ދުއިސައްތައަށް ވުރެން ގިނަ ބައިވެރިންނާއެކު ފުލުހުންގެ އަސާސީ ތަމްރީނު ކޯހުގެ އައު ބުރެއް ފަށައިފި

ފުލުހުންގެ ވަޒީފާއަށް ބޭނުންވާ ތަމްރީނާއި ތަރުބިއްޔަތު އުނގަންނައިދީ، ފުލުހުންގެ މަސައްކަތަށް ބޭނުންވާ ޢިލްމީ ޤާބިލުކަމާއި ހުނަރާއި ތަޖުރިބާ ލިބިދިނުމަށް ކުރިއަށް ގެންދާ އަސާސީ ތަމްރީނު ކޯހުގެ 39ވަނަ ބުރު ފަށައިފިއެވެ.

މި ކޯސް ފެށުމުގެ ގޮތުން ހޮނިހިރު ދުވަހު ވަނީ ޙާއްސަ ރަސްމިއްޔާތެއް ބާއްވާފައެވެ. މި ރަސްމިއްޔާތު ބާއްވާފައިވަނީ ކޯސް ކުރިޔަށް ގެންދިއުމަށް ހަމަޖެހިފައިވާ ނޭޝަނަލް ކޮލެޖް އޮފް ޕޮލިސިންގ އެންޑް ލޯ އެންފޯސްމަންޓުގެ އައްޑޫ ސިޓީ ކެމްޕަހުގައެވެ. 

ޖުމްލަ 210 ބައިވެރިންނާއެކު މި ކޯސް ފެށުމަށް ބޭއްވި ޙާއްސަ ރައްމިއްޔާތު ޝަރަފުވެރިކޮށްދެއްވާފައިވަނީ، ނޭޝަނަލް ކޮލެޖް އޮފް ޕޮލިސިންގ އެންޑް ލޯ އެންފޯސްމަންޓުގެ އެގްޒެކެޓިވް ޑިރެކްޓަރ، އެސިސްޓެންޓް ކޮމިޝަނަރ އޮފް ޕޮލިސް، އަޙްމަދު ޢަބްދުއް ރަޙްމާންއެވެ. މީގެ އިތުރުން، މި ރަސްމިއްޔާތުގައި ކޮލެޖުގެ އެކި ޑިޕާޓްމަންޓުތަކުގެ އިސްވެރިންނާއި މުވައްޒަފުންނާއި މުދައްރިސުން ބައިވެރިވެލެއްވިއެވެ.

ކޯހުގެ ކިޔެވުން މިއަދު ފަށާފައިވާއިރު، ކިޔެވުން ކުރިޔަށްދާނީ 17 ހަފްތާގެ މުއްދަތަށެވެ. 

މިފަހަރުގެ ކޯހުގައި ހިމެނެނީ 48 އަންހެން ފުލުހުންނާއި 162 ފިރިހެން ފުލުހުންނެވެ. 

މި ކޯހުގައި ފިޒިކަލް ޓްރެއިނިންގ، އޮޕަރޭޝަނަލް ސޭފްޓީ އެންޑް ޓެކްޓިކްސް، އަދި ޤާނޫނާއި ޤަވާއިދުތަކުގެ އިތުރުން، ފުލުހުންގެ މަސައްކަތްތަކާ ގުޅުންހުރި ބައިތައް ކިޔަވައިދޭނެއެވެ.