Ads by Exprox

ޚަބަރު

އެމްއެމްޕީއާރުސީގެ ޚިޔާނާތް: ފައިސާ ހޯދުމުގައި އެއްބާރުލުން ނުދޭތީ، ދައުވާނުކުރާގޮތަށް ހެދި އެއްބަސްވުންތައް އުވާލައިފި

އެމްއެމްޕީއާރުސީގެ ޚިޔާނާތް: ފައިސާ ހޯދުމުގައި އެއްބާރުލުން ނުދޭތީ، ދައުވާނުކުރާގޮތަށް ހެދި އެއްބަސްވުންތައް އުވާލައިފި

ކުރީގެ ނައިބު ރައީސް އަޙުމަދު އަދީބު، ފޮޓޯ: ސަން

މިފްތާޙް މުޙައްމަދު

މިފްތާޙް މުޙައްމަދު

19 ޖެނުއަރީ 2025، 09:39

19 ޖެނުއަރީ 2025، 09:39

ހުލާސާ

އެއްބަސްވުންތައް ނިންމާލުމުގެ ސަބަބެއް ކަމުގައި ޕީޖީ ފާހަގަކުރައްވާފައިވަނީ، އެއްބަސްވުންތައް ހެދި ސަބަބު ހާސިލް ނުވުން.

މޯލްޑިވްސް މާރކެޓިންގ އެންޑް ޕަބްލިކް ރިލޭޝަންސް ކޯޕަރޭޝަން، އެމްއެމްޕީއާރުސީގެ ޚިޔާނާތުގެ މައްސަލަތަކާ ގުޅިގެން އެކުލަވާލާފައިވާ އިމިޔުނިޓީ އަދި އެއްބާރުލުންދިނުމުގެ އެއްބަސްވުންތައް ނިމުމަކަށް ގެނައުމަށް ޕްރޮސިކިއުޓަރ ޖެނެރަލް ނިންމަވައިފިއެވެ.

މި އެއްބަސްވުންތައް ނިންމާލުމުގެ ސަބަބެއް ކަމުގައި ޕީޖީ ފާހަގަކުރައްވާފައިވަނީ، އެއްބަސްވުންތައް ހެދި ސަބަބު ހާސިލް ނުވުމެވެ. 

މި އެއްބަސްވުންތައް ހަދާފައިވަނީ ޚިޔާނާތުގެ މައްސަލައިގެ ތަޙުޤީޤު ކުރިއަށްގެންދިއުމަށާއި، ދައުލަތަށް ގެއްލިފައިވާ ފައިސާ އަނބުރާ ހޯދުމުގެ މަސައްކަތަށް އެއްބާރުލުން ހޯދުމުގެ ބޭނުމުގައެވެ. ނަމަވެސް ޕީޖީ ވިދާޅުވީ، މި އެއްބަސްވުންތައް ހަދާފައިވާ ފަރާތްތަކުން މައްސަލައިގެ ތަޙުޤީޤަށާއި، ދައުލަތަށް ގެއްލިފައިވާ ފައިސާ އަނބުރާ ހޯދުމަށް އެކަށީގެންވާ އެއްބާރުލުން ނުދޭކަމަށް ތަޙުޤީޤީ އިދާރާތުން މަޢުލޫމާތު ދީފައިވާތީކަމަށެވެ.

މި ތަޙުޤީޤާ ގުޅިގެން ދައުލަތާއެކު ހަދާފައިވާ އެއްބަސްވުންތައް ނިމުމަކަށް ގެނަސްފައިވާ ފަރާތްތަކުގެ ތެރޭގައި ހިމެނެނީ، ކުރީގެ ނައިބު ރައީސް، ހ. ސާމަރާ، އަޙްމަދު އަދީބު ޢަބްދުލްޣަފޫރާއި، މ. ލޭންޑް އޮފް ގާރޑެން، އަޙްމަދު އިޝްފާޙް ޢަލީއާއި، މ. ސެސްނާ، މުޙައްމަދު ޢައްލާމް ލަޠީފްގެ އިތުރުން ގ. އޮއިވާލި، މުޙައްމަދު ޙުސައިންއެވެ. 

އަދި ހ. އާހަމަ، ޢަބްދުالله ޒިޔަތާއެކު ހަދާފައިވާ އެއްބަސްވުން 2022 ވަނަ އަހަރުގެ އޯގަސްޓު މަހުގެ ތެރޭގައި ނިމުމަކަށް ގެނަސްފައިވާކަމަށް ވެސް ޕީޖީ އޮފީހުން ވަނީ ފާހަގަކުރައްވާފައެވެ.

މިއާއެކު، މި މައްސަލަތަކުގެ ތަޙުޤީޤު ކުރިއަށްގެންދަވައި، ދަޤުވާ ކުރުމަށް ވީ އެންމެ އަވަހަކަށް ޕީޖީ އޮފީހަށް ހުށަހެޅުމަށް، ދިވެހި ފުލުހުންގެ ޚިދުމަތަށާއި، އެންޓި-ކޮރަޕްޝަން ކޮމިޝަނަށް ދަންނަވާފައިވާނެކަމަށް ވެސް އެ އޮފީހުން ވަނީ ފާހަގަކޮށްފައެވެ.

މި މައްސަލާގައި ކުރީގެ ނައިބު ރައީސް އަހުމަދު އަދީބުގެ މައްޗަށް 20  އަހަރުގެ ޖަލު ހުކުމެއް އައިސްފައިވެއެވެ. ނަމަވެސް ކުރީގެ ރައީސް އިބްރާޙިމް މުޙައްމަދު ޞާލިޙް ވަނީ އެ މަނިކުފާނުގެ ވެރިކަމުގެ ފަހު ދުވަސްވަރުގައި، 20 އަހަރުގެ ޙުކުމް 4 ދުވަހަށް ލުއިކޮށްދެއްވާފައެވެ. އެހެންކަމުން އަދީބު މިހާރު ވަނީ މިނިވަންވެފައެވެ. 

މި ލިޔުން ކިޔާލުމުން

Ads by MSS