90 އަށްވުރެ ގިނަ ބަނގުރާ ފުޅިތަކެއްގެ މައްސަލައިގައި ބިދޭސީއަކު ޑީޕޯޓުކުރުމަށް އިމިގްރޭޝަނާ ހަވާލުކޮށްފި

90 އަށްވުރެން ގިނަ ބަނގުރާ ފުޅިތަކެއްގެ މައްސަލައިގައި ބިދޭސީއަކު ޑީޕޯޓުކުރުމަށް މޯލްޑިވްސް ޕޮލިސް ސަރވިސަސް އިން، މޯލްޑިވްސް އިމިގްރޭޝަނާ ހަވާލުކޮށްފިއެވެ.

ފުލުހުން ހާމަކޮށްފައިވާ ގޮތުގައި، އެ ބިދޭސީ މީހާގެ މައްޗަށް ތުޙުމަރުކުރަނީ ޤަވާއިދާ ޚިލާފަށް ބަނގުރާ ގެންގުޅުނުކަމުގެ މައްސަލައެވެ.

މި މައްސަލައިގައި އިމިގްރޭޝަނާއި ހަވާލުކޮށްފައިވަނީ، ބަނގުލަދޭޝްއަށް ނިސްބަތްވާ ފިރިހެނެކެވެ. މުޙައްމަދު ޢާރިފް މިއާ ކިޔާ މި މީހާގެ އުމުރަކީ 31 އަހަރެވެ.

ފުލުހުންގެ ޑްރަގް އެންފޯސްމަންޓާއި ކައުންޓަރ ނާކޮޓިކްސް އިންޓެލިޖެންސް ގުޅިގެން މިދިޔަ ހުކުރު ދުވަހުގެ ރޭ މާލޭގައި ހިންގި މި އޮޕަރޭޝަނުގައި އޭނާއާ ގުޅުންހުރިކަމަށް ބެލެވޭ ތަނެއް ބަލައިފާސްކުރި އިރު، މަސްތުވާތަކެތިކަމަށް ބެލެވޭ އެއްޗެއްހުރި ރަބަރު ޕެކެޓެއް ވަނީ ފެނިފައިވެއެވެ. އޭގެ ބަރުދަނުގައި 1.05 ގްރާމް ހުރިކަމަށް ފުލުހުން ހާމަކޮށްފައި ވެއެވެ.

މީގެ އިތުރުން 92 ބަަނގުރާ ފުޅި ވެސް ވަނީ އެ ތަނުން ފެނިފައިވެއެވެ. 

ފުލުހުން ހާމަކޮށްފައިވާ ގޮތުގައި، މި އޮޕަރޭޝަނަކީ ޤަވާޢިދާ ޚިލާފަށް ބަނގުރާ ގެންގުޅެ، ބޭނުންކޮށް، ވިޔަފާރިކޮށް އަދި މަސްތުވާތަކެތި ބޭނުންކޮށް، ގެންގުޅެ އަދި ވިޔަފާރިކުރާކަމަށް ކައުންޓަރ ނާކޮޓިކްސް އިންޓެލިޖެންސަށް ލިބުނު މަޢުލޫމާތަކާ ގުޅިގެން ހިންގި އޮޕަރޭޝަނެކެވެ.