ޚަބަރު
އެއްވަނައަށްދާ ފަރާތަކަށް ރަނުގެ ފުރުސަތަކާއެކު، ފަރުދުން މީޑިއާގެ "ބަބުޅި ކުރުވާހަކަ މުބާރާތް 1446" އިޢުލާންކޮށްފި

ފަރުދުން މީޑިއާގެ "ބަބުޅި ކުރުވާހަކަ މުބާރާތް 1446"

ފަރުދުން
20 ޖެނުއަރީ 2025، 04:27
20 ޖެނުއަރީ 2025، 04:27
ހުލާސާ
މުބާރާތުގައި ބައިވެރިވުމަށް އެދޭ ފަރާތްތަކުން 20 ފެބުރުވަރީ 2025ގެ ކުރިން، އެ ފަރާތަކުން ހުށަހަޅަން ބޭނުންވާ ވާހަކައިގެ ޕީޑީއެފް ފައިލާއި އޯޑިއޯ ފައިލް ފަރުދުން މީޑިއާއަށް ޙިއްސާކުރައްވާ.
އެއްވަނައަށްދާ ފަރާތަކަށް ރަނުގެ ފުރުސަތަކާއެކު، ފަރުދުން މީޑިއާގެ "ބަބުޅި ކުރުވާހަކަ މުބާރާތް 1446" އިޢުލާންކޮށްފިއެވެ. މިއީ މި އަހަރުގެ ރަމަޟާން މަހަށް ޙާއްސަކޮށްގެން ފަރުދުން މިޑިއާގެ ފަރާތުން ހުޅުވާލި ފުރުސަތެކެވެ.
މި މުބާރާތުގައި ބައިވެރިވެ ހުށަހަޅާ ވާހަކަތަކުގެ ތެރެއިން، ލިޔުންތެރިކަމަށާއި ކިޔުންތެރިކަމަށް ބަލައި، ހުށަހަޅާ ވާހަކަތަކުގެ ތެރެއިން އެންމެ މޮޅު 30 ވާހަކަ ހޮވުމަށް ވަނީ ހަމަޖެހިފައެވެ. އަދި މިގޮތުން ހޮވާލެވޭ 30 ވާހަކަ، ރަމަޟާން މަހުގެ ކޮންމެ ދުވަހަކު ފަރުދުން މީޑިއާގެ ސޯޝަލް މީޑިއާ ޕްލެޓްފޯމުތަކުން ގެނަސްދޭނެއެވެ. މީގެ އިތުރުން، މުބާރާތުގެ ވަނަވަނައަށްދާ ވާހަކަތައް ހޮވާނީ މި 30 ވާހަކައިގެ ތެރެއިންނެވެ.
އެހެންކަމުން، މުބާރާތުގައި ބައިވެރިވުމަށް އެދޭ ފަރާތްތަކުން 20 ފެބުރުވަރީ 2025ގެ ކުރިން، އެ ފަރާތަކުން ހުށަހަޅަން ބޭނުންވާ ވާހަކައިގެ ޕީޑީއެފް ފައިލާއި އޯޑިއޯ ފައިލް ފަރުދުން މީޑިއާއަށް ޙިއްސާކުރަން ޖެހެއެވެ. މި ދެ ފައިލް ނުފޮނުވައިފިނަމަ ބެލެވޭނީ، ވާހަކަ ހުށަހެޅުމުގެ ޝަރުތު ފުރިހަމަނުވީ ކަމުގައެވެ. އަދި ބޭނުންނަމަ، އެއް ވާހަކައަށް ވުރެން ގިނަ ވާހަކަ ވެސް ހުށަހެޅިދާނެއެވެ.
"babulhi" kuruvaahaka mubaaraathugai baiverive vadaigathumah; https://t.co/9KUTj6T2W2 pic.twitter.com/cNRVvjR8Bc
— Farudhun (@farudhun) January 20, 2025
މި މުބާރާތުގައި ބައިވެރިވާ ފަރާތްތަކަށް ކޮންމެ ބާވަތެއްގެ ވާހަކައެއް ވެސް ހުށަހެޅޭނެއެވެ. ނަމަވެސް އާންމު އިޖުތިމާޢީ މިންގަނޑަށް ފެތޭ ވާހަކައަކަށް ވުމަކީ ޝަރުތެކެވެ.
ވާހަކަ ފޮނުވާއިރު ދެން ސަމާލުކަން ދޭންޖެހޭނީ، ވާހަކައިގެ އޯޑިއޯ 20 މިނެޓަށް ފެއްތުމަށާއި، 10 މިނެޓަށް ވުރެން ކުރުނުކުރުމަށެވެ. އަދި ވާހަކަ ލިޔާ ފަރާތް ނޫން އެހެން ފަރާތަކުން އޯޑިއޯ އެޅުމަކީ މައްސަލައެއް ނޫނެވެ.
މުބާރާތުގެ އެއްވަނަ، ދެވަނަ އަދި ތިންވަނައަށްދާ ވާހަކަތަކަށް އިނާމު ހުށަހެޅިފައިވާއިރު، އެއްވަނައަށްދާ ވާހަކަ ހުށަހެޅި ފަރާތަށް އިނާމުގެ އިތުރުން ފަރުދުން މީޑިއާގައި ވަޒީފާއެއްގެ ގޮތުގައި ވާހަކަ ލިޔުމުގެ ފުރުޞަދު ލިބިގެންދާނެއެވެ.