ޑިވެލޮޕްމަންޓް ބޭންކް އުފެއްދުމުގެ މަސައްކަތް ދަނީ ރޭވިފައިވާގޮތަށް ކުރިއަށް: ވަޒީރު ސައީދު

ރާއްޖޭގެ އިޤްތިޞާދީ ތަރައްޤީއަށް އައު މަގެއް ފަހިކޮށްދޭނެ  ބޭންކް "ޑިވެލޮޕްމަންޓް ބޭންކް އޮފް މޯލްޑިވްސް" އުފެއްދުމުގެ މަސައްކަތް ރޭވިފައިވާ ގޮތަށް ކުރިއަށްދާ ކަމަށް އިޤްތިޞާދީ ތަރައްޤީއާއި ވިޔަފާރިއާ ބެހޭ ވަޒީރު މުޙައްމަދު ސައީދު ހާމަކުރައްވައިފިއެވެ.

ވަޒީރު މިކަން ހާމަކުރެއްވީ  އެކްސް  ޕޯސްޓެއްގައެވެ. އެ ޕޯސްޓުގައި ވަޒީރު ވިދާޅުވި ގޮތުގައި ޑިވެލޮޕްމަންޓް ބޭންކް އުފެއްދުމުގެ މަސައްކަތް ބަހާލެވިފައިވަނީ ތިން މަރުހަލާއަކަށެވެ. މީގެ ތެރެއިން ފުރަތަމަ މަރުހަލާ ކަމުގައިވާ އިދާރީ އޮނިގަނޑު ޤާއިމުކުރުމުގެ މަސައްކަތް މިހާރު ދަނީ ރޭވިފައިވާ ގޮތަށް ކުރިއަށެވެ.

ވަޒީރު އިތުރަށް ވިދާޅުވި ގޮތުގައި ތަރައްޤީގެ ބޭންކުގެ ވިޔަފާރި މޮޑެލް އަމާޒުކުރެވިފައިވަނީ މައިގަނޑު ގޮތެއްގައި އިންސްޓިޓިއުޝަނަލް އިންވެސްޓަރުންނަށާއި ބޮޑެތި އުމްރާނީ ތަރައްޤީގެ މަޝްރޫޢުތަކަށެވެ. އަދި ކުރިމަގުގައި ރީޓެއިލް ޚިދުމަތްތައް ތަޢާރަފުކުރުމަށް ވެސް ވަނީ ރޭވިފައެވެ. މި ގޮތަށް މަރުހަލާތަކަކަށް ބަހާލައިގެން ކުރިއަށް ގެންދިއުމުގެ މަޤްޞަދަކީ އިޤްތިޞާދު ހަރުދަނާކޮށް ވަރުގަދަކުރުމަށް ކުރެވޭ މަސައްކަތްތަކާ އެއްހަމައެއްގައި މި މަސައްކަތް ގެންދިއުމެވެ.

1/3 The rollout of the Development Bank of Maldives is structured into three phases, with the first phase - the institutional setup, which is progressing on schedule.

— Mohamed Saeed (@em_saeed) January 19, 2025

މީގެ އިތުރުން ވަޒީރު ފާހަގަކުރެއްވި ގޮތުގައި ހަމައެކަނި ތަރައްޤީގެ ބޭންކު އުފެއްދުމުގެ މަސައްކަތް ނޫން، މުޅި އިޤްތިޞާދީ ދާއިރާގައި ވެސް މިހާރު ވަނީ އިސްތިޤްރާރުކަން ގެނެވިފައެވެ. މިއީ ކުރީގެ ސަރުކާރުން ދޫކޮށްލާފައި ދިޔަ، ދައުލަތުގެ މާލިއްޔަތު ބެލެހެއްޓުމުގައި އެއްވެސް ޒިންމާދާރުކަމެއް ނެތް ހާލަތުން އަރައިގަނެވި، ކުރިއަށް ދެވިފައިވާ ކަމެއް ކަމުގައި ވަޒީރު ވިދާޅުވިއެވެ.