Ads by Exprox

ޚަބަރު

ވަޒީރުންނަށް ރުހުންދޭން ކޮމެޓީގެ އިއްތިފާގުން ފާސްކޮށްފި

ވަޒީރުންނަށް ރުހުންދޭން ކޮމެޓީގެ އިއްތިފާގުން ފާސްކޮށްފި

އަލަށް އައްޔަންކުރެއްވި ވަޒީރުން ހުވާކުރެއްވުން، ފޮޓޯ: ރައީސް އޮފީސް

މިފްތާޙް މުޙައްމަދު

މިފްތާޙް މުޙައްމަދު

19 ޖެނުއަރީ 2025، 04:43

19 ޖެނުއަރީ 2025، 04:43

ހުލާސާ

ރައީސުލްޖުމްހޫރިއްޔާ ކެބިނެޓަށް ބަދަލުތަކެއް ގެންނެވީ މިދިޔަ އަހަރުގެ ޑިސެންބަރު މަހުގެ 26ވަނަ ދުވަހު.

ރައީސުލްޖުމްހުރިއްޔާ ޑޮކްޓަރ މުޙައްމަދު މުޢިއްޒުގެ ކެބިނެޓަށް ގެންނެވި ބަދަލުތަކާއެކު އަލުން ޢައްޔަންކުރެއްވި ހަތަރު ވަޒީރުންނަށް ރުހުން ދިނުމަށް، ރައްޔިތުންގެ މަޖިލީހުގެ ސަރުކާރުގެ މަސްއޫލިއްޔަތު އަދާކުރާ ކޮމިޓީގެ އިއްތިފާގުން ނިންމައިފިއެވެ.

ރައީސުލްޖުމްހޫރިއްޔާ ކެބިނެޓަށް ބަދަލުތަކެއް ގެންނެވީ މިދިޔަ އަހަރުގެ ޑިސެންބަރު މަހުގެ 26ވަނަ ދުވަހުއެވެ. 

އެގޮތުން ފިނޭންސް މިނިސްޓްރީއަށް އައްޔަން ކުރެއްވީ މޫސާ ޒަމީރެވެ. އަދި މިނިސްޓަރ އޮފް ކޮންސްޓްރަކްޝަން، ހައުސިންގ އެންޑް އިންފްރާސްޓްރަކްޗަރއަށް ޑރ. ޢަބްދުﷲ މުއްޠަލިބް އައްޔަންކުރެއްވިއިރު، މިނިސްޓަރ އޮފް ހަޔަރ އެޑިޔުކޭޝަން، ލޭބަރ އެންޑް ސްކިލްސް ޑިވެލޮޕްމަންޓަށް އައްޔަންކުރެއްވީ ޑރ. ޢަލީ ޙައިދަރު އަޙްމަދެވެ. މީގެ އިތުރުން ދެން ބަދަލު ގެންނެވީ މިނިސްޓްރީ އޮފް އެގްރިކަލްޗަރ އެންޑް އެނިމަލް ވެލްފެއަރއަށެވެ. މި މިނިސްޓްރީއަށް އައްޔަންކުރެއްވީ ޑރ. މަރްޔަމް މާރިޔާއެވެ.

މި ހަތަރު ވަޒީރުންނަށް ރުހުން ހޯއްދެވުމަށް ރައީސުލްޖުމްހޫރިއްޔާ ހުށަހެޅުއްވި މައްސަލަ ސަރުކާރުގެ މަސްއޫލިއްޔަތު އަދާކުރާ މިންވަރު ބަލާކޮމިޓީއަށް ފޮނުވުމަށް ނިންމީ، މިދިޔަ ބުރާސްފަތި ދުވަހު، ދައުރުން ބޭރުން ބޭއްވި މަޖިލީހުގެ ޖަލްސާގައެވެ.

މިއަދު ކުރިޔަށްދިޔަ ކޮމެޓީގެ ބަހުސްގައި ފުވައްމުލަކު މެދު ދާއިރާގެ މެންބަރު އަލީ ފަޒާދު ވިދާޅުވީ، މި ހަތަރު ބޭފުޅުންނަކީ ވެސް ކުރިން ރުހުން ލިބިވަޑައިގެން ތިއްބެވި ވަޒީރުން ކަމަށާއި، އަދި އެބޭފުޅުންގެ އެއްވެސް މައްސަލައެއް މިހާތަނަށް ދިމާވެފައި ނުވުމުން، ހަތަރު ވަޒީރުންނަށްވެސް ރުހުން ދިނުމަށް ފެންނަކަމަށެވެ.

އަދި ކޮމެޓީގެ އިއްތިފާގުން ވަނީ ފަޒާދުގެ މި ހުށަހެޅުމަށް ތާޢީދުކޮށްފައެވެ. 

ވަޒީރުންނަށް ރުހުން ދޭނީ ކޮމިޓީ ރިޕޯޓް ތަޅުމަށް ހުށަހެޅުމަށްފަހު މެންބަރުންގެ މެދުގައި ބަހުސްކުރުމަށްފަހު ނަގާ ވޯޓަކުންނެވެ. އަދި ވަޒީރުންނަށް ޤާނޫނީ ހައިސިއްޔަތު ލިބިވަޑައިގަންނަވާނީ މަޖިލީހުން ރުހުން ލިބުމުންނެވެ.

މި ލިޔުން ކިޔާލުމުން

Ads by MSS