ރައީސް ޢައްޔަންކުރެއްވި ހަތަރު ވަޒީރުންނަށް މަޖިލީހުން ރުހުންދީފި

ރައްޔިތުންގެ މަޖިލީހުން މިއަދު ބޭއްވި ދައުރުން ބޭރުގެ ޖަލްސާގައި، ރައީސުލްޖުމްހޫރިއްޔާ ޑރ. މުޙައްމަދު މުޢިއްޒު އަލުން ޢައްޔަންކުރެއްވި ހަތަރު ވަޒީރުންނަށް ރުހުން ދިނުމަށް ފާސްކޮށްފިއެވެ.

ރައީސުލްޖުމްހޫރިއްޔާ މި ހަތަރު ވަޒީރުން ޢައްޔަންކުރެއްވީ މިދިޔަ ޑިސެމްބަރު މަހުގެ 26 ވަނަ ދުވަހު، ވުޒާރާތަކަށް ބަދަލު ގެންނެވުމާ ގުޅިގެންނެވެ. އެގޮތުން، މާލީކަންކަމާއި ތަރައްޤީގެ ރޭވުންތެރިކަމާބެހޭ ވަޒީރުކަމަށް މޫސާ ޒަމީރު، އިމާރާތްކުރުމާއި ގެދޮރުވެރިކަމާއި ބިނާރާ ބެހޭ ވަޒީރުކަމަށް ޑރ. ޢަބްދުﷲ މުއްޠަލިބް، މަތީ ތަޢުލީމާއި މަސައްކަތްތެރިކަމާއި ހުނަރުތައް ތަރައްޤީކުރުމާ ބެހޭ ވަޒީރުކަމަށް ޑރ. ޢަލީ ޙައިދަރު އަޙްމަދު، އަދި ދަނޑުވެރިކަމާއި ދިރޭތަކެއްޗާ ބެހޭ ވަޒީރުކަމަށް ޑރ. މަރްޔަމް މާރިޔާ ޢައްޔަންކުރެއްވިއެވެ.

މަޖިލީހުގެ މިއަދުގެ ޖަލްސާގައި މި ހަތަރު ވަޒީރުންނަށް ވަކިވަކިން ވޯޓަށް އެހުމުން، ހުރިހާ ވަޒީރުންނަށްވެސް ރުހުން ލިބިފައިވެއެވެ. އެންމެ ގިނަ މެންބަރުންގެ ރުހުން ލިބިފައިވަނީ ޑރ. ޢަބްދުﷲ މުއްޠަލިބް އަދި ޑރ. މަރްޔަމް މާރިޔާއަށެވެ. މި ދެ ވަޒީރުންނަށް 70 މެންބަރުންގެ ރުހުން ލިބިފައިވެއެވެ.

ރައްޔިތުންގެ މަޖިލީހުގެ ސަރުކާރުގެ މަސްއޫލިއްޔަތު އަދާކުރާ ކޮމިޓީން މި މައްސަލަ ދިރާސާކުރުމަށްފަހު ނިންމާފައިވަނީ، މި ހަތަރު ވަޒީރުންނަކީވެސް ކުރިން މަޖިލީހުގެ ރުހުން ލިބިގެން ޚިދުމަތްކުރަމުން އައި ވަޒީރުން ކަމަށްވާތީ، އެ މަޤާމުތަކަށް އެންމެ ޤާބިލު ބޭފުޅުންކަމަށެވެ. އަދި ކުރިން އެ މަޤާމުތައް އަދާކުރެއްވިއިރު އެއްވެސް ވަޒީރެއްގެ މައްސަލައެއް ނެތްކަންވެސް ކޮމިޓީން ފާހަގަކޮށްފައިވެއެވެ.