ޚަބަރު
ބޯން މެރޯ ހެދުމަށް ސަރުކާރުން ރާއްޖެއިން ބޭރަށް ފޮނުވި ކުދިންތަކުގެ ތެރެއިން 6 ކުއްޖަކު ފަރުވާ ފުރިހަމަކޮށްފި
މީހެއްގެ ގަޔަށް ލޭ އަޅަނީ، ފޮޓޯ: މިހާރު
ހުލާސާ
އަހަރަކު 10 ކުއްޖަކަށް މި ފުރުސަތުދީ، ފަސް އަހަރު ދުވަހުގެ ތެރޭގައި 50 ކުދިންގެ ބޯން މެރޯ ހެދުމުގައި މާލީ އެހީތެރިކަން ދިނުމަށް ސަރުކާރުން ވަނީ ނިންމާފައި.
ބޯން މެރޯ ހެދުމަށް ސަރުކާރުން ރާއްޖެއިން ބޭރަށް ފޮނުވި ކުދިންތަކުގެ ތެރެއިން ފަރުވާ ފުރިހަމަކުރުމަށްފަހު 6 ކުއްޖަކު ރާއްޖެ އައިސްފިއެވެ.
މި ކަމަކީ ރައީސުލްޖުމްހޫރިއްޔާ ޑޮކްޓަރ މުޙައްމަދު މުޢިއްޒުގެ ރިޔާސީ ވަޢުދުފުޅުތަކުގެ ތެރޭގައި ހިމެނޭ ކަމެކެވެ. އެގޮތުން އެ ކުދިންގެ ފަރުވާގެ ކަންތައްތައް ހަމަޖެއްސުމަށް ނިންމާފައިވަނީ ޒަކާތު ފަންޑުންނެވެ. އަދި އަހަރަކު 10 ކުއްޖަކަށް މި ފުރުސަތުދީ، ފަސް އަހަރު ދުވަހުގެ ތެރޭގައި 50 ކުދިންގެ ބޯން މެރޯ ހެދުމުގެ އެއްބަސްވުމުގައި ހެލްތު މިނިސްޓްރީ އާއި އިސްލާމިކް މިނިސްޓްރީއާ ދެމެދު މިދިޔަ އަހަރުގެ ފެބުރުވަރީމަހު ވަނީ އެއްބަސްވުމެއްގައި ސޮއިކުރައްވާފައެވެ.
މި ފަރުވާގައި 3 މަހާއި 6 މަހާއި ދެމެދުގެ މުއްދަތެއްގައި އެ ކުދިން ފަރުވާއަށް ރާއްޖޭން ބޭރުގައި މަޑުކުރަން ޖެހެއެވެ. އަދި އިސްލާމިކް މިނިސްޓްރީއިން ކުރިން ހާމަކޮށްފައިވާ ގޮތުގައި ބޯން މެރޯގެ ފަރުވާއަށް ކޮންމެ ކުއްޖަކަށް އެއް މިލިއަން ރުފިޔާއާ ހަމައަށް އެހީ ދޭނެއެވެ.
އެގޮތުން މިދިޔަ އަހަރު ސަރުކާރުގެ އެހީގައި މި ފަރުވާއަށް 14 ކުއްޖަކު ވަނީ ފޮނުވާފައެވެ. އޭގެ ތެރެއިން 6 ކުއްޖަކު ފަރުވާ ފުރިހަމަކޮށްފައިވާއިރު، މިވަގުތު ރާއްޖެއިން ބޭރުގައި 7 ކުއްޖަކު ފަރުވާ ހޯދަމުން ދެއެވެ. އަދި ބާކީ ތިބި ކުދިންގެ ތެރެއިން 3 ކުއްޖަކު މި އަންނަ ފެބުރުވަރީ މަހު ރާއްޖެ އައުމަށް ހަމަޖެހިފައިވާއިރު، ދެންތިބި 4 ކުދިންގެ ފަރުވާ ކުރިޔަށްދާކަމަށް ހެލްތު މިނިސްޓްރީން ވަނީ ފާހަގަކޮށްފައެވެ.
ބޯން މެރޯ ހެދުމަށް ސަރުކާރުން ފޮނުވި ކުދިންތަކުގެ ތެރެއިން 1 ކުއްޖަކު މިދިޔަ އަހަރު ނިޔާވެފައި ވެއެވެ.
ބޯން މެރޯ ފަރުވާ ސަރުކާރުގެ އެހީގައި ހަމަޖެއްސުމުގެ އިތުރުން، ތެލަސީމިއާ ކުދިންނަށް ބޭނުންވާ ބޭހާއި ކޮންސިއުމަބަލްސް ފަސޭހައިން ލިބޭނެ އިންތިޒާމު އެސް.ޓީ.އޯ. މެދުވެރިކޮށާއި އާސަންދައިގެ ތެރެއިން ހަމަޖައްސައިދިނުމަށް ވަޒީރުންގެ މަޖިލީހުގެ ލަފާފުޅުގެ މަތިން ރައީސުލްޖުމްހޫރިއްޔާ ނިންމެވީ 2023ވަނަ އަހަރުގެ ޑިސެމްބަރު މަހުއެވެ.
