ޚަބަރު
އޭސީސީއަށް އައްޔަން ކުރުމަށް ފޮނުވި ދެ ނަމަށް މަޖިލީހުން ރުހުންދީފި
ދައުރުން ބޭރުން ބޭއްވި ދެވަަނަ ޖަލްސާގެ ތެރެއިން، ފޮޓޯ: މަޖިލިސް
ހުލާސާ
ދެ ނަމަށް ރުހުންދީފައިވަނީ، ޖަލްސާގައި ބައިވެރިވި 67 މެންބަރުންގެ އިއްތިފާގުން.
އެންޓި-ކޮރަޕްޝަން ކޮމިޝަން (އޭސީސީ)ގެ ހުސްވެފައިވާ ދެ މެންބަރުކަމުގެ މަޤާމަށް ދެ ބޭފުޅަކު ޢައްޔަންކުރެއްވުމަށް ރައީސުލްޖުމްހޫރިއްޔާ ޑރ. މުޙައްމަދު މުޢިއްޒު ރައްޔިތުންގެ މަޖިލީހަށް ހުށައެޅުއްވި ދެނަން ފާސްކޮށްފިއެވެ.
މި ދެ ބޭފުޅުންނަށް ރުހުން ހޯދުމަށް ވޯޓަށް އަހާފައިވަނީ، މަޖިލީހުގެ މިނިވަން މުއައްސަސާތަކާ ބެހޭ ކޮމިޓީއިން ދިރާސާކުރުމަށްފަހު އެ ކޮމިޓީއިން ފާސްވުމާ ގުޅިގެން، މިއަދު ހަވީރު އޮތް މަޖިލީހުގެ ޖަލްސާގައެވެ.
ދައުރުން ބޭރުން ބޭއްވި ދެވަނަ ޖަލްސާގައި، އޭސީސީއަށް އައްޔަންކުރުމަށް ރައީސުލްޖުމްހޫރިއްޔާ ހުށަހެޅުއްވި ދެ ނަމަށް ރުހުންދީފައިވަނީ، ޖަލްސާގައި ބައިވެރިވި 67 މެންބަރުންގެ އިއްތިފާގުންނެވެ.
މިދިޔަ ބުރާސްފަތި ދުވަހު ދައުރުން ބޭރުން ބޭއްވި ފުރަތަމަ ޖަލްސާއަށް ރައީސުލްޖުމްހުރިއްޔާ ހުށަހެޅުއްވި ލިސްޓުގައި އިސްކަންދެއްވާފައި ވަނީ އަޙުމަދު ނާޝިދު އާއި އާސިޔާ ޢަޒީމާ އަށެވެ. ނަމަވެސް ދައުރުން ބޭރުން މިއަދު ބޭއްވި ދެވަނަ ޖަލްސާއަށް ރައީސް ވަނީ އިތުރު ސިޓީފުޅެއް ފޮނުއްވައި، އާސިޔާގެ ބަދަލުގައި ޢަބްދުﷲ ނާޝިދުގެ ނަން ހުށަހަޅުއްވާފައެވެ.
އޭސީސީގެ މި ދެ މަޤާމު ހުސްވެފައިވަނީ އެ ކޮމިޝަންގެ ނައިބު ރައީސް ޢަބްދުއްސަލާމް އާއި މެންބަރު ޠާހާ މުޙައްމަދު އިސްތިޢުފާ ދެއްވުމާ ގުޅިގެންނެވެ. މި ދެ މެންބަރުން އިސްތިޢުފާ ދެއްވީ އެ ބޭފުޅުންނާ މެދު ނުފޫޒު ފޯރުވުމާއި ކޮރަޕްޝަންގެ ބޮޑެތި ތުހުމަތުތަކެއް ކުރެވި، ރައްޔިތުންގެ މަޖިލީހުގެ މިނިވަން މުއައްސަސާތަކުގެ ކޮމިޓީން އެ ދެ މެންބަރުން ވަކިކުރަން ނިންމާފައިވަނިކޮށެވެ.
