އިންޑިއާގެ އައު ސަފީރު ޚާރިޖީ ވަޒީރާ ބައްދަލުކުރައްވައި، ދެ ޤައުމުގެ ގުޅުން ބަދަހިކުރުމަށް މަޝްވަރާކުރައްވައިފި

އިންޑިއާއިން ދިވެހިރާއްޖެއަށް އަލަށް ކަނޑައެޅުއްވި ސަފީރު ޖީ. ބަލަސުބްރަމަނިއަމް، ޚާރިޖީ ވަޒީރު ޑރ. ޢަބްދުﷲ ޚަލީލުގެ އަރިހަށް އިޚްތިރާމްގެ ޒިޔާރަތެއް ކުރައްވައިފިއެވެ. މި ބައްދަލުވުން ބޭއްވުނީ ޚާރިޖީ ވުޒާރާގައެވެ.

މި ބައްދަލުވުމުގައި ޚާރިޖީ ވަޒީރު، އިންޑިއާގެ އައު ސަފީރަށް މަރުޙަބާ ދެންނެވިއެވެ. އަދި ދެ ޤައުމުގެ ދެމެދުގައި އޮތް ގާތް ގުޅުން އިތުރަށް ހަރުދަނާކޮށް، ކުރިއަރުވާނެ ގޮތްތަކާ ބެހޭގޮތުން ދެ ފަރާތުން މަޝްވަރާކުރެއްވިއެވެ.

A very warm welcome to the new High Commissioner of India G. Balasubramanian!

I had a productive first meeting with the High Commissioner today. We reflected on the enduring historical bond between our two countries and reaffirmed our commitment to advancing the close… pic.twitter.com/JiG4PGSMML

— Abdulla Khaleel (@abkhaleel) January 20, 2025

ޚާރިޖީ ވަޒީރު މި ބައްދަލުވުމުގައި، ދެ ޤައުމުގެ ދެމެދުގައި އޮތް ޒަމާންވީ ގާތް ރަޙްމަތްތެރިކަން ފާހަގަކުރެއްވިއެވެ. އަދި އިންޑިއާ ސަރުކާރުން ރާއްޖެއަށް ފޯރުކޮށްދެއްވާފައިވާ އެހީތެރިކަމަށްޓަކައި ދިވެހި ރައްޔިތުންނާއި ދިވެހި ސަރުކާރުގެ ފަރާތުން ޝުކުރު އަދާކުރެއްވިއެވެ.

އިންޑިއާގެ ސަފީރު ވެސް ޚާރިޖީ ވަޒީރު ދެއްވި ހޫނު މަރުޙަބާއަށް ޝުކުރު އަދާކުރެއްވިއެވެ. އަދި ދެ ޤައުމަށް ފައިދާހުރި ކަންތައްތައް ހާސިލްކުރުމަށްޓަކައި ދިވެހި ސަރުކާރާއެކު ގާތުން މަސައްކަތްކުރައްވާނެކަމުގެ ޔަގީންކަން އެރުވިއެވެ.

މި ބައްދަލުވުމުގައި ޚާރިޖީ ވަޒީރުގެ އިތުރުން ފޮރިން ސެކްރެޓަރީ ފާތިމަތު އިނާޔާ، އެމްބެސެޑަރ އެޓް ލާޖް މުޙައްމަދު ފަހުމީ ހަސަން، އިންޑިއާ ޑިވިޜަންގެ ޖޮއިންޓް ސެކްރެޓަރީ ޑރ. އިބްރާހިމް ޒުހުރީ، ޑިރެކްޓަރ އަޙްމަދު ސުޒިލް އަދި ޑިރެކްޓަރ އާއިޝަތު ޝަހުލާ ބައިވެރިވެވަޑައިގެންނެވިއެވެ. އިންޑިއާގެ ފަރާތުން ސަފީރުގެ އިތުރުން ޑެޕިއުޓީ ހައިކޮމިޝަނަރ ކުމާރު ގޯރަވް ބައިވެރިވެވަޑައިގަތެވެ.

އިންޑިއާގެ އައު ސަފީރު ޖީ. ބަލަސުބްރަމާނިއަން، އެމަނިކުފާނުގެ ސަފީރުކަމުގެ ފަތްކޮޅު ރައީސުލްޖުމްހޫރިއްޔާ ޑރ. މުޙައްމަދު މުޢިއްޒުއަށް އަރުވާފައިވަނީ މި މަހުގެ 6 ވަނަ ދުވަހުއެވެ.