ފަލަސްޠީނުގެ 90 ޤައިދީން މިނިވަންވުމާއެކު ކަރުނައިންފުރިގެންވާ އުފާވެރި މަންޒަރުތަކެއް

ޣައްޒާގައި ހަމާސްގެ ބާރުގެ ދަށުގައި ތިބި 3 އިސްރާއީލީ ޤައިދީން ދޫކޮށްލުމާ ގުޅިގެން، އިސްރާއީލުން ވަނީ 90 ފަލަސްޠީނު ޤައިދީޏް ދޫކޮށްލާފައެވެ. މިއީ ހަމާސްއާއި އިސްރާއީލާ ދެމެދު ހިނގަމުންދާ ހަނގުރާމައިގެ ހުއްޓުމަކަށް ގެނައުމަށް ކުރެވުނު އެއްބަސްވުމުގެ ދަށުން ކުރެވުނު ފުރަތަމަ ޤައިދީން ބަދަލުކުރުމެވެ.

ހޯމަ ދުވަހުގެ ފަތިހު 1 ގެ ހިސާބުގައި ރެޑް ކްރޮސްގެ ބަހުގައި މިނިވަންވި ފަލަސްޠީނު ޤައިދީޏް ވެސްޓް ބޭންކުގެ ރާމަﷲއަށް ގެނެވުނެވެ. މިނިވަންވި ޤައިދީންގެ ތެރޭގައި 69 އަންހެނުންނާއި 21 ޒުވާން ފިރިހެނުން ހިމެނެއެވެ. އެންމެ ހަގު އުމުރުގެ ކުއްޖަކީ 12 އަހަރުގެ ކުއްޖެކެވެ.

މިނިވަންވި މީހުންގެ ތެރޭގައި ޕޮޕިއުލަރ ފްރަންޓް ފޯ ދަ ލިބަރޭޝަން އޮފް ޕެލެސްޓައިންގެ އިސް މެމްބަރެއް ކަމުގައިވާ 62 އަހަރުގެ ޚާލިދާ ޖައްރާރު ވެސް ހިމެނެއެވެ. އޭނާ ވަނީ 6 މަސް ދުވަހު ވަކިން ބަންދުކޮށްފައެވެ.

މިނިވަންވި ޤައިދީޏް ރާމަﷲއަށް ގެނެވުނު އިރު އެތައްހާސް މީހުން ވަނީ އެ މީހުންނަށް މަރުޙަބާ ކިޔުމަށް އެއްވެފައެވެ. އިސްރާއީލުން މިފަދަ އެއްވުންތައް ނުބޭއްވުމަށް އިންޒާރު ދީފައި ވީނަމަވެސް ގިނަ ބަޔަކު ވަނީ މިނިވަންވި ޤައިދީންނަށް މަރުޙަބާ ކިޔުމަށް އެއްވެފައެވެ. ބައެއް މީހުން ވަނީ ފަތަޙް، ހަމާސް އަދި އިސްލާމިކް ޖިހާދުގެ ދިދަތައް ވެސް ހިފައިގެން ނުކުމެފައެވެ.

މީގެ 7 ގަޑިއިރު ކުރިން ޣައްޒާގައި ބަންދުކޮށްފައި ތިބި 20 އަހަރާއި 30 އަހަރާ ދެމެދުގެ 3 އިސްރާއީލީ އަންހެނުން ވަނީ މިނިވަންކޮށްލާފައެވެ.