ފެހުރިހި ހިމާޔަތްކުރުމަށް މުހިންމު ފިޔަވަޅުތަކެއް އަޅަނީ

ފެހުރިހި ހިމާޔަތްކުރުމާއި، އޭގެ ޤުދުރަތީ މާހައުލު ދެމެހެއްޓެނިވި ގޮތެއްގައި ރައްކާތެރިކުރުމަށްޓަކައި އައު ފިޔަވަޅުތަކެއް އަޅަން ސަރުކާރުން ނިންމައިފިއެވެ. މިގޮތުން ފެހުރިހި ބަލަން ދާ އުޅަނދުތަކުގެ ބުރަފަތީގައި ގާޑް އަޅުވަންޖެހޭ ގޮތް ހެދުމަށް ނިންމާފައިވާކަމަށް މޫސުމީ ބަދަލުތަކާއި ތިމާވެއްޓާއި ހަކަތައާ ބެހޭ ވަޒީރު ޠާރިޤު އިބްރާހީމް ވިދާޅުވެއްޖެއެވެ.

ވަޒީރު މިހެން ވިދާޅުވީ ޕީއެސްއެމް ނިއުސްގެ ރާއްޖެމިއަދު ޕްރޮގްރާމުގައި ހިމާޔަތްކޮށްފައިވާ ސަރަޙައްދުތައް ބެލެހެއްޓުމަށް ކުރާ މަސައްކަތްތަކާ ބެހޭގޮތުން ވާހަކަދައްކަވަމުންނެވެ. ވަޒީރުގެ ވާހަކަފުޅުގައި، ރާއްޖޭގައި 93 ސަރަހައްދެއް ހިމާޔަތްކޮށްފައި އޮތްނަމަވެސް އޭގެ ތެރެއިން ބެލެހެއްޓެނީ 5 ތަނެއްކަން ފާހަގަކުރެއްވިއެވެ.

ވަޒީރު ވިދާޅުވިގޮތުގައި، އދ. އަތޮޅުގައި ހިމާޔަތްކޮށްފައިވާ ސައުތު އަރި މެރިން ޕާކް (ސަމްޕާ) ސަރަޙައްދަކީ ކޮންމެ ދުވަހެއްގައިވެސް ގިނަ އަދަދެއްގެ ފަތުރުވެރިން ޒިޔާރަތް ކުރާ ސަރަޙައްދެކެވެ. ނަމަވެސް، މިއީ ރާއްޖޭގައި ހިމާޔަތްކޮށްފައިވާ ސަރަޙައްދުތަކުގެ ތެރެއިން އެންމެ ބޮޑު ސަރަޙައްދު  ކަމުގައިވީނަމަވެސް، އެ ސަރަޙައްދު ރަނގަޅަށް ނުބެލެހެއްޓުމުގެ ސަބަބުން ގިނަ ހާދިސާތަކެއް ހިނގާފައިވާކަން ވަޒީރު ފާހަގަކުރެއްވިއެވެ.

މި މައްސަލަ ހައްލުކުރުމަށްޓަކައި، ކުރިއަށް އޮތް 3 މަސްދުވަހުގެ ތެރޭގައި އައު ފިޔަވަޅުތަކެއް އަޅަން ފަށާނެކަމަށް ވަޒީރު ވިދާޅުވިއެވެ. މީގެ ތެރޭގައި ފެހުރިހި ބަލަން ދާ އުޅަނދުތަކުގެ ބުރަފަތީގައި ގާޑް އަޅުވަންޖެހޭ ގޮތް ހެދުމާއި، ފެހުރިހި ބަލަން ފަތުރުވެރިން ގޮވައިގެން ދާ އުޅަނދުތައް ރަޖިސްޓްރީވާންޖެހޭ ގޮތަށް ހެދުން ހިމެނެއެވެ. އަދި މި ކަންކަން ހިމެނޭ ޚާއްސަ ޤަވާއިދެއް ވަރަށް އަވަހަށް ގެޒެޓްކުރާނެކަމަށްވެސް ވަޒީރު ވިދާޅުވިއެވެ.

މީގެ އިތުރުން، ފެހުރިހި ބެލުމަށް ފަތުރުވެރިން ގޮވައިގެން ގޮސް އުޅޭ ގޮތް މޮނިޓަރ ކުރުމަށްޓަކައި ޚާއްސަ ލޯންޗެއްވެސް ހަމަޖައްސާފައިވާކަމަށް ވަޒީރު ވިދާޅުވިއެވެ.

މި ފިޔަވަޅުތަކަކީ މިދިޔަ އަހަރު އެކުލަވާލެވުނު ފެހުރިހި ހިމާޔަތްކުރުމާ ބެހޭ އައު ޤާނޫނީ އުސޫލުގެ ބައެއްކަން ފާހަގަކޮށްލެވެއެވެ. މި އުސޫލުގައި ފެހުރިހީގެ ވަށައިގެންވާ 250 މީޓަރުގެ ސަރަޙައްދަކީ "ކޮންޓެކްޓް ޒޯން" ގެ ގޮތުގައި ކަނޑައަޅާފައިވާ ސަރަޙައްދެއްކަމާއި، މި ޒޯނުގައި އެއްފަހަރާ ޙަރަކާތްތެރިވެވޭނީ ގިނަވެގެން 3 އުޅަނދަށްކަން ބަޔާންކޮށްފައިވެއެވެ.

އަދި ކޮންޓެކްޓް ޒޯނުގައި އުޅަނދުފަހަރުގެ ދުވެލި ގަޑިއަކު 5 ނޮޓަށްވުރެ އިތުރުވެގެން ނުވާނެކަމާއި، ފެހުރިހީގެ 50 މީޓަރު ސަރަޙައްދުގެ ތެރޭގައި އުޅަނދުފަހަރުގެ ދުވެލި ބަހައްޓަންވާނީ ގަޑިއަކު 2 ނޮޓުގައިކަންވެސް މި އުސޫލުގައި ބަޔާންކޮށްފައިވެއެވެ. ނަމަވެސް، ކުއްލި ނުރައްކަލުގެ ޙާލަތެއްގައި ކޮންޓެކްޓް ޒޯނުން ނުކުތުމަށް ގަޑިއަކު 5 ނޮޓަށްވުރެ ބާރަށް ދުއްވުމުގެ ހުއްދަ ދީފައިވާކަންވެސް ފާހަގަކުރެވެއެވެ.

މި އައު ފިޔަވަޅުތަކުގެ މަޤްޞަދަކީ ރާއްޖޭގެ ފެހުރިހީގެ މާޙައުލު ރައްކާތެރިކޮށް، ދެމެހެއްޓެނިވި ގޮތެއްގައި ބެލެހެއްޓުމެވެ. މިކަމުގެ ސަބަބުން ފެހުރިހި ބެލުމަށް އަންނަ ފަތުރުވެރިންނަށް ރައްކާތެރި އަދި ޒިންމާދާރު ގޮތެއްގައި މި ތަޖުރިބާ ކުރެވޭނެކަމަށް އުންމީދު ކުރެވެއެވެ.