭރިއާ ކަނޑުގެ ދިރުންތައް ހިމާޔަތްކުރުމާއި އީކޯ ޓޫރިޒަމްގެ ރޮނގުން ދުނިޔޭގެ ފެންވަރުގެ މަންޒިލަކަށް ހެދުމަށް މަގުފަހިވެގެންދާނެއެވެ.




                    


                    

މި ލިޔުން ކިޔާލުމުން

Ads by MSS