ދަރިވަރަކަށް އަނިޔާކުރިކަމަށް ބުނާ ޓީޗަރު ކޯޓުން ދޫކޮށްލައިފި

މާލޭ ސަރަޙައްދުގެ ސްކޫލެއްގައި ޙާއްސަ އެހީއަށް ބޭނުންވާ ކުއްޖަކަށް ޖިސްމާނީ އަނިޔާކުރި މައްސަލައިގައި ހައްޔަރުކުރި ބިދޭސީ އަންހެން ޓީޗަރު ކޯޓުން ދޫކޮށްލައިފިއެވެ.

މި މައްސަލަ ފެންމަތިވެ، ސްކޫލުން އެޑިއުކޭޝަން މިނިސްޓްރީއަށް ހުށަހެޅުމާ ގުޅިގެން މިނިސްޓްރީން ވަނީ އެ މައްސަލައިގައި ޝާމިލުވާ ޓީޗަރު ސަސްޕެންޑުކޮށް، މައްސަލަ ބެލުމަށް ފުލުހުންނަށް ހުށަހަޅާފައެވެ.

ބުރާސްފަތި ދުވަހު މި މައްސަލަ ފުލުހުންނަށް ހުށަހެޅުމުން، ކޯޓު އަމުރެއްގެ ދަށުން އޭނާ ހައްޔަރުކޮށްފައި ވަނީ ހުކުރު ދުވަހުކަމަށް މަޢުލޫމާތު ލިބިފައިވެއެވެ. އަދި އޭނާގެ ބަންދާމެދު ގޮތެއް ނިންމުމަށް ކޯޓަށް ހާޒިރުކުރުމުން، ކޯޓުން ނިންމީ، ޝަރުތުތަކަކާއެކު ބަންދުން ދޫކޮށްލުމަށްކަމަށް ވެސް ފުލުހުން ވަނީ ހާމަކޮށްފައެވެ.

އޭނާ ބަންދުން ދޫކޮށްލި ނަމަވެސް، ކަމާގުޅުންހުރި އިދާރާތަކުން ގުޅިގެން މައްސަލަ ތަޙުޤީޤު ކުރަމުން އަންނަ ކަމަށް ފުލުހުން ހާމަކޮށްފައިވެއެވެ.

މި ހާދިސާއާ ގުޅިގެން އެޑިއެކޭޝަން މިނިސްޓަރ، ޑރ. އިސްމާޢިލް ޝަފީއު ވިދާޅުވެފައިވަނީ، މިފަދަ ކަންކަމަކީ ބަލައިގަނެވޭނެ ކަންކަމެއް ނޫން ކަމަށާއި، މިފަދަ މައްސަލަތައް ބެލުމުގައި މިނިސްޓްރީއިން ޒިންމާދާރުކަމާއެކު މަސައްކަތްކުރާނެ ކަމަށެވެ. އަދި މިފަދަ ކަންކަން ތަކުރާރުނުވާނޭހެން ފިޔަވަޅު އަޅަމުން ދާނެ ކަމަށް ވެސް މިނިސްޓަރު ވިދާޅުވިއެވެ.

މީގެ އިތުރުން، ޒިންމާދާރުކަމާއެކު ދަރިވަރުންގެ ޙައްޤުތައް ހިމާޔަތްކޮށް އުފާވެރި އަމާން މާހަޢުލެއްގައި ދަރިވަރުން ތަޢުލީމު ހާސިލްކުރުމަށް ޓީޗަރުން ޙާއްސަ ސަމާލުކަމެއް ދެއްވުމަށް މިނިސްޓަރ ވަނީ އެދިވަޑައިގަންނަވާފައެވެ.