އޭސީސީއަށް ޢައްޔަންކުރުމަށް ރައީސް ފޮނުއްވި ދެބޭފުޅުންގެ ނަން ދިރާސާކުރުމަށް ކޮމިޓީއަށް

އެންޓި-ކޮރަޕްޝަން ކޮމިޝަން (އޭސީސީ) ގެ ހުސްވެފައިވާ ދެ މެންބަރުކަމުގެ މަޤާމަށް ދެ ބޭފުޅަކު ޢައްޔަންކުރެއްވުމަށް ރައީސުލްޖުމްހޫރިއްޔާ ޑރ. މުޙައްމަދު މުޢިއްޒު ރައްޔިތުންގެ މަޖިލީހަށް ހުށައެޅުއްވި ދެނަން ދިރާސާކުރުމަށް މިއަދު ވަނީ ކޮމިޓީއަށް ފޮނުވާފައެވެ.

ރައީސުލްޖުމްހޫރިއްޔާ ހުށަހަޅުއްވާފައިވާ ދެ ނަންފުޅަކީ މއ. ގޯލްޑަންމޫން، އަޙްމަދު ނާޝިދު އާއި ރ. އަލިފުށި، ފަސާނާ، ޢަބްދުﷲ ނާޝިދުއެވެ. މި ދެ ބޭފުޅުންނާ ގުޅޭގޮތުން އެއްވެސް ޝަކުވާއެއް އޮތްނަމަ، އެ ޝަކުވާ ހުށަހެޅުމުގެ ފުރުޞަތު މިއަދުގެ 11:30 އާ ހަމައަށް ވަނީ ހުޅުވާލާފައެވެ.

އޭސީސީގެ މި ދެ މަޤާމު ހުސްވެފައިވަނީ އެ ކޮމިޝަންގެ ނައިބު ރައީސް ޢަބްދުއްސަލާމް އާއި މެންބަރު ޠާހާ މުޙައްމަދު އިސްތިޢުފާ ދެއްވުމާ ގުޅިގެންނެވެ. މި ދެ މެންބަރުން އިސްތިޢުފާ ދެއްވީ އެ ބޭފުޅުންނާ މެދު ނުފޫޒު ފޯރުވުމާއި ކޮރަޕްޝަންގެ ބޮޑެތި ތުހުމަތުތަކެއް ކުރެވި، ރައްޔިތުންގެ މަޖިލީހުގެ މިނިވަން މުއައްސަސާތަކުގެ ކޮމިޓީން އެ ދެ މެންބަރުން ވަކިކުރަން ނިންމާފައިވަނިކޮށެވެ.