ކުޅިވަރު
ފޮރެސްޓުން ސައުތެމްޕްޓަން ބަލިކޮށް، ދެވަނައިގައި އޮތް އާސެނަލްއާ ޕޮއިންޓުގެ ގޮތުން ހަމަހަމަކޮށްފި

ނޮޓިންހަމް ފޮރެސްޓުގެ ކްރިސް ވުޑްސް (ވ) ވަނީ ޖެހިޖެހިގެން ހަތަރު މެޗުގައި ގޯލު ކާމިޔާބުކޮށްފައި، ފޮޓޯ: ގެޓީ އިމޭޖަސް
ހުލާސާ
މިއަންނަ ސީޒަންގައި ޔޫރަޕްގެ މުބާރާތެއްގައި ވާދަކުރުމަށް ފޮރެސްޓުން ދެކެމުން އަންނަ ހުވަފެނުގައި މިވަނީ މަޑުމަޑުން ކުލަޖެހެން ފަށާފައި.
އިންގްލިޝް ޕްރިމިއަރ ލީގުގައި ނޮޓިންހަމް ފޮރެސްޓުން ސައުތެމްޕްޓަން 3-2 އިން ބަލިކުރުމަށްފަހު، ލީގުގެ ދެވަނައިގައި އޮތް އާސެނަލްއާ ޕޮއިންޓުގެ ގޮތުން ހަމަހަމަކޮށްފިއެވެ. އަދި އާސެނަލް މިވަގުތު ކުރީގައި އޮތީ، ގޯލު ތަފާތުންނެވެ.
މި މެޗުގެ ފުރަތަމަ 41 މިނެޓުގެ ތެރޭގައި ތިން ގޯލު ކާމިޔާބުކުރުމަށްފަހު ފޮރެސްޓުން ހަމަޖެހިލިއެވެ. ނަމަވެސް ދެވަނަ ހާފުގައި ސްއުތެމްޕްޓަން ވަނީ އެމީހުންގެ ކުޅުން ރަގަޅުކޮށް، ފޮރެސްޓަށް ވަރުގަދަޔަށް ޕްރެޝަރުކޮށްފައެވެ. އަދި އެ ޓީމުން މެޗުގެ ނަތީޖާ ހަމަހަމަ ކުރުމަށް ބެނަރެކް ފޮނުވާލި ހަމަލާ ނާކާމިޔާބުވީ، ފޮރެސްޓުގެ ޑިފެންޑަރ، އޮލާ އައިނާގެ ހުޝިޔާރުކަމުންނެވެ.
ފޮރެސްޓަށް ފުރަތަމަ ގޯލު ކާމިޔާބުކޮށްދިނީ މެޗުގެ 11 ވަނަ މިނެޓުގައި އެލިއޮޓް އެޑަސަންއެވެ. ފޮރެސްޓުގެ ވާތްފަރާތު އަރިމަތިން ހޯދި ބޯޅަ ހިފައިގެން ކުރިޔަށް ދިއުމަށްފަހު އޭނާ ގޯލަށް ބޯޅަ ފޮނުވާލީ، ޕެނަލްޓީ އޭރިއާއަށް ނުވަދެ ތިރިތިރިން ކައިރި ކަނަށެވެ. މިއީ ފޮރެސްޓަށް އެޑަސަން ކާމިޔާބުކޮށްދިން ފުރަތަމަ ގޯލެވެ.
ފޮރެސްޓުގެ ދެވަނަ ގޯލަކީ ވެސް ޕެނަލްޓީ އޭރިއާ ބޭރުން ކާމިޔާބުކުރި ގޯލެކެވެ. ސައުތެމްޕްޓަންގެ ޑިފެންޑަރުންނަށް ހެދުނު ގޯހަކުން ބޯޅަ ހޯދުމަށްފަހު، މެޗުގެ 28 ވަނަ މިނެޓުގައި މި ގޯލު ކާމިޔާބުކުރީ ކަލުމް ހުޑްސަން-އޮޑޯއީއެވެ.
އެ ޓީމުގެ ތިން ވަނަ ގޯލު ކާމިޔާބުކޮށްދިނީ، މި ސީޒަނުގައި ގޯލާ ރައްޓެހި ކްރިސް ވުޑްސްއެވެ. މިއީ ގޯލުގެ ކުރިމައްޗަށް އައިނާ ހުރަސްކޮށްލި ބޯޅައެއް ބޮލުން ގޯލަށް ފޮނުވާލުމަށްފަހު އޭނާ މި ސީޒަންގައި ކާމިޔާބުކުރި 14ވަނަ ގޯލެކެވެ.
ސައުތެމްޕްޓަންގެ ގޯލުތައް ކާމިޔާބުކުރީ ދެވަނަ ހާފުގައެވެ. ފުރަތަމަ ގޯލު މެޗުގެ 60 ވަނަ މިނެޓުގައި ޔޭން ބެނަރެކް ކާމިޔާބުކުރި އިރު، އިތުރު ވަގުތުގެ ފުރަތަމަ މިނެޓުގައި އެ ޓީމުގެ ދެވަނަ ގޯލު ކާމިޔާބުކުރީ ޕޯލް އޮނުއަޗޫއެވެ.
މި ނަތީޖާއާއެކު ފޮރެސްޓުން މިވަނީ ބަލިނުވެ 8 މެޗު ހަމަކޮށްފައެވެ. މީގެ ތެރެއިން ލިވަޕޫލްއާ ދެކޮޅަށް ކުޅުނު މެޗުން އެއްވަރުވިއިރު، އެހެން ހުރިހާ މެޗަކުން ވަނީ މޮޅުވެފައެވެ.
އަދި ހަވަނައިގައި އޮތް ބޯނެމައުތުއާ 7 ޕޮއިންޓުގެ ފަރަގެއް އޮތުމުން، މިއަންނަ ސީޒަންގައި ޔޫރަޕްގެ މުބާރާތެއްގައި ވާދަކުރުމަށް އެ ޓީމުން ދެކެމުން އަންނަ ހުވަފެނުގައި މިވަނީ މަޑުމަޑުން ކުލަޖެހެން ފަށާފައެވެ.