ނުކުޅެދުންތެރިކަން ހުންނަ ފަރާތްތަކަށް ހިންގި އިންޓާންޝިޕް ޕްރޮގްރާމް ކާމިޔާބުކަމާއެކު ނިންމާލައިފި

ނުކުޅެދުންތެރިކަން ހުންނަ ފަރާތްތަކަށް ހިންގި އިންޓާންޝިޕް ޕްރޮގްރާމް ކާމިޔާބުކަމާއެކު ނިންމާލައިފިއެވެ. މިއީ މިނިސްޓްރީ އޮފް ސޯޝަލް އެންޑް ފެމިލީ ޑިވެލޮޕްމެންޓާއި، މޯލްޑިވްސް އެއަރޕޯޓްސް ކޮމްޕެނީ ލިމިޓެޑް (އެމްއޭސީއެލް) ގުޅިގެން ކުރިޔަށް ގެންދިޔަ ޕްރޮގްރާމެކެވެ.

މި ޕްރޮގްރާމުގެ ދަށުން ހަތަރު ފަރާތަކަށް ވަނީ ވެލާނާ އިންޓަނޭޝަނަލް އެއަރޕޯޓު ހިންގަމުން އަންނަ އެމްއޭސީއެލްގައި 6 މަސްދުވަހު މަސައްކަތްކޮށް، ތަޖުރިބާ ހޯދުމުގެ ފުރުސަތު ލިބިފައެވެ. 

މި އިންޓާންޝިޕް މިއަދު ނިމިފައިވާއިރު، މި ޕްރޮގްރާމް ފުރިހަމަކުރި ފަރާތްތަކަށް ސެޓްފިކެޓް ހަވާލުކުރުމުގެ ރަސްމިއްޔާތެއް ވެސް ބާއްވާފައި ވެއެވެ. މި ރަސްމިއްޔާތުގައި މިނިސްޓްރީ އޮފް ސޯޝަލް އެންޑް ފެމިލީ ޑިވެލޮޕްމެންޓުގެ ސްޓޭޓް މިނިސްޓަރ އަލްފާޟިލް އަޙްމަދު އާތިފްގެ އިތުރުން، އެމްއޭސީއެލްގެ ޑެޕިއުޓީ މެނޭޖިންގ ޑިރެކްޓަރ އަލްފާޟިލް މުޙައްމަދު ލަމްޢާން ވަނީ ވާހަކަފުޅުދައްކަވާފައެވެ.

އަދި އިންޓާންޝިޕް ފުރިހަމަކުރި ފަރާތްތަކުގެ ތެރެއިން އެއް ފަރާތަކަށް އެމްއޭސީއެލް އިން ދާއިމީ ވަޒީފާ ވެސް ވަނީ ހަމަޖައްސައިދީފައެވެ. މިއީ ނުކުޅެދުންތެރިކަން ހުންނަ ފަރާތްތަކަށް ވަޒީފާގެ ފުރުޞަތުތައް ފަހިކޮށްދިނުމަށް ސަރުކާރުން ކުރަމުންދާ މަސައްކަތުގެ ތެރެއިން ހާޞިލުކުރެވުނު މުހިންމު ކާމިޔާބީއެއްކަމަށް މިނިސްޓްރީން ސިފަކުރެއެވެ. 

މި އިންޓާންޝިޕް ޕްރޮގްރާމް ހިންގާފައިވަނީ މިނިސްޓްރީ އޮފް ސޯޝަލް އެންޑް ފެމިލީ ޑިވެލޮޕްމެންޓާއި އެމްއޭސީއެލް އާއި ދެމެދު 2024 ވަނަ އަހަރުގެ ޖޫން މަހުގެ 9 ވަނަ ދުވަހު ސޮއިކުރެވުނު ފަހުމުނާމާގެ ދަށުންނެވެ.