ކާށިދޫ ބާ ހުކުރު މިސްކިތުން ފެނުނު އާސާރީ ތަނެއްގެ ތަރަހަ ދިރާސާކުރަން ފަށައިފި

ކ. ކާށިދޫ ބާ ހުކުރު މިސްކިތުގެ ތެރެއިން 2020 ވަނަ އަހަރު ފެނުނު އާސާރީ ތަނެއްގެ ތަރަހަ ދިރާސާ ކުރުމުގެ މަސައްކަތް ކުރިޔަށް ދާކަމަށް ދިވެހި ބަހާއި ސަގާފަތާއި ތަރިކައާ ބެހޭ ވުޒާރާއިން މަޢުލޫމާތު ދީފިއެވެ. މި ގޮތުން 2025 ވަނަ އަހަރުގެ ޖަނަވަރީ 12 އިން 24 އާ ދެމެދު އެ ސަރަހައްދު ދިރާސާ ކުރުމުގެ ފުރަތަމަ މަސައްކަތް ކުރިޔަށްދާނެ ކަމަށް އެ ވުޒާރާއިން ބުނެފައިވެއެވެ.

ކ. ކާށިދޫ ބާ ހުކުރު މިސްކިތުގެ ތެރެއިން 2020 ވަނަ އަހަރު ފެނުނު އާސާރީ ތަނެއްގެ ތަރަހަ

މި މަސައްކަތަކީ ސަގާފީ ތަރިކަ ރައްކާތެރިކުރާ ޤައުމީ މަރުކަޒާއި، ޔުނިވަރސިޓީ އޮފް އީސްޓް އެންގްލިއާ އާއި، ދިވެހިބަހުގެ އެކެޑަމީ އަދި މެރިޓައިމް އޭޝިޔާ ހެރިޓޭޖް ސަރވޭ ގުޅިގެން ކުރެވޭ މަސައްކަތެކެވެ. މި ޕްރޮގްރާމުގައި ތަރިކަ ރައްކާތެރިކުރާ ޤައުމީ މަރުކަޒުގެ މުވައްޒަފުންގެ އިތުރުން ދިވެހިބަހުގެ އެކަޑަމީގެ މުވައްޒަފުންނާއި މެރިޓައިމް އޭޝިއާ ހެރިޓޭޖް ސަރވޭގެ ޓީމު ބައިވެރިވާނެއެވެ.

އަދި މީގެ އިތުރުން، ޔުނިވަރސިޓީ އޮފް އީސްޓް އެންގްލިއާ އިން މާސްޓާސް އިން ދަ އަރޓްސް އޮފް އެފްރިކާ، އޯޝަނިއާ އެންޑް ދަ އެމެރިކާސް ވިތު ސެއިންސްބަރީ ރިސާޗް ޔުނިޓް ކިޔަވަމުންގެންދާ ދިވެހި ދެ ދަރިވަރުން ވެސް މި މަސައްކަތުގައި ބައިވެރިވާނެ ކަމަށް ވުޒާރާއިން ހާމަކޮށްފައިވެއެވެ.

ދިރާސާ ކުރުމުގެ މަސައްކަތް ކުރިއަށް ދަނީ

ދެ ހަފުތާގެ މުއްދަތަށް ކުރިޔަށްދާ މި ދިރާސީ މަސައްކަތުގެ ތެރޭގައި، ފަންނީގޮތުން ބިމުގެ އަޑީގައި ހުންނަ އާސާރީ ތަކެއްޗާމެދު އަމަލުކުރަންވީ ގޮތާއި، އެކަމުގެ އަސާސީ މިންގަނޑުތައް ބައިވެރިންނާ ހިއްސާކުރެވޭނެ ކަމަށްވެސް ވުޒާރާއިން ބުނެފައިވެއެވެ. މި މަސައްކަތުގެ ސަބަބުން ރާއްޖޭގެ އާސާރީ ތަރިކައާ ބެހޭ ގޮތުން އިތުރު މަޢުލޫމާތު ލިބި، އެ ދާއިރާގެ ތަޖުރިބާކާރުން އުފެދޭނެ ކަމަށް އުއްމީދު ކުރެވެއެވެ.