ޚަބަރު
މަދަނީ ޖަމްޢިއްޔާތަކާއި ވަޒީރު ވަޙީދު ބައްދަލުކުރައްވައިފި

މަދަނީ ޖަމްޢިއްޔާތަކާއި ބައްދަލުކުރެއްވުމުގެ ތެރެއިން ފޮޓޯ: ސަރުކާރު
މިނިސްޓަރ އޮފް ޔޫތު އެމްޕަވަރމަންޓް، އިންފޮމޭޝަން އެންޑް އާރޓްސް، އިބްރާހިމް ވަޙީދު، މާލޭގެ މަދަނީ ޖަމްޢިއްޔާތަކާއެކު ބައްދަލުވުމެއް ބާއްވައިފިއެވެ. މި ބައްދަލުވުން ބޭއްވުނީ އިއްޔެ ހަވީރު، ޒުވާނުންގެ އިތުރުވެހި (ކުރީގެ މުލިއާގެ ވެހިކަލް ގަރާޖު) ގައެވެ. މި ބައްދަލުވުމުގައި 100 އަށްވުރެ ގިނަ މަދަނީ ޖަމްޢިއްޔާތަކުން ބައިވެރިވިއެވެ.
މިދިޔަ އަހަރުގެ މެއި މަހު، މަދަނީ ޖަމްޢިއްޔާތަކުން ހިންގާ މުޖުތަމަޢު ބާރުވެރިކުރުމުގެ މަޝްރޫޢުތަކާއި ހަރަކާތްތައް ހިންގުމަށް ފައިސާގެ އެހީ ދިނުމަށް ނިންމައި އިޢުލާނުކުރެވުނެވެ. މި ފިޔަވަހީގައި ކުދި، މެދު އަދި ބޮޑެތި މަޝްރޫޢުތަކާއި ހަރަކާތްތައް ހިންގުމަށް އެހީ ދިނުމަށް ވަނީ ހަމަޖެހިފައެވެ.
މި އެހީ ދިނުމުގެ މައިގަނޑު މަޤްޞަދަކީ މުޖުތަމަޢު ބާރުވެރިކުރުމަށް މަދަނީ ޖަމްޢިއްޔާތަކުން ކުރަމުންދާ މަސައްކަތްތައް ފާހަގަކޮށް، އެފަދަ މަސައްކަތްތަކަށް އެއްބާރުލުންދީ އެހީތެރިކަން ފޯރުކޮށްދިނުމާއެކު، ޤައުމީ ތަރައްޤީގައި މަދަނީ ޖަމްޢިއްޔާތަކުގެ ދައުރު ފުޅާކުރުމެވެ.
ބައްދަލުވުމުގައި މަދަނީ ޖަމްޢިއްޔާތަކުން ފާހަގަކުރި މައިގަނޑު ކަންބޮޑުވުމަކީ ޕްރޮގްރާމްތައް ހިންގުމަށް ޖާގައިގެ ދަތިކަމެވެ. މިކަމާ ގުޅޭގޮތުން މިނިސްޓަރ ވަޙީދު ވިދާޅުވީ، ޒުވާނުންގެ އިތުރުވެހީގެ މަސައްކަތް ނިމުމުން މި މައްސަލައަށް ޙައްލެއް ލިބޭނެ ކަމަށެވެ.