Ads by Exprox

ޚަބަރު

ރަމަޟާންމަހުގެ ކުރިން 46 ރަށެއްގެ ކަރަންޓު މައްސަލަ ހައްލުކުރަން ފެނަކައިން މަސައްކަތް ފަށައިފި

ރަމަޟާންމަހުގެ ކުރިން 46 ރަށެއްގެ ކަރަންޓު މައްސަލަ ހައްލުކުރަން ފެނަކައިން މަސައްކަތް ފަށައިފި

ގއ.ކޮލަމާފުށީގެ ކަރަންޓުގެ ޙާލަތު ރަނގަޅު ކުރުމަށް އެރަށައް ގެންދެވުނު 600 ކިލޯވޯޓްގެ ޖެންސެޓް އިންސްޓޯލް ކުރުމުގެ މަސައްކަތް ކުރިއަށް ދަނީ. ފޮޓޯ:ފެނަކަ

އާމިނަތު ޔުމްނާ

އާމިނަތު ޔުމްނާ

20 ޖެނުއަރީ 2025، 02:48

20 ޖެނުއަރީ 2025، 02:48

އަންނަ ރަމަޟާންމަހަށް ކަރަންޓުގެ މައްސަލަ ދިމާވާ ރަށްރަށުގެ ކަރަންޓުގެ މައްސަލަތައް ހައްލުކުރުމަށް މަސައްކަތް ކުރަމުންދާކަމަށް ފެނަކައިގެ މެނޭޖިން ޑިރެކްޓަރ މުޙައްމަދު ނަޖާހް ވިދާޅުވެއްޖެއެވެ.

ރަށްރަށުން ކަރަންޓު ކެނޑޭ މައްސަލައަކީ ދޭތެރެދޭތެރެއިން ދިމާވާ މައްސަލައަކަށްވާއިރު، އެކަމަށް ހައްލެއް ހޯދިފައި ނެތުމުގެ ކަންބޮޑުވުން އަބަދުވެސް އޮވެއެވެ. މި އަހަރުގެ ރަމަޟާން މަސް އައުމުގެ ކުރިން ކަރަންޓުގެ މައްސަލަ ދިމާވާ ރަށްރަށުގެ ކަރަންޓުގެ މައްސަލަ ހައްލުކޮށްދެއްވާނެކަމަށް ރައީސުލްޖުމްހޫރިއްޔާ ޑރ. މުޙައްމަދު މުޢިއްޒު ވަނީ އެމަނިކުފާނު ހުވަދުއަތޮޅަށް ދާދިފަހުން ކުރެއްވި ދަތުރުފުޅުގެ ތެރެއިން ހާމަކުރައްވާފައެވެ.

ފެނަކައިގެ މެނޭޖިން ޑިރެކްޓަރ މުޙައްމަދު ނަޖާހް ވިދާޅުވީ، ރައީސުލްޖުމްހޫރިއްޔާގެ ވަޢުދުފުޅާ އެއްގޮތަށް އަންނަ ރަމަޟާންމަހަށް ކަރަންޓުގެ މައްސަލަ ދިމާވާ ރަށްރަށުގައި ހުރި މައްސަލަތައް ހައްލުކުރުމުގެ މަސައްކަތް ކުރަމުންދާކަމަށެވެ. އެގޮތުން ފެނަކައިން މިހާރު ޓެކްނިކަލް އިވެލުއޭޝަންގެ މަސައްކަތްތަކެއް ފަށައިގެން ކުރިއަށް ދާކަމަށް ނަޖާހް ވިދާޅުވިއެވެ. މިއީ ރަށްރަށުގެ ކަރަންޓުގެ މިހާރުގެ ހާލަތު ދެނެގަތުމަށްކުރާ މަސައްކަތެއްކަމަށް އޭނާ ވިދާޅުވިއެވެ.

ނަޖާހް ވިދާޅުވީ ކަރަންޓުގެ މައްސަލަ ހައްލުކުރުމަށް މީގެ ކުރިންވެސް ދިރާސާތަކެއް ހަދާފައިވާކަމަށެވެ. އެގޮތުން މައްސަލަ އުޅޭ 46 ރަށެއް ފާހަގަވެފައިވާކަމަށެވެ.

ކުރިން އެބަހުރި ދިރާސާތަކެއްކޮށްފައި 46 ރަށަކަށް ޖެންސެޓް ބޭނުންވާކަމަށް އެބައިން ދިރާސާތަކެއް ކޮށްފައި. އެ އެއްޗެހި ސެކުއަރކުރުމުގެ މަސައްކަތް ފިނޭންސް މިނިސްޓްރީއާއި ގުޅިގެން އެ މިނިސްޓްރީއިން ފަންޑްސް އެބަ ހަމަޖައްސަވާދެއްވާ ކޮންމެވެސް ވަރަކަށް

ނަޖާހް 

ފެނަކައިގެ މެނޭޖިން ޑިރެކްޓަރ މުޙައްމަދު ނަޖާހް ވިދާޅުވީ، އަމާޒަކީ އައު ޖެންސެޓް ހޯދައިގެންނާއި މަރާމާތުކުރަން ޖެހޭ ޖެންސެޓްތައް މަރާމާތުކޮށްގެން ރަމަޟާން މަހަށް ކަރަންޓުގެ މައްސަލަ ދިމާވާރަށް ރަށްރަށުގެ މައްސަލަ ހައްލުކުރުންކަމަށެވެ. އެގޮތުން ކުރިއަށް އޮތް ރަމަޟާންމަހުގެ ކުރިން 46 ރަށުގެ ކަރަންޓުގެ މައްސަލަ ހައްލުކުރާނެކަމަށް ނަޖާހް ވިދާޅުވިއެވެ.

ފެނަކައިން ވަނީ މި އަހަރުގެ ހޫނުމޫސުމާއި ރަމަޟާންމަހަށް ތައްޔާރުވުމުގެ ގޮތުން 39 ޖެނެރޭޓަރެއް ހޯދުމަށް އިޢުލާންކޮށްފައެވެ. ފެނަކައިން ވިދާޅުވީ، މި އަހަރުގެ ރަމަޟާން މަސް ދިމާވަނީ އަހަރުގެ އެންމެ ހޫނު ދުވަސްވަރާކަމުން، އެދުވަސްތަކުގެ ކަރަންޓަށް އޮންނަ ޑިމާންޑު ވަރަށް ބޮޑުތަނުން އިތުރުވެގެން ދާނެ ކަމަށެވެ. އެހެންކަމުން ކަރަންޓު ކެޕޭސިޓީ އިތުރުކުރުމަށް، ދުރާލާ ތައްޔާރު ވަމުންދާ ކަމަށެވެ.

މި މަސައްކަތް ކުރިއަށް ދިޔަނަމަވެސް ރަމަޟާންމަހަށް ވަމުންދާ ތައްޔާރީތައް ބާރު ސްޕީޑުގައި ކުރިއަށް ދާކަމަށް ނަޖާހް ވިދާޅުވިއެވެ. އެމަނިކުފާނު އިތުރަށް ވިދާޅުވީ، ރަމަޟާންމަހުގެ ކުރިން ކަރަންޓުގެ މައްސަލަ ހައްލުކުރުމަށް ކުރެވެން ހުރި ހުރިހާ މަސައްކަތެއް ކުރަމުންދާ ކަމަށެވެ.

ރަށްރަށުގެ ކަރަންޓުގެ މައްސަލަ ހައްލުކުރުމަކީ ސަރުކާރުން އިސްކަންދޭ ކަމެއްކަން ފާހަގަކޮށްލެވެއެވެ. ރައީސުލްޖުމްހޫރިއްޔާ ޑރ. މުޙައްމަދު މުޢިއްޒުގެ ވަޢުދުފުޅާ އެއްގޮތަށް، ފެނަކައިން މި މަސައްކަތް ކުރިއަށް ގެންދިއުމަކީ ގިނަ ރައްޔިތުންނަށް ލިބިގެންދާނެ ހިތްހަމަޖެހުމެކެވެ.

ކަރަންޓުގެ މައްސަލަ ހައްލުވުމުން، ޚާއްޞަކޮށް ރަމަޟާންމަހު ރޭގަނޑުގެ ވަގުތުތަކުގައި އަޅުކަންކުރުމަށާއި ދަރުސްތައް ބޭއްވުމަށް ފަސޭހަވެގެންދާނެއެވެ. އަދި ހޫނު މޫސުމުގައި ގޭގައި ތިބެ މަސައްކަތްކުރާ ފަރާތްތަކަށާއި، ކިޔަވާކުދިންނަށްވެސް ފަސޭހަވެގެންދާނެއެވެ.


                    


                    

މި ލިޔުން ކިޔާލުމުން

Ads by MSS