ޚަބަރު
އެޗްއާރުސީއެމްގެ ނައިބު ރައީސްކަމަށް މުއުމިނާ ވަޙީދު އައްޔަންކުރުމަށް މަޖިލީހުން ފާސްކޮށްފި

މުއުމިނާ ވަޙީދު ފޮޓޯ:އެޗްއާރްސީއެމް
ހިއުމަން ރައިޓްސް ކޮމިޝަން އޮފް ދަ މޯލްޑިވްސް (އެޗްއާރުސީއެމް)ގެ ނައިބު ރައީސްކަމަށް އެ ކޮމިޝަނުގެ މެންބަރު މުއުމިނާ ވަޙީދު އައްޔަންކުރުމަށް ރައްޔިތުންގެ މަޖިލީހުން މިއަދު ފާސްކޮށްފިއެވެ. މި މަޤާމަށް މުއުމިނާ އައްޔަންކުރުމަށް ރައީސުލްޖުމްހޫރިއްޔާ ޑރ. މުޙައްމަދު މުޢިއްޒު ހުށަހެޅުއްވި ނަންފުޅު މިނިވަން މުއައްސަސާތަކުގެ ކޮމިޓީން ދިރާސާކުރެއްވުމަށްފަހު މަޖިލީހުގެ ޖަލްސާއަށް ހުށަހެޅުއްވުމުން، 67 މެންބަރުންގެ ވޯޓުން މި ނިންމުން ފާސްކުރެއްވިއެވެ.
މުއުމިނާ ވަޙީދުގެ ނަންފުޅު މި މަޤާމަށް ރައީސުލްޖުމްހޫރިއްޔާ ފޮނުއްވާފައިވަނީ މި މަހުގެ 16 ވަނަ ދުވަހުއެވެ. މިނިވަން މުއައްސަސާތަކުގެ ކޮމިޓީން މި މައްސަލަ ދިރާސާކުރެއްވުމަށްފަހު، އިންޓަވިއުއަކާ ނުލައި މުއުމިނާ އައްޔަންކުރުމަށް ފެންނަ ކަމަށް އިއްތިފާޤުން ފާސްކުރެއްވިއެވެ.
މުއުމިނާ ވަޙީދަކީ 2020 ސެޕްޓެމްބަރު 8 ވަނަ ދުވަހު އެޗްއާރުސީއެމްގެ މެންބަރުކަމަށް އައްޔަންކުރެވުނު ބޭފުޅެކެވެ. އޭނާ ވަނީ އޮސްޓްރޭލިއާގެ ޔުނިވަރސިޓީ އޮފް ސިޑްނީން ހިއުމަން ރައިޓްސް އެންޑް ޑިމޮކްރަޓައިޒޭޝަންއިން މާސްޓަރސް ޑިގްރީ ހާސިލުކުރައްވާފައެވެ. މީގެ އިތުރުން، އިކޮނޮމިކް މިނިސްޓްރީގައި ކޮންސަލްޓެންޓެއްގެ މަޤާމާއި އެޗްއާރުސީއެމްގެ އެކި މަޤާމުތައް އަދާކުރައްވާފައިވެއެވެ.
އެޗްއާރުސީއެމްގެ ނައިބު ރައީސްގެ މަޤާމު ހުސްވެފައިވަނީ ކުރީގެ ނައިބު ރައީސް ޑރ. އަޙްމަދު އަދުހަމް ޢަބްދުﷲ އިސްތިއުފާ ދެއްވުމާ ގުޅިގެންނެވެ. މިހާރު އެޗްއާރުސީއެމްގައި ތިއްބެވީ ޖުމްލަ ފަސް މެންބަރުންނެވެ.
އެޗްއާރުސީއެމްގެ މެންބަރުކަމުގެ ދައުރަކީ ފަސް އަހަރު ދުވަހެވެ.