Ads by Exprox

ޚަބަރު

ބިދޭސީންގެ ބަޔޮމެޓްރިކްސް ނެގުން އެޕްރީލް މަހު ނިންމުމަށްފަހު ދެވަނަ ފިޔަވަހީގައި ޤަވާއިދާ ޚިލާފަށް އުޅޭ މީހުން ފޮނުވާލަނީ

ބިދޭސީންގެ ބަޔޮމެޓްރިކްސް ނެގުން އެޕްރީލް މަހު ނިންމުމަށްފަހު ދެވަނަ ފިޔަވަހީގައި ޤަވާއިދާ ޚިލާފަށް އުޅޭ މީހުން ފޮނުވާލަނީ

ބިދޭސީންގެ މަޢުލޫމާތު އެއްކުރުމަށް މާލޭ ސަރަޙައްދުގައި ހިންގި އޮޕަރޭޝަންގެ ތެރެއިން، ފޮޓޯ: މިނިސްޓްރީ އޮފް ހޯމްލޭންޑް ސެކިއުރިޓީ އަދި ޓެކްނޮލޮޖީ

މިފްތާޙް މުޙައްމަދު

މިފްތާޙް މުޙައްމަދު

19 ޖެނުއަރީ 2025، 02:09

19 ޖެނުއަރީ 2025، 02:09

ހުލާސާ

އޮޕަރޭޝަންގެ ދެވަނަ ފިޔަވަހީގައި ޤަވާއިދާ ޚިލާފަށް އުޅޭ ބިދޭސީންނަށް އިތުރު ފުރުޞަތެއް ނުދޭނެކަމަށް ސްޓޭޓް މިނިސްޓަރ ވިދާޅުވި.

ރާއްޖޭގައި ޤަވާއިދާ ޚިލާފަށް އުޅޭ ބިދޭސީ މަސައްކަތްތެރިންގެ މައްސަލަ ޙައްލު ކުރުމުގެ ގޮތުން މިނިސްޓްރީ އޮފް ހޯމްލޭންޑް ސެކިއުރިޓީ އަދި ޓެކްނޮލޮޖީން ފަށާފައިވާ "އޮޕަރޭޝަން ކުރަނގި"ގެ ފުރަތަމަ މަރުހަލާ މި އަހަރުގެ އެޕްރީލް މަހު ނިންމާލުމަށްފަހު ދެން އޮންނާނީ ޤަވާއިދާ ޚިލާފަށް އުޅޭ ބިދޭސީން ފޮނުވާލުންކަމަށް އެ މިނިސްޓްރީ އިން ބުނެފިއެވެ.

ޕީއެސްއެމް ނިއުސްގެ ރާއްޖެމިއަދު ޕްރޮގްރާމްގައި ވާހަކަފުޅު ދައްކަވަމުން މިނިސްޓްރީ އޮފް ހޯމްލޭންޑް ސެކިއުރިޓީ އަދި ޓެކްނޮލޮޖީގެ ސްޓޭޓް މިނިސްޓަރ، އަލްއުސްތާޛު އަޙްމަދު ޞިއްދީޤު ވިދާޅުވީ، ރާއްޖޭގައި އުޅޭ ހުރިހާ ބިދޭސީންގެ އިނގިލީގެ ނިޝާން ނެގުމުގެ މަސައްކަތް މި އަހަރުގެ އޭޕްރީލް މަހަށް ނިންމާލެވޭނެކަމަށާއި، އަދި އެއަށްފަހު ދެވަނަ ފިޔަވަހީގައި ކުރިއަށްދާނީ ޤަވާއިދާ ޚިލާފަށް އުޅޭ ބިދޭސީން ފޮނުވާލުމުގެ މަސައްކަތްކަމަށެވެ.

ޞިއްދީޤު ފާހަގަކުރެއްވެވި ގޮތުގައި، ބިދޭސީން ފޮނުވާލުމުގެ އޮޕަރޭޝަން ކުރިޔަށްދާނީ  އިމިގްރޭޝަނުން މިހާރު ކުރިއަށްގެންދާ އޮޕަރޭޝަނާ ތަފާތު ޕްރޮގްރާމެއްގެ ގޮތުގައެވެ. އަދި މި ޕްރޮގްރާމުގައި އިމިގްރޭޝަނާއި ފުލުހުން ވެސް ބައިވެރިވާނެކަމަށް ފާހަގަކޮށްފައިވެއެވެ.

"އޮޕަރޭޝަން ކުރަނގި"ގެ ބޮޑު ހަރަކާތެއް ހޮނިހިރު ދުވަހު މާލޭ ސަރަޙައްދުގައި ކުރިޔަށް ގެންގޮސްފައިވާއިރު، މި ހަރަކާތާއެކު މިހާރު 25،483 ބިދޭސީންގެ ބަޔޮމެޓްރިކްސް މަޢުލޫމާތު ވަނީ އެއްކުރެވިފައެވެ.

މި މަޢުލޫމާތުގެ ބޭނުންކުރާނެ ގޮތް ކިޔާދެއްވަމުން ޞިއްދީޤު ވިދާޅުވީ، އޮޕަރޭޝަންގެ ފުރަތަމަ ފިޔަވަހި ނިމުމުން، ބިދޭސީންގެ ފޮޓޯ އަދި އިނގިލީގެ ނިޝާން ބޭނުންކޮށްގެން އެމީހާގެ ވަނަވަރު ދެނެގަނެވޭނެ ކަމަށެވެ.

މީގެ އިތުރުން، އޮޕަރޭޝަންގެ ދެވަނަ ފިޔަވަހީގައި ޤަވާއިދާ ޚިލާފަށް އުޅޭ ބިދޭސީންނަށް އިތުރު ފުރުޞަތެއް ނުދޭނެކަމަށް ވެސް ސްޓޭޓް މިނިސްޓަރ ވަނީ ވިދާޅުވެފައެވެ.

"އޮޕަރޭޝަން ކުރަނގި" ފަށާފައިވަނީ މިދިޔަ އަހަރުގެ މެއި މަހުއެވެ. މި އޮޕަރޭޝަނުގައި ރަށްރަށުގައި އުޅޭ ބިދޭސީންގެ މަޢުލޫމާތު އެއްކުރަނީ އެ ރަށްރަށުގެ ކައުންސިލްތަކުގައި ބިދޭސީންގެ ބަޔޯމެޓްރިކްސް ނެގޭނެ އިންތިޒާމު ޤާއިމްކޮށްގެންނެވެ. 

މި ލިޔުން ކިޔާލުމުން

Ads by MSS